urtarrilak
Urt 03 11
Hatsaren Poesia olerki bilduma aurkeztuko du Hatsa elkarteak apirilaren 3an (igandea) 12:00etan Senpereko Larraldea etxean. Arratsaldeko 15:00etan poesia irakurraldia egingo dute; 17:00etan Hatsaren olerki-bustiak argazki-olerki ikuskizuna izango da, bai eta ere Koldo Zubeldiaren errezitaldia.
Abe 30 10
Raymond Carverren Zertaz ari garen maitasunaz ari garenean ipuin liburuaz mintzatuko dira abenduaren 30ean (osteguna) 19:30ean Algortako Villamonte kultur etxean.
Abe 29 10
Frantziako Liburutegi Nazionalaren Gallica Liburutegi Digitalak Bernard Etxepareren Linguae Vasconum primitiae liburuaren faksimilea eman zuen sarean 2010eko azaroaren 9an. François Morpain-en Bordeleko inprimategian 1545ean argitaratutako ale baten erreprodukziorik onena duzu, irakurtzeko bi moldetan eskainia: tamaina handiko iruditan alde batetik eta bestetik liburu simulazioa eginik.
Abe 28 10
Antoine François Prevost, XVIII. mendeko beneditar eta idazle frantsesa, eleberri andanaren egilea izan zen, eta ezagunena Mundutik erretiratutako gizon kalitatezko baten memoriak eta abenturak, zazpi liburukitan argitaratua. Hain zuzen ere, bilduma horretako partea da Manon Lescaut edo Histoire du chevalier Des Grieux et de Manon Lescaut, sutan erretzera bi bider kondenatutako nobela. Honela hasten da: Rouen hiria asaldaturik dago, dozena bat emakume kateaturik baitaramatzate portura, ontziz Amerikara bidaltzeko; haietako batek (Manon Lescaut) arreta pizten du bere liraintasunagatik eta, batez ere, gizon gazte bat (Des Grieux) jarraika ari zaiolako Paristik, eta hainbeste maite du ezen munduko azken muturreraino jarraikitzeko prest baitago.
Abe 27 10
Patxi Zubizarretaren Joan nobelaz ariko dira abenduaren 27an (astelehena) 20:00etan Larrabetzuko Hori Bai gaztetxean.
Abe 22 10
Laura Mintegiren Legez kanpo nobela izango dute mintzagai abenduaren 22an (asteazkena) 18:30ean Zarauzko Sanz Enea liburutegian. Gidatzailea: Ane Mayoz.
Abe 21 10
Javi Cilleroren itzulpenari esker irakurri genuen Francis Scott Fitzgerald idazle amerikarraren Babiloniara itzultzea 1996an (Erein argitaletxea). Ipuin luze hau, idazlearen bizipen batzuetan oinarritua, 1930eko abenduan idatzi eta 1931ko otsailaren 21ean plazaratu zen lehen aldiz Saturday Evening Post-en. Parisen dago berriro Charlie Wales protagonista, Ritz hotelean, lauzpabost egunerako etorria bederatzi urteko alabatxoa ikustearren, zeina koinataren etxean bizi baita Palatine kalean, Luxembourg parketik hurbil. Inoizko idazle estiloz distiratsuenetakoa izan zen Scott Fitzgerald, Zirraragarriak eta madarikatuak edo Gatsby handia nobelen egilea.
Abe 21 10
Joxemiel Bidadorren Hutseaniko hazkurria poema liburua aurkeztuko du Pamiela argitaletxeak abenduaren 21ean (asteartea) 11:30ean Iruñeko Auzolan liburu-dendan.
Abe 20 10
Arthur Schnitzlerren Hildakoek ez dute hitz egiten liburuaz arituko dira abenduaren 20an (astelehena) 18:30ean Arrasateko Kultur Ate liburutegian. Gidatzailea: Mikel Ayerbe.
Abe 19 10
Jose Luis Otamendik eta Juan Azpillagak Bustilehorreko poemak errezitaldia egingo dute abenduaren 19an (igandea) 19:00etan Azkoitiko Mataderian.
Abe 18 10
Ur Apalategi Fikzioaren izterrak ipuin liburuaz mintzatuko da abenduaren 18an (larunbata) 12:00etan Ataunen (Aia auzunean).
Abe 18 10
Idatz & Mintz literatur aldizkariaren 50. zenbakia ospatzeko, irakurraldia egingo dute Unai Elorriagak, Miren Agur Meabek eta Lourdes Unzuetak abenduaren 18an (larunbata) 12:00etan Bilboko Euskal Museoan.
Abe 18 10
Beñat Sarasolak Samuel Beckett. Signifier? Nous, signifier! hitzaldia egingo du Literatura Eskolan, abenduaren 18an (larunbata) 10:00etan Oreretako Mikelazulon.
Abe 17 10
Patxi Zubizarretak Joan nobela aurkeztuko du abenduaren 17an (ostirala) 19:00etan Ordiziako Barrenan.
Abe 16 10
Ibai Iztuetaren Oro bare liburuaz solas egingo dute abenduaren 16an (osteguna) 20:00etan Gasteizko Hikaateneoan. Gidatzailea: Iban Zaldua.