Uzt 14 12
Errezitaldia Ean
Iñigo Astizek, Jon Gerediagak eta Ione Gorostarzuk poema errezitaldia eskainiko dute uztailaren 14an (larunbata) 13:00etan Eako Talaian.
Uzt 14 12
Poesia eta musikaz hitzaldia Ean
“Lp bat poema” hitzaldia egingo du Mikel Elorzak uztailaren 14an (larunbata) 10:30ean Eako Beletxen.
Uzt 13 12
Arestiren koplak Ean
“Gabriel Arestiren koplak ahoan” hitzaldi eta errezitaldia egingo du Xabier Amurizak uztailaren 13an (ostirala) 19:30ean Eako Beletxen.
Uzt 12 12
Baroja hil zen duela 100 urte
Barojatarrek Beran erositako Itzea etxean hil zen Serafin Baroja 1912ko uztailaren 16an. Donostiako Plaza Berriko (gaur Konstituzio Plazako) etxeetako batean 1840an jaioa, ingeniaria izan zen, ideologiaz liberala, lau seme-alabaren aita: Dario, Ricardo margolaria eta Pio eta Carmen idazleak. 1875ean Gazi-gezak poema liburutxoa argitaratu zuen. Eta hiru urte geroago idatzi zuen Pudente lehen euskal operaren libretoa, 1894an Donostian taularatua Jose Antonio Santestebanen musikaz. Geroago Santestebanen Lutxi opera (1904) eta Hamahiru damatxo zarzuela ere jantzi zituen. Barojaren kantu denontzat ezagunena San Sebastian martxa da, Sarriegiren doinuaz. Idazlearen bizitzako zertzeladak Joxemiel Bidadorrengandik ezagutu ditzakezu, baita ere Patri Urkizuk 1988an Txertoa argitaletxearekin plazaratutako bilduman.
Uzt 06 12
Mikel Lasaren XX. mendeko poesia kaiera Ean
Mikel Lasaren XX. mendeko poesia kaierari buruz berba egingo dute uztailaren 6an (ostirala) 19:30ean Eako Hea Elkartean.
Uzt 05 12
Hiru gutun Iruñetik Donostian
Patxi Zubizarretak Hiru gutun Iruñetik nobelako pasarteak irakurriko ditu uztailaren 5ean (osteguna) 20:00etan Donostiako Udal Liburutegiko sotoan.
Uzt 05 12
Eako 9. Poesia Egunak
“Gabriel Arestiren koplak ahoan” hitzaldiarekin abiatuko ditu Xabier Amurizak Eako Poesia Egunak uztailaren 13an, ostiral arratsaldean. Biharamunean, uztailaren 14an, Mikel Elorzaren hitzaldi bat, Iñigo Astiz eta Jon Gerediaga eta Ione Gorostarzuren poemen irakurraldia eta Mikel Lasaren poesiari buruzko solasaldia izango dira. Eta uztailaren 15ean bi errezitaldi: Leire Bilbaoren Scanner liburuan oinarritua bat eta bestea Ez dok/n armairu. Asteburuan, zenbait antzerki emanaldiez gainera, Norte Apachek eta Ruper Ordorikak kantaldi bana eskainiko dute.
Uzt 04 12
Bazterrak, Uxio Novoneyra
Lugoko Courel mendikatean dagoen Parada de Moreda herrixkan jaio zen Uxio Novoneyra poeta 1930ean eta Galiziako Idazleen Elkarteko lehendakari zela hil zen 1999an. Biriketako gaitz baten kariaz atseden luzea egin behar izan zuenez 1953an hasi eta hamar urtez, sasoi harexetan Courelgo mendi goietan bakardadean idatzitakoa da Bazterrak (Os eidos, 1955) poema liburua, Koldo Izagirrek euskaratua Novoneyra beraren laguntzaz, Pamiela etxeak 1988an bi liburukitan argitaratua, eta orain sarera osorik dakarguna. Luis Pimentelek, Celso Emilio Ferreirok eta Uxio Novoneyrak osatu zuten gerraosteko poesia galegoaren hirukote nagusia.
