Mar
25
04
Azken hiru urteotan Susako webgunean literatur lanen inguruan prentsa idatzian agertu izan diren kritikak batu ditugu. 2001. urtean hasi ginen astero kritikak batzen eta ehundaka dira eguneroko prentsan eta aldizkarietan batutako liburuen kritikak. Orain tresna berri bat egokitu diogu kritiken gordailu horri: bilatzailea. Tresna berriarekin, bost eremu izango ditugu bilaketa burutzeko: liburuaren izenburua, liburuaren egilea, argitaletxea, kritikaren egilea eta hedabidea. Urte guzti hauetan batutako kritikak gehitu zaizkio bilatzaileari.
Mar
18
04
Linterna Gorria literatur aldizkari digitala da, hilero 17an berrizten ditu bere edukiak, eta martxoaren 17arekin hirugarren zenbakia plazaratu du: Elurrak ez du dena zuritzen. Elkarrizketa sailean bi berbaldi mamitsu ditu: Harkaitz Cano eta Jon Benitoren artekoa bata eta Julen Gabiria eta Unai Elorriagaren artekoa bestea. Poema asko eta zenbait narrazio ere irakurriko dituzu Bihotz Bakartien Klubak bultzatzen duen edizio elektronikoan. Guztira 20 egileren lanak batzen ditu martxoko zenbaki honek.
Mar
11
04
Konkordia bila izeneko fikzioak idatzi ditu Fito Rodriguezek. Galder protagonistak Parisko Konkordia plazara irten nahi du Magritten erakusketa batean giltzapean geratu delako. Idazleak errealitateko gertaera batetik abiatu nahi izan du: duela urte pare bat, eta Irakeko Gerratea hastear zela, Pariseko museo guztiak itxi zituzten ohi baino lehenago sekulako manifestazioa antolatu baitzen eta, Frantziako Poliziak segurtasun neurri zurrunak hartu behar izan zituen. Fikzio-net honetan Galderren irteera kontatzen da. Fito Rodriguezek berak esan digunez, "urtebeteko lana da non Magritten irudiak eta hizkuntzaren ekarpena adierazpenaren langak eta hesiak, mugak eta ihesak hizpide bihurtzen diren". Galderren pasadizoak irakurtzeko Magritten irudiak izango dituzue testuen lagungarri.
Ots
26
04
Berrehun argazkiko erakusketa duzu Zaldi Ero idazleekin webgunea, Miel A. Elustondok aurkeztua. Literaturarekin lotura duten jendeak agertu ditu: nagusiki idazleak, baina baita ere itzultzaileak, editoreak, kantariak, aktoreak. Lekuentzat ere gorde du txokorik, adibidez: Lauaxeta fusilatu zuten horma edo Arestiren hilobia. Argazki gehiago ekarriko ditu udaberrian, batzuk testuez lagunduak.
Ots
19
04
Txistu y tamboliñ aldizkariak zenbaki berria argitaratu du. Paperezko edizioa aspaldi utzia (Literatur Aldizkarien Gordailuan osorik eskuragarri), Durangaldeko koadrilak 2002ko ekainean berrekin zion argitaratze lanari, Interneteko edizioan orain, eta hauxe duzu bosgarrena. Ohi bezala, poemak, artikuluak, hemeroteka… aurkituko dituzu.
Ots
19
04
Juan Perez Lazarragaren eskuizkribua, 1560ko hamarkadan idatzia, eskuratu eta formatu digitalean argitaratu dute. Adituen arabera, Ernazimentu garaian erabiltzen zen letra moldea eta idazkera baino antzinagokoak dira testuarenak. Gai profanoak agertzen dira: amodiozko koplak, bertsoak eta gisakoak. Eskuizkribua osorik sarean jarrita dago.
Ots
12
04
Gabriel Arestiren poesiak Bilbo gogoratzen digu. Bilbon ere gogoan hartu daiteke Aresti, edo hori da behintzat datorren larunbatean otsailak 14, Literatura Eskolakoek egin asmo dutena. Goizean Koldo Izagirrerekin batera Gabriel Arestiri buruz aritu ostean, arrasti partean ibilbide bat egingo da. Arestiren jaiotetxea, inguruko kaleak, bere omenez daudenak, lagunen lanak… ezagutuko ditu bertaratzen denak. Ibilbidearen mapa, tokiak eta argibideak Interneten daude eskuragai. Hitzordua: Kalderapekon arratsaldeko 17:00etan.
Ots
05
04
Literaturaren inguruan hitzaldiak antolatzen dira han hemenka. Horietako batzuk gainera Interneten argitaratzen dira gero. Paperean ere argitaratu izan ohi dira. Guk topatu ditugunak zerrendatuko ditugu, inork irakurri gura baditu eskura eduki ditzan. Bilbo Zaharra forumean 7 idazleren hitzaldiak daude irakurtzeko moduan (Bernardo Atxaga, Joan Mari Irigoien, Itxaro Borda, Pedro Alberdi, Anjel Lertxundi, Koldo Izagirre, Ramon Saizarbitoria); Literatura Eskolako tailerretan (Iñigo Aranbarri, Jose Luis Otamendi, Mikel Elorza, Alberto Barandiaran); EIZIEren web orrian Bernardo Atxagak Tarazonako jardunaldietan emandakoa aurkituko duzu, eta Uztarria.com gunean berriz Baite euskara elkarteak antolatutakoak. Anjel Lertxundik udako ikastaro batean emandako hitzaldia ere batu dugu.
