Urt 07 10
Urre urdinaren lurrina Gasteizen
Jurgi Kintanaren Urre urdinaren lurrina saiakeraz jardungo dute urtarrilaren 7an (osteguna) 20:00etan Gasteizko irakurle klubean (Hikaateneoan, Pintore kalean). Gidaria: Iban Zaldua.
Urt 04 10
Albert Camus hil zela 50 urte
Nazien aurkako erresistentzian Combat egunkariko zuzendaria izan zen Albert Camus. Lehen liburuak Aljerian argitaratu zituen arren, 1942an Parisen plazaratutako Arrotza nobelarekin egin zen ezaguna, Izurria eleberriarekin izan zuen ospea 1947an eta Nobel saria hartu zuen 1957an. Gaurko egunez, 1960ko urtarrilaren 4an hil zen Camus kotxe istripu batean, editore eta lagun zuen Michel Gallimardekin zihoala. Idazlearen gorazarre, bi nobela handi horiek eman ditugu sarean: Arrotza, Txato Agirrek itzuli eta 1970ean Herri Gogoak argitaratua, eta Izurria, Imanol Tapiak itzuli eta 1993an Literatura Unibertsala bilduman agertua. Bestalde, Sisyforen Mitoa saiakera ere interneten duzu, Xabier Kintanak 1992an euskaratua (Pentsamenduaren Klasikoak bilduman). Camus antzerki idazlea ere izan zen, baina baita futboleko atezaina ere gaztetan, tuberkulosiaz gaixotu baino lehen; eta behinola bere adiskide Charles Poncetek galdetu ziolarik, zer nahiago duzu: futbola ala teatroa?, erantzun omen zuen: “futbola, zalantzarik gabe”.
Abe 30 09
Kim, mundu osoaren adiskidea
Bombay hirian jaio zen Rudyard Kipling 1865ko abenduaren 30ean, baina Londresera bidali zuten ikastera bost urte besterik ez zituela. Hamazazpirekin itzuli zen Indiara, han kazetari lanetan jardun zuen zazpi urtez, eta azkenean Ingalaterra hartu zuen bizilekutzat 1902an. Poeta eta ipuingilea zen Kipling, nahiz eta bere libururik ezagunenak Oihaneko liburua eta Kim nobelak izan. Oihaneko liburua Jexux Mari Haranburuk euskaratu zuen 1981ean, eta aste honetan osorik sarean eskaintzen dizugun Kim Koro Navarrok 1990ean. Kiplingek Nobel saria hartu zuen 1907an.
Abe 29 09
Errezitaldia Larrabetzun
Juanra Madariagak, Xabi Bordak eta Oier Guillanek beren poema liburu berrietako pasarteak irakurriko dituzte abenduaren 29an (asteartea) 20:00etan Larrabetzuko Hori Bai gaztetxean, Literaturaz Berbetan ekitaldian.
Abe 22 09
Eguzki kolpea, Horacio Quiroga
Horacio Quirogaren Eguzki kolpea liburua aurkeztuko du Jesus Mari Mendizabal itzultzaileak abenduaren 22an (asteartea) 11:00etan Donostiako Udal Liburutegiko sotoan. Literatura Unibertsala bilduma.
Abe 22 09
Han-hemengo jendea
Mar ao Norde poema liburuarekin abiatu zuen idazletza Alvaro Cunqueirok 1932an. Falange Españolako afiliatu izaki, prentsa eta propaganda ardurak bete zituen. Donostian La Voz de España egunkariko kazetaria izan zen 1938-1939 urteetan, geroago Madrilen ABCn. 1943an Falange utzi zuen, eta 1944an kazetari txartela kendu ziotenean bueltatu zen jaioterrira. Cunqueiroren Hareazko erlojua ipuina itzuli zuen Andres Urrutiak Idatz & Mintz aldizkarian 1985ean, eta Poemas naufragos poeta galegoen antologia txiki batean hiru poema Joseba Sarrionandiak 1991n. Liburu bakarra dugu euskaraz: Han-hemengo jendea (1971), 49 narrazioz osatua, gailegoen erretratuen galeria bat, Literaturra Unibertsala bildumarako Mikel Iriartek 1996an itzulia, orain sareak osorik eskaintzen dizuguna.
