Literatur Emailuak

Elkarrekin esnatzeko ordua Muskizen

Kirmen Uriberekin Elkarrekin esnatzeko ordua nobelaz jardungo dute martxoaren 30ean (osteguna) 18:00etan Muskizko kultur etxean.

Munduko Poesia Kaier berriak: Rich, Storni, Thomas

Munduko Poesia Kaierak bilduman Adrienne Rich, Alfonsina Storni eta Dylan Thomas idazleen antologiak aurkeztuko dituzte Maialen Berasategik, Uxue Alberdik eta Iker Alvarezek martxoaren 30ean (osteguna) 11:00etan Donostiako Udal Liburutegi zaharreko sotoan. Argitaletxea: Susa.

Adiorik ez, Hasier Etxeberria, mon ami

“Badakizu ederki, mon ami, amarrua da dena, dedio, goitik behera”. Halaxe dio Hasier Etxeberriak argitaratutako azken nobelaren azken esaldiak. Amarrua ote da gaur jazo den bere heriotza? Bere obrek behintzat —eta ez literarioek soilik— magia handiz iraungo dute inoiz ikusi gabeko truko bat bezala. Beti izan da Hasier bere lana guztiekin partekatzeko zalea, eskuzabal, eta hala 2006an Alua mundua blogean denon eskura ipini zituen argitaratutako liburu ia guztiak. Oraingoan, zerrenda horretan falta ziren bi liburu ekarri nahi izan ditugu hona, harekiko esker on eta maitasun keinu gisa: Ipuin ezberdinak eta erregalokoak (Elkar, 1984; bere lehen liburua) eta Mugetan (Elkar, 1988). Betiko duzu tokia, Hasier, euskal letren errepublikan.

????Dylan Thomas idazlearen poema Hasier Etxeberriaren omenez, Iker Alvarez itzultzaileak
Eta ez da gailenduko heriotzahttps://t.co/q1ugEj9r1s

— Susa literatura (@armiarma) 2017(e)ko martxoak 30

Adrienne Richen poemak lehen aldiz

Poeta estatubatuar batek jaso ditzakeen sari garrantzitsuenak jaso zituen Adrienne Richek (1929-2012). National Book Award for Poetry saria eman ziotenean, Alice Walker eta Audre Lorderekin batera jaso zuen, “patriarkatuak isilarazitako emakume guztien izenean”. Neurri batean, jatorrizko bere identitate zuri, heterosexual, klase ertainekoa deseraikitzen ahalegindu zen, eta gatazka horren zauri eta zantzuak topatuko ditu irakurleak Richen poesian, Maialen Berasategik euskarara lehen aldiz itzulirik.

Su zelaiak Barañainen

Mikel Peruarenaren Su zelaiak nobelaz solastatuko dira martxoaren 29an (asteazkena) 19:00etan Barañaingo liburutegian.

Elkarrekin esnatzeko ordua Eskoriatzan

Kirmen Uriberekin Elkarrekin esnatzeko ordua nobelaz solas egingo dute martxoaren 29an (asteazkena) 18:30ean Eskoriatzako kultur etxean.

Iraganik gabe, Felipe Juaristi

Felipe Juaristik Iraganik gabe nobela aurkeztuko du martxoaren 29an (asteazkena) 11:00etan Donostiako Udal Liburutegiko sotoan. Argitaletxea: Erein.

Elkarrekin esnatzeko ordua Leioan

Kirmen Uribe Elkarrekin esnatzeko ordua nobelaz mintzatuko da martxoaren 29an (asteazkena) 10:30ean Leioan, Magisteritza Eskolan.

Elkarrekin esnatzeko ordua Amezketan

Kirmen Uriberekin Elkarrekin esnatzeko ordua nobelaz ariko dira martxoaren 28an (asteartea) 19:00etan Amezketako kultur etxean.

Nola heldu naiz ni honaino Bilbon

Kattalin Miner Nola heldu naiz ni honaino nobelaz mintzatuko da martxoaren 28an (asteartea) 19:00etan Bilbon, Elkar aretoan.

Deserria haurtzaro, Maddi Zubeldia

Maddi Zubeldiak Deserria haurtzaro nobela aurkeztuko du martxoaren 28an (asteartea) 15:00etan Baionako Elkar aretoan.

Dylan Thomasen 34 poema

Talentu goiztiarrak eta bizimoldeak —edanari emana, eskandaluak, diru arazoak— hanpatu egin zuten Dylan Thomasen mitoa. 1914an jaio zen eta berrogei urte bete baino lehen hil zen. Poeta anglosaxoien artean ezagun eta arrakastatsuenetakoa bihurtu zen XX. mendean. Dylan Thomasen poesiaren dohain nabarmena dugu hizkuntzaren intentsitatea, hein handi batean soinuzko elementuen erritmiko berezien bidez lortzen zuena. Iker Alvarezek bilduma bat osatu du Munduko Poesia Kaieretan.

“5/8 Hitzakots” emanaldia Bilbon

Miren Agur Meabek, Anjel Lertxundik eta Antton Valverdek “5/8 Hitzakots” eskainiko dute martxoaren 27an (astelehena) 20:00etan Bilbon, Arriagako Foyer aretoan.

Alfonsina Storniren
poema antologia

Uxue Alberdik Alfonsina Storni (1892-1938) poeta argentinarraren antologia bat apailatu eta euskaratu berri du Munduko Poesia Kaierak bildumarako, martxoaren 30ean jendaurrean aurkeztekoa. Gizarte patriarkal batean emakume izatearen esperientziak blaitzen du haren obra osoa, bereziki gizonen maitale izatearen neke-zorigaitzak. Alfonsina Storniren poesiaren ezaugarri agerikoenetakoa da idazkeraren indarra; hitzak aho zorrotzeko aizto dira.

Gezurren basoa Iruñean

Alberto Ladronen Gezurren basoa nobelaz solas egingo dute martxoaren 24an (ostirala) 20:00etan Iruñeko Zaldiko Maldikon.