apirilak
maiatza 01 03
Juan Luis Zabalaren Sakoneta ipuin liburua duzu asteon osorik eskaintzen dizuguna, 1994an argitaratua eta hamaika narrazio biltzen dituena. Liburu honetako bi ipuin espainolez ere irakur ditzakezu: “Planetas abatidos” (Juan Luis Zabalak berak itzulia) eta “Nochebuena” (Bego Montoriok itzulia). Datorren asteko liburua: Harkaitz Canoren Kea behelainopean bezala.
Api 24 03
The Balde, euskaraz eta ingelesez argitaratu eta doan banatzen den aldizkariak 9. zenbakia kaleratu berri du. Irudi ederrez eta testu laburrez osatutako ale honetan, Jon Alonsoren Gau orbela narrazioa irakur daiteke. “Belardietako loreak (oraindik) the balde dira” izenburu orokorraren haritik, betiko sailak ere jasotzen ditu aldizkariak: musika, literatura, agenda, komikia, artea…
Api 24 03
Saizarbitoriak eta Izagirrek emaitza bikoitza dastarazi zuten duela 25 urteko Zeruko Argia astekarian. Alde batetik, Baietz astea gaizki bukatu sailean, Luiz Haranburu Altunak PCa utzi zuela eta biribildu zuten artikulu nagusia: Gorka Semprun, Santxeztar Federiko edo Haranburu Altunaren gora beherak. Bestetik, Gure pertsonaia pertsonalaren pertsonaltasuna sailean, Juan Jose Lasa psikiatrarekin egindako elkarrizketa luzea eman zuten, guztira egindako bostetatik azkena.
Api 24 03
Asteon osorik eskaintzen dizugun liburua Hasier Etxeberriaren Eulien bazka nobela berria duzu (duela hilabete Susak argitaratua). Zortzi zati eginda agertu da emakume baten gorpua, eskuak eta burua falta dituela; eta Damian Arruti entomologoak ezaguna du biktima. Datorren astean: Juan Luis Zabalaren Sakoneta ipuin liburua.
Api 17 03
Aste batzuetako hutsunearen ondoren, duela 25 urte berriz ere argitaratu zen Saizarbitoriaren eta Izagirreren Baietz astea gaizki bukatu saila Zeruko Argian. "Rubial pozik Astea baietz gaizki bukatu utziko genuelakoan. Ba ez. Ez dugu abandonatzen eta alperrik du hor zehar asesoria kulturalak eskaini behar dizkigula esaten ibiltzea". Go home Mr. Church zuen aste hartako artikuluak, eta Aberri Egunaren ondokoez ziharduen.
Api 17 03
Durangoko Txaman fantzineak aurtengo neguan kaleratu zuen bigarren zenbakia. Sarean ipini ditugu poema, irudi eta testuak, guztion gozagarri. Aurkezpenean halaxe diote: "Euskadi zaharretik jausten dan beste hosto bat da hau, herri honen makurtze prozesu konstante honetan parte gure ez daben partie".
Api 17 03
Apartheidaren ondorengo Hego Afrikara eramango zaitu Juanjo Olasagarreren Mandelaren Afrika kronika liburuak (Susa argitaletxeak duela bost urte 1998ko apirilean plazaratua). Osorik eskaintzen dizugu orain sarean, eta hemendik aurrera astero liburu bat ekarriko dugu internetera Literatur Emailuen bitartez. Hurrengo astean: Hasier Etxeberriaren Eulien bazka nobela.
Api 03 03
Apirilaren 2an (Hans Christian Andersen idazlearen jaioteguna) ospatzen da Haur Liburuaren Nazioarteko Eguna, eta hain zuzen idazle danimarkarraren Ahate itsusia ipuin ezagunaren irakurraldi batekin egingo dute ospakizuna Euskal Haur eta Gazte Literatura elkartea den Galtzagorriko kideek. Egun honetarako Ana Maria Machado idazle brasildarrak prestatu du nazioarteko agiria.
Api 03 03
Sasoitxo bat isilik izan ondoren, indartsu itzuli ziren duela 25 urteko martxoan Koldo Izagirre eta Ramon Saizarbitoria Gure pertsonaia pertsonalaren pertsonaltasuna elkarrizketa-atalera. Martxoaren 19ko data zeraman Zeruko Argia-n Inazio Atxukarroren museora eraman gintuen bikoteak; eta hurrengo astean Antxon Ezeizarekin jarri zuen hitzordua. Irakurleek nabaritua zuten, nonbait, hutsunea, izen hori zeraman gutuna argitaratu baitzen Atxukarrorekiko solasa zekarren 778. zenbakian, Izagirre eta Saizarbitoriaren falta gaitzetsiz (Xabier eta Albertok sinatua zen gutuna). Lemoizko Zentralak hartu zuen azala eta artikulu nagusia; Sarrionandiaren artikulu pare bat ere irakur zitezkeen. Aberri Eguna izan zen, berriz, 779. zenbakiko azala eta mamia hartu zituen gaia. Oro har liburugintzaz eta bereziki liburuen prezio garestiaz ere bazen artikulua.