Urt
08
04
Literatur Emailuen bidez zabaldu izan ditugun web argitalpenetatik batzuk, fitxategi bakarrean konprimituta eskaintzen ditugu hemen, batez ere fitxategi kopuru handikoak eta bolumen aldetik oso handiak ez diren kasuetan. Modu horretara, inork bere ordenadorera jaitsi nahi izanez gero, errazagoa eta erosoagoa izango delakoan.
Urt
01
04
2003ko urtarriletik abendura bitarteko 262 liburu kritika batu ditugu kritika-hemeroteka sailean, helduen literatura alorreko ahalik eta gehienak jasotze aldera. Astero-astero berritzen den hemeroteka duzu. 2002an, 2001ean eta 2000n argitaratutakoak ere kontsulta ditzakezu (831 kritika orotara gaur arte). Zuk eskura daukazun kritikaren bat ahantzi badugu, susanews@armiarma.eus helbidera igorri eta ahalik eta lasterren paratuko dugu.
Abe
25
03
Gaztelupeko lagunek beste pauso bat eman dute. Kantagintza eta musikari lotutako disketxe izatetik, paperezko edizioak ere egingo dituzte aurrerantzean. Paper Hotsak bilduman “apurka, musikarekin eta bereziki kantagintzarekin zerikusirik duten materialak ditugu argitaratuko: bertako eta atzerriko kantarien letrak, memoriak, elkarrizketak, bertsoak, lan teorikoak…” aipatu digute. Horrela kaleratu dituzte aurten Rafa Egigurenek txineratik euskaratutako “Mandarin dotore” poemak, Kirmen Uriberen testuak “Zaharregia txikiegia agian” CD liburuan edota “Karibetik Kantaurira” bertso sorta.
Lehenago ere, literaturari lotutako proiektu batzuek izan dute aterperik Gaztelupeko Hotsaken.
Abe
11
03
100. Literatur Emailua duzu aste honetakoa, eta berezia izan dadin saiatu gara. Entzutekoa den Emailua da hau, disko baten moldekoa. Sei poetaren errezitala duzu ia ordu beteko grabazioan, 48 poema denera. Pako Aristik, Jon Benitok, Igor Estankonak, Juan Ramon Madariagak, Miren Agur Meabek eta Kirmen Uribek zortzina poema irakurri dituzte zuretzat, Zarautzen azaroan Jexuxmai Lopetegi musikariak jasoak. Poema bakoitza bi formatutan daukazu, aukeran: Real Player eta MP3.
Badakizu, bestalde, entzuteko poema multzo handia duzula lehendik Susaren webguneko audioa atalean: Gabriel Aresti, Bitoriano Gandiaga, Koldo Izagirre, Joseba Sarrionandia, Jose Luis Otamendi, Xabier Montoia, Edorta Jimenez, Iñigo Aranbarri, Itxaro Borda, Andolin Eguzkitza, Rafa Egiguren, Gabriel Korta, Jon Arano, Joakin Balentzia, Juanjo Olasagarre, Andoni Tolosa, Xabier Aldai eta Harkaitz Cano.
Aza
20
03
Berria egunkaria sortu eta jarraian igandero narrazio bat irakurtzen hasi ginen. Anjel Lertxundik Wagner ekainaren 29an plazaratu ostean, Edorta Jimenezek Galdara kosmikoa, Itxaro Bordak Kurlo hegaletan, Pako Aristik Postaletan idatzitako ipuina, Felipe Juaristik Autobusa, Iban Zalduak Margolariarena, Gerardo Markuletak Señorita Espe eta andereño Itxaro, Harkaitz Canok Ogiaren konkista, Patxi Zubizarretak Ileak bainuontzian, Javi Cillerok Newscastle-ko tximinoak, Juan Kruz Igerabidek Izar ona, Juan Luis Zabalak Bizikleta andregai eta Xabier Mendiguren Elizegik Haur bat jolasean argitaratu zituzten igandeetako Hitzalean gehigarrian.
Aza
06
03
Galizia, Katalunia eta Euskal Herriko idazleak batu ziren asteburuan Gernikan. Galeusca topaketen emaitza moduan, Katalunia, Galizia eta Euskal Herriko idazleen elkarteek testu bat eman dute, Iñigo Aranbarrik erredaktatua: azken aldarria (letra xehez, noski), galegora eta katalanera itzulia izango dena. Euskarazko bertsio orijinala dugu hemen irakurgai.
Galeuscaren baitan, bestalde, Harkaitz Canok idatzitako Ixteko ordua antzezlana estreinatu zen. Gernikan jokatu zuten azaroaren 1ean Patxi Santamaria eta Itziar Lamuedra aktoreek, Aitzpea Goenagaren zuzendaritzapean. Antzerki testua ere osorik duzu.
Urr
30
03
Sakelako kaiera batean eskuz idatzitako poemak argitaratuko ditu Pako Aristik Libreta horiko poemak izeneko liburu berrian. Azaroaren 7an (ostirala) 11:00etan Donostiako Bilintx dendan aurkeztuko du, Harkaitz Canok lagundurik. Plazara agertu bitartean, poema liburuaren edergarri eta lagungarri, hementxe daukazu Pako Aristiren sakelako libreta hori osorik, idazleak idatzi bezalaxe: eskuizkribuaren faksimilea, alegia.
