Literatur Emailuak

Katamalo Gasteizen

Katamalo poesia eta musika emanaldia egingo du bihotz bakartien klubak urriaren 9an (osteguna) 21:30ean Gasteizko gaztetxean.

Iragaitzaz Donostian

Iragaitzaz nobela aitzakiatzat harturik, Pello Lizarralderi elkarrizketa egingo dio Mikel Hernandez Abaituak urriaren 9an (osteguna) 19:30ean Donostiako Udal Liburutegiko ekitaldi aretoan.

Bernard Manciet olerkari gaskoia

Okzitanierazko literaturaren XX. mendeko idazle handietako bat dugu Bernard Manciet. 1923ko otsailean Sabresen jaioa, Mont de Marsanen zendu zen 2005ean, ekainaren 3an. Bordelen ikasketak egin eta frantses estatuko diplomatiko jardun zuen —halaxe aritu zen Alemaniako berreraikuntza prozesuan eta Nurembergeko Auzian—, eta kultur sustatzaile, Óc aldizkariari lotua, eta idazle. Poeta eta narratzailea, antzerki autorea ere, idazteaz gain hainbat emanaldi ere eskainia da bere poemen gaineko ikuskizunetan. Lo dider de Guernica (Gernikarena / Gernikaz errana) poemak egin du, batez ere, ezagun gure artean, baina hura baino lehen euskarara ekarria zuen Jon Mirandek haren testu bat, Burua, eta Euzko-Gogoa aldizkarian 1957an eman plazara. Gerora, Maiatz aldizkariaren 21. zenbakian Luzien Etxezaharretak euskaratu zuen Gernikaz errana (Lo dider de Guernica). Testu hori bera, jatorrizkoa, frantsesezko eta espainierazko itzulpenak ere argitaratu zituen Maiatz aldizkariak berriro, 2005eko 41. zenbakian, urte horretan zendua zen Bernard Manciet idazleari omenez. Horretaz gain, Andres Urrutiak ere idatzi zuen artikulu bat eta olerkari gaskoiaren pasarte bat euskaratu Idatz & Mintz aldizkariaren 39. zenbakian, 2004an. (gehiago…)

Zulo bat uretan Deustuan

Iñigo Aranbarriren Zulo bat uretan nobela izango dute mintzagai urriaren 8an (asteazkena) 20:00etan Deustuan Berbaizu euskara elkartearen irakurle klubean.

Gotzon Garateren hiru nobela eta bi ipuin liburu

Bart gauean hil zen Gotzon Garate abade eta idazlea Deustuan, 74 urte zituela. Elgoibarko jostun baten hamaika seme-alabaren artean gazteena zen, 1934ko irailaren lehenean sortua. Esku leunak (1977) izan zen argitaratu zuen aurreneko nobela, eta Bilbon girotutako Izurri berria (1981) irakurriena. “Bost polizia eleberri idatzi ditut; kontuan hartuta hogeita hamar liburu baino gehiago idatzi ditudala, ez dira asko ere” adierazi zion Hasier Etxeberriari Jakin aldizkarirako elkarrizketa luze batean 2005ean. Saiakerak, ipuinak, nobelak idatzi zituen, baita kronika ederrak ere, New York, New York (1988) gogoangarria bezalakoak. Gotzon Garateren gomutan, bere hiru nobela eta bi ipuin liburu eskaintzen dizkizugu osorik:

• Esku leuna (1977)
• Elizondoko eskutitzak (1977)
• Lehortean (1979)
• Aldarte oneko ipuinak (1982)
• Alaba (1984)
Kategoriak: hilberriak, liburuak osorik.

Literatura eta homosexualitatea, Gasteizen

Gasteizko irakurle klubak mahai-ingurua antolatu du, Rikardo Arregi eta Angel Erro hizlariekin, Mikel Ayerbe moderatzaile dutela. “Armairutik liburuetara (eta atzera armairura): euskal literatura eta homosexualitatea” dute gaia. Urriaren 2an (osteguna) 20:00etan Gasteizko Hikaateneoan.

Katamalo Ortuellan

Katamalo poesia eta musika emanaldia egingo du bihotz bakartien klubak urriaren 2an (osteguna) 20:00etan Ortuellako Gorbea aretoan.

Suzko lilia, Hedoi Etxarte

Hedoi Etxartek Suzko lilia poema liburu berria aurkeztuko du urriaren 2an (osteguna) 11:00etan Donostiako Udal Liburutegiko Sotoan. Argitaldaria: Susa.