Uzt 02 12
Euskal antzertia gaur
EHUren Bilboko udako ikastaroetan Euskal antzertia gaur mintegia izango da uztailaren 2, 3 eta 4an. Bilboko Bizkaia Aretoan 9:00etatik 14:00etara egingo dituzten jardunaldietan parte hartuko dute: Karlos del Olmok, Iñaki Aldekoak, Patxo Telleriak, Iratxe Martinek, Ander Lipusek, Jon Kortazarrek eta Iratxe Retolazak.
Eka 28 12
Martutene Gasteizen
Ramon Saizarbitoriaren Martutene nobela aztertuko dute ekainaren 28an (osteguna) 20:00etan Gasteizko Ignacio Aldecoa kultur etxean. Gidatzailea: Iban Zaldua.
Eka 28 12
Ai ama! Getarian
Arantxa Iturberen Ai ama! liburuaz solas egingo dute ekainaren 28an (osteguna) 18:30ean Getariako Alondegian. Gidatzailea: Uxue Alberdi.
Eka 27 12
Mendekua eta justizia
Prosper Merimee idazle frantsesak 1840an Korsikara bi hilabeteko bidaia egin zuelarik idatzitako nobela da Colomba, urte hartako uztailean argitaratua Revue des Deux Mondes aldizkarian. Bost urte geroago idatziko zuen Carmen, 1847an aldizkari berberean plazaratzeko. Mendekua da Colomba eleberriko gaia; aitaren hilketa ikusi baitzuen Colombak, amorratzen dago noizbait justizia egin dadin. Iñaki Azkunek 1996an egin zuen orain sarean osorik eskaintzen dizugun itzulpen hau.
Eka 21 12
Ezer ez, Janne Teller
Janne Tellerren Ezer ez nobela aurkeztuko du Mikel Mendizabalek ekainaren 21ean (osteguna) 11:00etan Donostiako Udal Liburutegiko sotoan. Argitaletxea: Alberdania.
Eka 21 12
Lauaxetaren obra sarean
Duela 75 urte, 1937ko ekainaren 25ean egunsentiko 5:39an fusilatu zuten Lauaxeta Gasteizko Santa Isabel hilerrian. Interneten emanak dituzu idazlearen lan garrantzitsuenak: Bide barrijak (1931), Arrats beran (1935), poema solteak (1925-1937), poema itzuliak (1927-1931) edo poesia kaiera (antologia); ipuin eta artikulu bilduma: Azalpenak; antzerkiak: Asarre-aldija (1931), Epaya (1932), eta itzulirik Maurice Maeterlincken Balbia (1932) eta Manu Sotaren Iru gudari (1933). E-book moldean ere doan dituzu Lauaxetaren zortzi ale Liburu Elektronikoa gunean. Lauaxeta berpiztu egin zuen Juan Luis Zabalak eta Agur, Euzkadi nobelako protagonista bilakatu 2000. urtean.
Eka 20 12
Poetek Lauaxetari
Lauaxeta fusilatu eta bi urtera, Gorputz dago gudaria poema idatzi zuen Salbatore Mitxelenak. Hogeita hamar urte geroago, Gabriel Arestik ekarri zituen In Memoriam (1967) eta Ekainaren 26 egun (1970). Bernardo Atxagaren Lauaxeta gogoan 1976koa da, eta 1980an plazaratua Ibon Sarasolaren Lauaxeta paredoian. Xabier Montoiak 1983an idatzi zuen Orain dela, Saletxek Txori xotila txiunka, Omar Nabarrok 1986an Lied bat, Iñigo Aranbarrik 1987an Luma beltz-horidun tukana eta geroago Muxuka nazak. 1989an argitaratu ziren Eusebio Erkiagaren Ez zaitez Gernikara joan eta Gernikara noake. 1989koak dira baita ere Lauaxetaren betaurrekoak, Koldo Izagirrek konposatuak. Jose Luis Otamendiren Mendi-negarra eta Joseba Sarrionandiaren Olerkaria 1995ean irakurri genituen; 2003an Ignazio Aiestaranen Poesia Auschwitz eta Gernikan. Izango dira gehiago ere, hemen zerrendatzea guk ahantziak.