Eka 26 03

Mendea George Orwellek

1903ko ekainaren 25ean jaio zen, duela 100 urte, George Orwell idazlea. Hala bizitza nola obra ezagutzeko modukoa duena, autore honi buruzko erreportaia argigarria kaleratu du Berria egunkariak, Emilio Lopez Adanen eta Juan Martin Elexpururen iritzi-artikuluez hornitua. Abereen etxaldea eta 1984 ditu obrarik ezagunenak Orwellek, eta lehena dago euskarara ekarria, hain zuzen Juan Martin Elexpuruk itzulia. Elkar argitaletxearekin kaleratua, 1982 ezkeroztik hainbat berargitalpen izan ditu. Nolanahi ere, itzulpen-moldaketa bat estreinako 1981ean argitaratu zuen Hordagok, Tximista sailean, Abereeneko iraultza izenburuaz. Imanol Unzurrunzaga izan zen itzulpen-moldaketaren arduraduna.
Horretaz gain, Jakin aldizkariko 32. zenbakian, 1984koa hain zuzen, Joxe Azurmendiren artikulua irakur daiteke: 1984: Orwell, idazle enpeinatua.

Eka 26 03

Astero liburu bat: Bidaia / Termitosti

Duela 25 urte argitaratu zen Joxe Austin Arrietaren lehendabiziko liburua: Bidaia / Termitosti. Horixe duzu aste honetan osorik emana. “Bidaia” eta “Termitosti” izeneko bi narrazioak Juanba Berasategiren irudiez apaindurik agertu zituen Ustela Sailak 1978ko udaberrian. Datorren asteko liburua: Jose Luis Otamendiren Lur bat zure minari.

Eka 26 03

Etiopia-k 25 urte

1978ko ekainean plazaratu zuen Bernardo Atxagak Etiopia liburua. Egilearen beraren argitalpena, Pott Liburutegiko liburu bakar bihurtu zen. Berehala sona handia hartu zuen lanak, eta 1978ko Durangoko Azokan liburu salduenaren saria jaso zuen. Gure literatura modernoko ikur, bost urte geroago Ereinek berrargitaratu zuen, egilearen hitzaurrerik gabe eta poema pare bat erantsita. Bi ediziootako azalak, lehenengoko hitzaurrea, lau poema eta egin zaizkion hainbat kritika edo azterlan irakur ditzakezu hemen.

Eka 19 03

Sei hitzaldi Bilbo Zaharra Forum webgunean

Bilbo Zaharra euskaltegiak Euskal kulturaren ajeak eta literatura foroa antolatzen du 2001etik. Zortzi idazleren hitzaldiak izan dira egundaino, eta horietatik seirenak Interneten dauzkazu irakurgai: Bernardo Atxaga, Ramon Saizarbitoria, Koldo Izagirre, Anjel Lertxundi, Pedro Alberdi eta, oraintxe berriki, Itxaro Borda.

Eka 19 03

Astero liburu bat: Emon biar yako

Iñigo Aranbarriren Emon biar yako nobela duzu aste honetan osorik emana, 1994an Susak argitaratua. Julen Azkue editorea da protagonista, 60etan, Zentsuraren zaindaritza zorrotzak estu hartua daukan gizona. Datorren asteko liburua: Joxe Austin Arrietaren lehendabizikoa, “Bidaia / Termitosti”, Ustela Sailak plazaratua..

Eka 19 03

Hitz lau saileko artikuluak

Euskaldunon Egunkariak 1993tik aurrera argitaratutako Hitz lau saila argitaratu du Euskal Editoreen Elkarteak. Xabier Letek, Anjel Lertxundik, Koldo Izagirrek eta Ramon Saizarbitoriak kaleratu zituzten 34 artikuluak bildu ditu liburuak, eta guk orain lehen lau artikuluak eta Martxelo Otamendik eginiko hitzaurrea eskaintzen dizkizuegu. Hilaren 18an Donostian aurkeztutako liburuarekin ateratako sosak itxitako egunkariko langileen alde izango dira. Liburukoez gain, Hitz lau sailak izan zuen bigarren aroko artikuluak ere irakurgai dituzue www.egunero.info helbidean.

Eka 19 03

Egan euskara hutsezkoak 50 urte

1948an abiatutako Egan aldizkariak, Euskalerriaren Adiskideak elkartearen literatur agerkariak, urrats nagusia eman zuen duela 50 urte, 1953an: zenbaki osoa (bakarra atera zuen urte horretan) euskara hutsez plazaratu zen. Eta hala jarraitu zuen Aingeru Irigarai, Koldo Mitxelena eta Antonio Arrueren zuzendaritzapean. Duela 50 urteko zenbakiak hiru lan zekartzan: Aingeru Irigaraik idatzitako Piarres de Axular artikulua, Nemesio Etxanizen hamaika poema eta Xabier Lizardiren Ezkondu ezin ziteken mutilla antzezlana. Hirurak eskaintzen dizkizugu hemen. Bitxikeria gisa, jakin ezazu 1953an Egan aldizkariaren salneurria 4 pezetakoa zela, 14 pezetakoa izanik urte osoko harpidetza.