Abe 20 09
Esanen aduanan Oiartzunen
Esanen aduanan testu-irakurketa egingo dute Yolanda Arrietak, Leire Bilbaok eta Miren Agur Meabek abenduaren 20an (igandea) 19:30ean Oiartzungo Udal Aretoan.
Abe 20 09
Komuneko paperean Oreretan
Komuneko paperean errezitaldia egingo dute Imanol Epeldek eta Mattin Epeldek abenduaren 20an (igandea) 19:00etan Oreretako Mikelazulo elkartean.
Abe 19 09
Eskuen sustraiak Oiartzunen
Eskuen sustraiak poema liburuan oinarrituta, errezitaldia egingo dute Asier Sarasolak eta Oier Guillanek abenduaren 19an (larunbata) 19:00etan Oiartzungo Urkabe-Baita etxeko ganbaran. Musika: Ander Fernandez; pintura: Idoia Beratarbide.
Abe 18 09
Susa sortu zela 30 urte
1979ko abenduaren 18an atera zen inprimategitik Susa aldizkariaren lehendabiziko alea. Aurreneko sei urteetan Josu Landa, Pablo Sastre, Iñaki Uria, Xabier Montoia, Mikel Antza eta Eneko Olasagasti izan ziren eragile nagusiak (portadista: Julio Pardo, logotipoa: Rafa Serras). 30 aldizkari argitaratu zituen Susak 1980tik 1994ra, denera 33 zenbaki (hiru ale bikoitzak izan baitziren). Azken zazpi urteetan Gorka Arrese eta Iñigo Aranbarri arduratu ziren aldizkariaren edizioaz, eta azkeneko hiru zenbakiak Lubaki Bandak egin zituen (Asier Serrano, Gari Berasaluze, Xabier Aldai, Harkaitz Cano, Xabier Gantzarain…). Susak 1983an sortu zuen argitaletxea, Montoiaren Anfetamiña poema liburuarekin abiatuta, Landa editore zela.
Abe 17 09
Musika airean Larrabetzun
Karmele Jaio Musika airean eleberriaz berbetan ariko da abenduaren 17an (osteguna) 20:00etan Larrabetzuko Hori Bai gaztetxean. Antolatzailea: Arrekikili elkartea.
Abe 17 09
Jerusalem, Xalimen hiria Donostian
Jerusalem, Xalimen hiria liburuan oinarrituta, irakurraldia egingo dute Ramon Agirrek, Asier Sotak, Dorleta Urretabizkaiak, Aitziber Garmendiak eta Fito Rodriguezek abenduaren 17an (osteguna) 11:30ean Donostian, Filosofia eta Hezkuntza Zientzien Fakultateko Gradu Aretoan.
Abe 16 09
Ez obeditu inori Arrasaten
Mikel Peruarenaren Ez obeditu inori nobelaz solasaldia egingo dute abenduaren 16an (asteazkena) 18:30ean Arrasateko Kulturaten. Gidaria: Mikel Ayerbe.
Abe 16 09
Ekialdeko kontakizunak, Marguerite Yourcenar
Marguerite Yourcenarren hamar ipuineko bilduma duzu Ekialdeko kontakizunak, 1996an Imanol Zurutuzak itzuli eta orain osorik sarean eskaintzen dizuguna. Marguerite Cleenewerck de Crayencour 1903an jaio zen Bruselan. 1921ean argitaratutako lehen poema bilduma sinatzean asmatu zuen Yourcenar izengoitia. Hadrianoren oroitzapenak (1951) nobela da bere lanik ezagunena, Joxe Austin Arrietak itzulia; baina beste bi lan gehiago ere badira euskaratuak: Alexis (Maite Gonzalez Esnalen eskutik) eta Erremateko tiroa (Josu Zabaletak). Ekialdeko kontakizunak zertan diren, Yourcenarrek berak argibide labur batzuk ematen dizkizu liburu amaierako oharretan.
Abe 14 09
Zoaz infernura, laztana Donostian
Anjel Lertxundiren Zoaz infernura, laztana nobelari buruz jardungo dute abenduaren 14an (astelehena) 19:30ean Donostiako literatur solasaldietan, Udal Liburutegiko sotoan. Gidaria: Juan Luis Zabala.