maiatza
09
02
Iruñeko Erraldoien txokoan euskal literaturari buruzko jardunaldiak antolatu dituzte maiatzaren 13tik (astelehena) 16ra (osteguna) eta hitzaldi guztiak 20:00etan izango dira. Mari Jose Olaziregik “Euskal literatur sistema milurteko berriaren atarian” hitzaldia eskainiko du maiatzaren 13an (astelehena). Itzulpena eta ikerketa euskal literaturan izango da maiatzaren 14ko (asteartea) gai nagusia: Koldo Bigurik “Euskal literatur itzulpena” jorratuko du eta Asun Aierbe Mendizabalek “Literatur ikasketak eta ikerketak gure artean”. Maiatzaren 15ean (asteazkena) euskal literaturaren gaurko paisaia hartuko dute gaitzat. Tere Irastortzak “Euskal poeta irakurleen bila” izango du hizpide, Iban Zalduak “Euskal narratiba 1990, nobelaren hamarkada?”, Aingeru Epaltzak “Euskal literaturaren harrigarria Nafarroan”. Maiatzaren 16rako (osteguna) hautatutako gaia literatur mediazioa da: edizioa eta kritika euskal literaturan; Jorge Gimenez “Editoreen lana euskal literaturan. Literaturaren harrera” gaiaz mintzatuko da, Ana Urkizak “Kritika literarioa euskal literaturan” izango du hizpide.
maiatza
09
02
Aurten ere Literatura Astea antolatu du Gasteizko gazte asanbladak. Maiatzaren 14tik (asteartea) 19ra (igandea) bitartean, egunero hitzaldi, errezitaldi eta saioak izango dira Gasteizko gaztetxean. Maiatzaren 14an (asteartea) Aitzpea Azkorbebeitiak “Sarrionandiaren irakurketa proposamena” egingo du. Maiatzaren 15ean ipuin kontalari bat izango da. Maitzaren 16an (osteguna) Bihotz Bakartien Klubak poesia errezitaldia egingo du musikaz lagundurik eta maiatzaren 17an (ostirala) preso ohiek Gasteizera plataformak antolatutako literatur lehiaketako testuak irakurriko dituzte. Maiatzaren 19an (igandea) Txusma antzerki taldeak narrazio batzuk antzeztuko ditu, tartean poesia sonoroa eta ipuin erotikoak.
maiatza
09
02
Datorren maiatzaren 16an (osteguna) Lutxo Egiak Paperezko hegazkinak nobela aurkeztuko du Donostian eta Bilbon. 1997an Londresen kokatutako istorioa da Egiarena, baina 1937ko Gernika ere badu oroimenean. Bonbardatutako Gernikara abiatutako kazetari baten iloba ezagutuko du Galder protagonistak. Hiri lainotsu bat baino gehiago, oroimen iturria da Lutxo Egiaren nobelako Londres. Susa argitaletxeak aurkezten duen liburu hau Lutxo Egiaren bigarren liburua da, aurretik Pamiela argitaletxearekin poesiazko “Kalezuloko animalien itzalak” kaleratu zuen. Aurrerapen gisa Interneten dituzu Paperezko hegazkinak liburuko hiru kapitulu.
maiatza
09
02
Odolbildua nobela aurkeztu zuen Josu Landak maiatzaren 2an Donostian eta Bilbon. Donostiako agerraldian Josu Landarekin batera Igela argitaletxeko Xabier Olarra eta Susako Mikel Elortza aritu ziren. Xabier Olarrak liburuaren aurkezpena egin zuen, Elortzak egilearena. Josu Landak hitz gozoak izan zituen Igelarentzat, izan ere bere nobela idatzi bitartean Igelako “12 bat liburu edo irakurri” zituela aipatu baitzuen. Nobela beltza edo pertsonaia nobela artean kokatu zuen egileak bere lana. Orain liburua, liburudendetan salgai ez ezik, Interneten ere osorik dago irakurgai.
maiatza
01
02
Oreretako Mikelazulo elkarteak Poesia Astea antolatu du maiatzeko hirugarren asterako. Igor Estankonaren errezitala izango da maiatzaren 15ean (asteazkena) 20:00etan Oreretako Zumardian. Miren Agur Meabe maiatzaren 16an (osteguna) 20:00etan Mikelazulo Elkartean. Kirmen Uribe maiatzaren 17an (ostirala) 22:00etan Mikela Zubian. Eta “Gu-lau: poesia ikuskizuna” maiatzaren 18an (larunbata) 22:00etan Niessengo plazan. Bestalde, Mikelazulokoek hilero (azken ostegunean) emanaldi bereziak egingo dituzte poema idatzi berriekin. Herriko hainbat lekutan posta-kutxak paratu dituzte, nornahik bere lanak utz ditzan, errezitaldietan irakurriak izateko.
Api
25
02
Ostiela! aldizkariaren 25. zenbakian erlijioaren alderdiak eta alderdikeriak dituzte mintzagai. Ale ia monografikoa da erlijioaren ingurukoa eta, besteak beste, Zaldibiako abade Don Modestoren sermoi frankistak argitaratu dituzte. Putz aldizkariak aldiz, elkarrizketa nagusia Pako Aristiri egin dio (9 orrialdekoa) 14. zenbakian.