Golgota, Xabier Montoia

Xabier Montoiaren Golgota nobela berria aurkeztuko du Elkar argitaletxeak urriaren 1ean (asteazkena) 11:00etan Donostiako Elkar dendan.

Hedoi Etxarteren lehendabiziko poema liburua

Presentzia eta Ausentzia , bi atal horiez atondua dago Suzko lilia, Hedoi Etxarteren (1986, Iruñea) lehen poema bilduma. Inguruan ez egonda ere buruak bertaratzen digunaz eta ondoan edukita ere hutsa zaigunari buruz dihardu liburuak. Harkaitz Canoren hitzaurrearekin dator: “Ez dago errazkeriarik, ez dago preziosismorik poemotan –eta baldin badago, egilea bera arduratu da irakurlearen aurretik hura saboteatzeaz–. Bila dabilenaren bulkadak eta aldizkako tximistek argitutako neurtitzak dira (…) Ez dira hauek poema politikoak. Ez dira amodiozko poemak. Ez dira poema urbanoak. Baina badira”. Suzko lilia liburuko zazpi poema eskaintzen dizkizugu aurrerapen gisa, urriaren 2an (osteguna) 11:00etan Donostiako Udal Liburutegiko sotoan aurkeztu baino lehen.

Bederatzi ateak, Josu Waliño

Josu Waliñok Bederatzi ateak liburua aurkeztuko du irailaren 30ean (asteartea) 12:00etan Donostiako Udal liburutegiko sotoan. Argitaldaria: Txalaparta.

Iraigaitzaz Donostian

Pello Lizarralderen Iraigaitzaz nobelaz jardungo dute irailaren 29an (astelehena) 19:30ean Donostiako literatur solasaldietan (Udal Liburutegiko Sotoan). Gidatzailea: Xabier Gantzarain.

T.S. Eliot jaio zela 120 urte

1888ko irailaren 26an jaio zen AEBetako St. Louis-en Thomas Stearns Eliot, XX. mendeko literatura ingeleseko idazle garrantzitsuetarik bat. Poeta, antzerki autorea eta saiakeragilea, bere poesiak eta literaturaren gaineko ikerketek eragin handia izan zuten bere garaikide eta ondorengoengan. Bere poesia lanik ezagunenak eta, adituen esanetara, onenak, Four Quartets eta The Waste Land, euskaraz irakur daitezke, Gabriel Arestik eta Joseba Sarrionandiak egindako itzulpenetan. Jon Juaristik bildu zituen bi lanok eta berak euskaratutako Gizon hutsak eta T.S. Eliot euskaraz liburuan, Hordago etxearekin 1983an argitaratua. Hementxe duzue. (gehiago…)

Katamalo Bilbon

Katamalo poesia eta musika emanaldia egingo du bihotz bakartien klubak irailaren 25ean (osteguna) 21:30ean Bilboko Kafe Antzokian.

Mikhail Bulgakov euskaraz

Maisua eta Margarita eleberriaren egiletzat ezaguna, sobietar garaiko narratzaile eta antzerki-autore garrantzitsua dugu Mikhail Bulgakov. Kieven 1891ko maiatzaren 13an jaioa, medikuntza ikasketak egin zituen eta mediku jardun 1920ra bitartean. Fronteko eta eskualde-ospitaleetako bere mediku esperientzia hainbat narraziotan jaso zuen. 1921ean Moskura jo zuen, idazle eta kazetari jardutera. Antzerki lanak idatzi zituen batik bat, ipuin eta eleberriekin batera, eta antzoki zuzendari gisa jardun. Erregimen sobietarrarekiko kritiko, hainbat lan ez ziren bera hil eta askoz geroagora arte argitaratu, baina Sobietar Batasunean bizi eta lan egin zuen, 1940ko martxoaren 10ean Moskun hil zen arte. Maisua eta Margarita, bere maisulana, bera hil eta 30 urtera argitaratu zuen bere emazteak. Euskaraz irakur daiteke Bulgakov. Begoña Lasak euskaratu eta Barojak argitaratu zuen Mediku baten oroitzapenak liburua, hiru narrazio bilduz, 1988an. Gerora, 2001ean, Literatura Unibertsala bildumaren baitan, Txakur-bihotza euskaratu zuen Jose Moralesek, eta Ibaizabalek argitaratu. Moralesek berak Mikhail Bulgakov-i eta bere lanari buruzko argibideak eman zizkigun liburuaren sarreran. Hementxe eskaintzen dizkizuegu liburu biak.