Abu 02 07

Hegats aldizkariko kritikak

Euskal Idazleen Elkarteko agerkaria den Hegats aldizkariak hasieratik bertatik landu ditu, sorkuntzazko literatur lanekin batera, kritikagintza eta literatur azterketa. Hainbat gairen inguruko artikuluez gain, liburuen literatur-kritika hertsia ere egin izan du. 1989an hasita 2004ra arte —oraindik ere badihardu, eta horiek Kritiken Hemerotekan jasotzen ditugu—, berrogeita hamarretik gora dira iruzkindutako liburuak. Sakon aztertutakoak zenbait, batzuk liburu-kritika hertsia bainoago zenbait libururen azterketa sakona baitira (aldizkariaren 8, 10 eta 12 zenbakiak osorik horretara eskaini ziren, liburu azterketara, Biderako arrastoak izenburuaren pean). Aldizkariak liburu inportanteen eta 90eko hamarkadako euskal literatur bideen segimendua egin duen heinean, denak bildu ditugu, 58.

Lehen zenbakiarekin lotu zitzaion kritikagintzari Hegats aldizkaria, Amaia Iturbidek egindako liburuen komentarioekin. Zenbaki monografikoetan izan ezik, gainerakoetan literatur kritika landu izan du Hegats-ek, eta hiru zenbaki espreski eskaini zizkion liburuen azterketa sakon bat egiteari (8,10, eta 12 zenbakiak, 1994 eta 1995ean). Hogeita bost libururen azterketa zen, gure literaturan erreferentzia direnak, azterlariak ere euskal idazleak izanik. Zenbaki hauetan iruzkindutako liburuak: Egunero hasten delako, Narrazioak, Azukrea belazeetan, Obabakoak, Kapitain Frakasa, Balizko erroten erresuma, Dordokak eta Elurrak, Mimodramak eta ikonoak, O tempora! O mores!, Ene Jesus, Izuen gordelekuetan barrena, Poliedroaren hostoak, Laino artean zelatari… Komentarioen egileak, esan bezala, idazleak dira, liburu bati buruzko euren azterketa eta begirada partikularra eskainiz.

Azterlan hauetatik aparte, kritika formatu estandarrago batean, 1995etik aurrera sail berezia eskaini izan dio aldizkariak liburu kritikari, eta aldizkariak izan duen maiztasunaren arabera, hainbat libururen errepasoa egitea erdietsi du idazleen elkarteko agerkariak. Hemen bai, publikazio aroari lotuak, izen esanguratsuak daude: Tigre ehizan, Botoiletan, Pausoa noiz luzatu, Elgeta, Larrepetit, Agirre zaharraren kartzelaldi berriak, Septentrio…

Garai honetako kritikarien artean ere askotarik ageri da, guztiak ere euskal literaturgintzan tokia egina duten izenak: Itxaro Borda, Maite Gonzalez Esnal, Inaki Irazabalbeitia, Anuntzi Arana, Igor Estankona, Ana Urkiza, Tere Irastortza, Iban Zaldua, Garikoitz Berasaluze, Aingeru Epaltza, Jerardo Elortza, Marijose Olaziregi, Roberto Mielgo, Amaia Iturbide, Yolanda Arrieta…

Agenda

Efemerideak

Kritikak