Api
25
02
1937ko apirilaren 26an (astelehena), duela 65 urte bonbardatu zuten Gernika. Horrek gerora zer esana ez ezik zer idatzia ere eman du gure literaturan. Gernika aldizkaria sortu zuten Donibane Lohizunen 1945ean. Gernika aldizkarian 1952an kaleratutako 19. zenbakian bereziki gogoratzen dute 25 urte lehenago egindako sarraskia.
Susa aldizkariak ere aldizkari berezia plazaratu zuen 1987an, bonbaketaren 50. urteurrenean. Aipagarria da, gertakariaren ostean Paul Eluard poetak idatziriko Gernikako Garaitza poema, Mikel Antzak euskaratua.
Gernikan berpizten da Agur, Euzkadi nobelako pertsonaietako bat, Lauaxeta; Gernikan atxilotu eta Gasteizen fusilatua. Aurten ekainaren 25ean beteko dira 65 urte Estepan Urkiaga Lauaxeta hil zutela.
Api
18
02
Imanol Murua Uriak 1998an kaleratu zuen Palestina zauritua liburua, Euskaldunon Egunkariako kazetari joanda Palestinan bizi izandakoaren kronika eginez.. Hango gerra dela-eta, Susaren webgunean irakurgai jarri dugu osorik.
Api
11
02
1982ko apirilean, duela 20 urte, Susa aldizkarikoek Bernardo Atxagari eskainitako ale berezia kaleratu zuten, 5. zenbakia. Eneko Olasagastik, Mikel Antzak eta Josu Landak Bernardo Atxagaren obraren gainean jardun zuten; antzerkia, poesia eta bere bi liburutan barneratuz.Tartean Atxagarekin egindako elkarrizketa luzea eskaini zuten. Atxagak hiztegia eta poema bat ere idatzi zituen Susako infiltratu gisa. Azkenik, Joseba Sarrionandiari idatzitako gutun baten zatia ere agertzen da postdata moduan.
Api
11
02
Hegats aldizkariaren zenbaki berri bat aurkeztu du Donostian Euskal Idazleen Elkarteak. 29. zenbaki honetan ere Kritikabideak eta Literaturbideak sailak dira aldizkariaren ardatz. Kritikabideak sailean Itxaro Bordak itzulpenari buruz egindako “Traditore ala?”, J. Mac Corkleren “E. Bishop: kritika bat” eta Joxemari Carrerek idatzitako “Literatura, kontalaritza eta irakurketaren bultzatzea” dira gai nagusiak. Literaturbideak atalean aldiz Manuel Alonso Cataláren “Zenbait poema”, Itziar Lakak idatzitako “Emili”, eta “Manuel Rivas-en Poema gisa tajuturiko ipuinak” Kirmen Uribek itzuliak ageri dira.
Api
11
02
Asteazken gauero (23:10etatik-24:00etara) “Komatxo artean” literatura saioa izaten da Herri Irratian, Mikel Asurmendik zuzendu eta aurkeztua. Datorren astetik aurrera, saioa berritu egingo da eta astero idazle batekin solasaldia izango dute besteak beste. Datozen asteetako gonbidatuak Anjel Lertxundi eta Iban Zaldua dira. “Mentura dugun bitartean” liburuaz ariko da Lertxundi (apirilaren 17an) eta “Traizioak” izango du hizpide Zalduak (apirilaren 24an).
Api
04
02
Duela 20 urte Oh! Euzkadi aldizkarikoek Santi Onandiari eginiko elkarrizketa ekarri gura izan dugu Emailu honetara. Oh! Euzkadi aldizkariaren 15. zenbakia zuen 1982ko martxokoak eta solasaldi luzea eta interesgarria izan zuten garai hartan Larrako komentuan euskal literaturaren alde buru belarri lanean ari zen Aita Santi Onaindiarekin. Karmel aldizkariko arduradunak Olerti aldizkaria ere sortu zuen.
Api
04
02
ETBko literatura saioa den Sautrela datorren apirilaren 6an (larunbata) hasiko da eguerdiko informatiboaren ostean. Lehen programa honetan Martin Ugalderi buruzko erreportajeak eta Aurelia Arkotxari eginiko elkarrizketak osatuko dute saioa. Bigarrenean Iban Zaldua izango da elkarrizketatua. Aro berriko nobedadea Bernardo Atxagaren agerpena da, eta berak aukeratutako testu labur bat irakurriko du programa bakoitzean. Hasier Etxebarriak aurkeztutako programak orain arte bezala liburu bat izango du hizpide nagusia. Euskal liburuez gain noizean behin kanpoko erreferentziei kasu egingo diote.
Mar
28
02
Euskaldunon Egunkariak bere Interneteko edizioan literaturari buruzko gune berri bat plazaratu du. Bertan 47 idazleren bibliografia, 1999, 2000 eta 2001ean euskaraz sortutako liburuen zerrenda, liburu horiei buruzko albiste eta kritiken loturak batu ditu. Begia gehigarriko kritikak eta iruzkinen bilduma eta literatur albisteak ere kontsultagai daude www.egunkaria.com/literatura gunean. Hilero gai bat izango da eztabaidagai gunean, bisitarien partehartzea sustatzeko. Hileon Joseba Sarrionandiaren “Lagun izoztua” liburua da eztabaida sail horretako gaia.
Mar
28
02
Bitartean heldu eskutik liburua plazaratu zuen Kirmen Uribek 2001eko azaroan lehen aldiz eta abenduan bigarren edizioa. Orain idazleak berak eta Gerardo Markuletak espainolera itzuli dituzte liburuko 20 poema.
