Urt
04
12
Itxura aldaketa izan zen Franz Kafkaren liburuen artean lehen aldiz euskarari ekarria, 1970ean Xabier Kintanak itzuli eta Kriselu argitaletxeak plazaratua. Kintana izan zen, halaber, Kafkaren kontakizunen bilduma bat prestatzen aurrenekoa, Erein etxeko Milabidai bildumari eskainia 1995ean: Ipuinak. Hamahiru narrazio dituzu hemen, orain sarean osorik emanak; horien artean ezagun askoak adibidez lau hauek: “Gosearen artista”, “Trapezioko artista”, “Prometheo” edo “Legearen aurrean”. Hain zuzen ere, Legearen aitzinean da Kafkaren ipuinetan euskaratutako lehena, 1954an, Jon Miranderen eskutik.
Urt
01
12
Urtarrilaren lehena, Nazioarteko dominio publikoaren eguntzat izendatuta dago, izan ere, egun horretan berrizten da urtero dominio publikora igarotzen diren obren zerrenda. Eta gurean aurten, legeak eta arauak lege, Pernando Amezketarrak osatzen du zerrenda hori.
Gregorio Mujikak 1925. urtean argitaratu zuen Pernando Amezketarra eta Klasikoen Gordailuan osorik dago irakurgai.
Gregorio Mujika 1931. urtean hil zen Donostian, eta beraz bere lana aurten igaro da dominio publikokoa izatera. Nazioartean berriz, James Joyce irlandar idazlearen lanak edota Virginia Woolfenak dira, besteak beste, zerrenda horretara gehitu direnak, eta euskarari ekarriak ditugu horietako batzuk. Joyce eta Woolf 1941. urtean hildakoak dira. Hego Euskal Herrian hamar urte barru dominio publikokoak izango diren arren, Ipar Euskal Herrian aurtengo urtarrilaren 1etik dira jadanik, Espainia eta Frantziako legeak aintzat hartuta.
Aurrerantzean, Literatur Emailuetan urteko lehen albistegian dominio publikodun izaera eskuratu duten lanak gogoraraziko ditugu.
Abe
28
11
Manuel Ziarsolo Bilbon jaio zen 1902ko urtarrilaren lehenean. Ermuan hezia, Abeletxe izenordea hango baserri-etxetik hartu zuen. Euzkadi, Euzko eta Eguna agerkarietako kazetaria eta zuzendaria izan zen gerra aurrean. 1952an bere seme Jonek Txinparta antzerki taldea sortu zuenean teatroa idazteari lotu zitzaion, besteak beste: Bermioko portuan, Atsoa gaztetu bear dogu, Eguberri-Aizeak, Bertsolari sariketa, Parisera gogo txarrez. Egan aldizkariak 1956an plazaratutako Eguberri-Aizeak digitalizatu dugu teatro-testuak webgunerako, Barrutiaren Gabonetarako ikuskizuna obraren erara egina, kantuz antzezteko.
Abe
27
11
Xabier Zabaltzak “Agosti Xaho eta euskal pizkundea” hitzaldia eskainiko du abenduaren 27an (asteartea) 19:00etan Berriozarko Kulturgunean.
Abe
22
11
Paddy Rekaldek Spray errezitaldia egingo du musikaz eta graffitiez abenduaren 22an (osteguna) 20:00etan Donostiako Bukowskin.
Abe
22
11
Scanner poema liburuan oinarrituta errezitaldia egingo du Leire Bilbaok abenduaren 22an (osteguna) 20:00etan Larrabetzuko Hori Bai gaztetxean. Musika: Domentx.
Abe
22
11
Toni Morrisonen Maitea nobela aztertuko dute abenduaren 22an (osteguna) 20:00etan Gasteizko Ignacio Aldecoa kultur etxean. Gidatzailea: Iban Zaldua.
Abe
22
11
Juan Luis Zabalak eta Imanol Epeldek “Gaztetxeak eta literatura” mahai-inguruan parte hartuko dute abenduaren 22an (osteguna) 20:00etan Lemoako gaztetxean.
Abe
22
11
Agota Kristofen Koaderno Handia nobelaz solas egingo dute abenduaren 22an (osteguna) 18:30ean Bermeoko liburutegian.
Abe
21
11
Mohammed Xukriren Ogi hutsa nobelaz mintzatuko dira abenduaren 21ean (asteazkena) 19:00etan Iurretako liburutegian.
Abe
21
11
Bordele eta Paris artean bizi izan zen Montesquieu (1689-1755), abokatua ikasketez, ardo ekoizlea negozioz eta baroia tituluz. 1721eko maiatzean Persiar gutunak argitaratu zituen Amsterdamen Jacques Desbordesen moldiztegian. Gutun bidez atondutako nobela honetan irakurriko duzu, Usbek izeneko politikari eta pentsalari persiarrak ihes egin behar izan duela bere herrialdetik (gaur egungo Iran), gortean kritika biziak egin dituelako. Parisera iritsitakoan, hiri europarra Ispahan balitz bezala aztertuko du, modu aski satirikoan. Montesquieu errepublika zalearen nobela, noski, debekatu egin zuen Frantziako erregearen ministroak.
Abe
20
11
Uxue Apaolazaren Mea culpa nobelaz mintzatuko dira abenduaren 20an (asteartea) 18:30ean Arrasateko Kulturaten. Gidatzailea: Mikel Aierbe.
Abe
19
11
Adam Bodorren Artzapezpikuaren bisita nobelaz jardungo dute abenduaren 19an (astelehena) 19:30ean Donostiako Udal Liburutegiko sotoan. Gidatzailea: Iñigo Aranbarri.
Abe
19
11
Josu Jimenez Maiak “Haikuak… euskaraz, zergatik ez?” hitzaldia egingo du abenduaren 19an (astelehena) 19:30ean Iruñeko Erraldoien Txokoan.
Abe
19
11
Ibon Muñoaren Ametsen txokoan bizi naiz liburua aurkeztuko du Ataramiñek abenduaren 19an (astelehena) 19:00etan Eibarko Arrate kultur elkartean.