Api 03 03
Duela 20 urte, 1983ko martxoan isildu zen betirako Oh! Euzkadi aldizkaria, urte bete argitaratu barik egon ostean. 1977ko irailean Ramon Saizarbitoria eta Koldo Izagirre elkarrekin idazten hasi ziren Zeruko Argian, beraiek sortutako “Baietz astea gaizki bukatu” sailean. 1979ko maiatzean, 24 lagunek sinatutako Oh Euzkadi izeneko orri batzu agertu ziren: “Oh Euzkadi ez da herriaren aldizkaria eta ez dugu uste inoiz ere izango denik“. 1979ko ekainetik urria bitartean Izagirrek eta Saizarbitoriak “Oh! Euzkadi” izenburua darabilte Zeruko Argiako kolaborazioa berritzeko. 1980ko maiatzean Oh! Euzkadi aldizkariaren lehen zenbakia argitaratu zen Donostian, aurrerantzean hilabetekari izateko asmoarekin, Lur argitaratzailearen babesean, Juanba Berasategiren irudiez eta maketaz.
Oh! Euzkadi aldizkarien eragile nagusiak Ramon Saizarbitoria, Koldo Izagirre, Ramon Etxezarreta, Joxean Muñoz, Joxan Elosegi, Juanba Berasategi eta Gotzon Egia izan ziren. Hamasei zenbakietatik sei 1980an kaleratu zituzten, zazpi 1981ean, ale bana 1982ko otsailean eta martxoan eta azkena 1983ko martxoan.
Mar 27 03
Euzko Gogoa aldizkarian, orotara 17 antzerki lan irakur ditzakezu. Izan ere 1950 eta 1959 urteen artean euskaraz idatzi eta beste hizkuntza batzuetatik euskaratzen zen antzerkiaren gune garrantzitsua suertatu zen Jokin Zaitegik zuzentzen zuen aldizkaria. Jacinto Benavente, Jon Etxaide, Joseph Maistre, Telesforo Monzon, Antonio Maria Labaien, Eskilo, Sofokle (Jokin Zaitegik euskaratua), Etienne Salaberri eta Wiliam Shakespeareren antzezlanak (Bedita Larrakoetxeak euskaratuak) daude irakurgai Euzko Gogoan.
Telesforo Monzon Olasoren Lau kantari eta xori bat antzezlana , Antonio Maria Labaienen Jostuna (hiru aldizkaritan eskainia), Etienne Salaberriren Ohantzetik kanpo, eta Wiliam Shakespeareren Macbeth, Lear Errege (King Lear) eta Ekatxa (The Tempest) ere osorik irakur ditzakezu.
Mar 27 03
Martxoaren 27an Nazioarteko Antzerki Eguna ospatuko da mundu osoan. Urtero bat idazten du antzezle edo idazleren batek; aurtengoa Tankred Dorst alemaniarrak idatzi du (Oberlind, 1925). Bere lehen lanak 60ko hamarkadan estreinatu zituen Dorstek, eta absurduaren antzerkian koka daitezke. Bere lan ezagunena “Merlin oder das W?ste Land” da. Diderot, Moliere eta O’Caseyren obrak itzuli eta taularatu ditu. Mundu osoko hainbat hizkuntzatara itzulita topatuko duzu agiria Nazioarteko Antzerki Egunaren gunean. Gurean Urtzi Urrutikoetxeak euskaratu du 2003ko manifestua.
Mar 27 03
Joxerra Garziak aurkeztuko du Hasier Etxeberriaren nobela berria, Eulien bazka, martxoaren 28an (ostirala) 11:00etan Donostiako Udal Liburutegiko Sotoan. Damian Arruti zientzialaria (entomologoa) du protagonista, eztarrian gaitz bat duena eta hilko ote den beldur dagoena; hala ere gertakari harrigarri batek gehiago larrituko du ustekabean: zortzi zatitan moztutako emakume-gorpu bat aurkitu du Ertzaintzak… eta, itxuraz, Damianek ezaguna du. Hona hemen Susa argitaletxearekin plazaratuko duen nobelaren lehen kapitulu biak.
Mar 20 03
“Historia eta oroimena” izenburupean, Galeuscaren XX. edizioa Gernikan burutuko da, Euskal Idazleen Elkartearen ardurapean. Udazkenerako antolatzen ari dira Kataluniako, Galiziako eta Euskal Herriko idazleak batuko dituen topaketa hau, oraindik data jakinik ez badago ere. “Historia eta oroimena” topaketen helburua “herrialde bakoitzaren literaturak historiari eman dion tratamendua aztertzea izango da: dela nobela historikoan, dela folklorean zein mitologian“. Azken Galeuscan (Mallorca, 2002ko azaroaren 7tik 10era)izandako hitzaldi eta irakurketa guztiak dagoeneko irakurgai daude idazleak.org gunean.
Mar 20 03
Euskal Idazleen Elkarteak gune berritua dauka. Oraingoan elkartearen jarduna, idazle bazkideei buruzko informazioa, bibliografia eta argazkiak, elkartearen programa eta argitalpenak (Galeuzcako txostenak, Hegats aldizkaria, Kalegats agerkaria), biltzarren gaineko txosten eta datuak, literatura lehiaketen agenda eta bazkideen txokoa dauzka.
Euskal Idazleen Elkarteak gainera 2003ko batzar nagusia martxoaren 22an (larunbata) 10:30etan eta 12:20an burutuko du.