Eka 12 03

Astero liburu bat: Azalaren kodea

Miren Agur Meabek duela hiru urte argitaratutako Azalaren kodea poema liburua duzu aste honetan osorik emana. Liburuko poemak espainolez eta ingelesez ere irakur ditzakezu Susaren webgunean. Datorren asteko liburua: Iñigo Aranbarriren Emon biar yako nobela.

Eka 12 03

Txistu & Tamboliñ-ekoen laugarrena

Irakurgai dago Txistu y Tamboliñ aldizkariaren Interneteko laugarren zenbakia. Aldizkaria soilik sarean argitaratzeari ekin zioteneko ildo beretik dator laugarren hau ere: editoriala, argazkiak, umorea, erreferentziak… Poemak eta narrazioak badakartza, eta ohiko sinadurak aurkituko dituzu: Lodinowsky, Ludovicus G. Agrorum, Kapanaga… Azken honen artikulua badator, Euskal Literaturaren Misterioak sailari ekin diona, Mosen Bernard Etxepareren espetxealdia izenekoa. Aldizkariaren izenburua: do you want to revolqueibol in the mathorral with me?.

Eka 12 03

Maria Dolores Agirrek 100 urte

Joan den igandean bete ziren 100 urte Maria Dolores Agirre jaio zela Gipuzkoako Errezilen. Euskara eta antzerkirako zaletasunak eraman zuen hainbat jardunetara: Euskal Izkera ta Iztunde Ikastolan ikasle eta irakasle jarduna, irratian 25 urtez aritua, euskara irakaslea… antzergintzaren alorrean egin zuen ekarririk handiena. Itzultzaile lanetan nabarmendu zen: Alejandro Casonaren Txalupak jaberik ez, F. Garcia Lorcaren Iturri-legor, H. Gheon, Buero Vallejo… Rabindranath Tagoreren Amal eta Pio Barojaren Altzateko Jaun antzezlanak irakur ditzakezu hemen. Horretaz gain, berak sortutako Aukeraren maukera… azkenian okerra bakarrizketa eta Bear bearra artikulua ere (biak Egan aldizkarian argitaratuak) eskaintzen dizkizugu.

Eka 05 03

Hitzen itzalean erakusketa

Mikelazulo kultur elkarteak elkartuta hamaika artista gazteek beren lanak erakutsiko dituzte “Hitzen itzalean” deituriko bi erakusketetan. Erakusketa bakoitzean lanak ezberdinak izanen dira baina hitzaren inguruko gogoeta artistiko baten inguruan gauzatuko dira biak. Erakusketa bakoitzean koadro, argazki edo instalazioetan oinarritutako poesia emanaldiak eskainiko dira inaugurazio gisa, Mikelazulon elkartzen diren idazleen eskutik. Erakusketak ondoko hauek izanen dira: Pasai Donibaneko Victor Hugo aretoan ekainaren 5etik 22ra bitartean. Olerki ikuskizuna ekainaren 5ean (osteguna) 19:30 izango da. Errenteriako Xenpelar Etxean ekainaren 16tik 30 bitartera. Ikuskizuna ekainaren 16an (astelehena)19:00etan.

Eka 05 03

Azalaren kodea ingelesez

Dublin Writers Festival-ean izango da Miren Agur Meabe ekainaren 12an. Azalaren kodea liburuko poemak irakurriko ditu euskaraz, eta aldi berean Amaia Gabantxok ingelesera itzulitako batzuk ezagutuko dituzte entzuleek. The Code of the Skin izenburupean ingelesera itzulitako 18 poema horiek eskaintzen dizkizugu orain. Eta datorren asteko Literatur Emailuan “Azalaren kodea” osorik paratuko dugu.

Eka 05 03

Astero liburu bat: Azken fusila

Duela hamar urte argitaratutako Edorta Jimenezen Azken fusila nobela duzu aste honetan osorik emana. 50etako hasieran abiatzen da kontakizuna: Onofreren etxeko atean hots egin dute gauean; asaldaturik atea zabaldu eta, gerran hiltzat jotako Juan agertu zaio: “Ez nok hil, Onofre. Makisan sartuta najagok, horrexegatik etorri nok hire etxera, laguntza behar joat!”.

Eka 05 03

Jon Alonsoren Hodei berdeak

Jon Alonsok Hodei berdeak nobela berria aurkeztuko du datorren astean, ekainaren 13an (ostirala) goizeko 11:00etan Donostiako Bilintx liburudendan. Aurrerapen gisa, hementxe dituzu nobelaren lehen bi kapituluak. Joseba Jaka III. Literatur Bekako sariduna izan zen Jon Alonso, eta argitalpena Euskalgintza Elkarlanean Fundazioaren eta Susa argitaletxearen eskutik dator.

Agenda

Efemerideak

Kritikak