Abe
18
03
Argitalpen berri bi egin ditu Susak Amukoak sailean: Jon Benitoren Orbel zaku bat poesiazkoa (Xabier Gantzarainen irudiekin) eta Jon Alonsoren Umoreari buruzko gogoeta hitzaldia. Amukoak bildumako liburuxkak ez dira salgai izaten, soil-soilik Susaren web-dendan libururen bat erosten dutenek hartzen dituzten opariak baitira, idazleek irakurleei egindako opariak alegia. Alonsoren eta Benitoren berri hauez gainera, aukeran dituzu Zabala, Otamendi, Jimenez, Izagirre, Gantzarain, Cano, Borda, Aristi, Urain eta Aranbarri idazleenak ere.
Abe
04
03
Durangoko Azokan Susa argitaletxeak lau stand izango ditu (Goienkalea 41-44), horietatik bat osorik XX. Mendeko Poesia Kaierak bildumari eskainia. Bestalde, idazle hauek izango dira Susan: abenduaren 5ean (ostirala) Jon Alonso (Hodei Berdeak), abenduaren 6an (larunbata) Pako Aristi (Libreta horiko poemak), Edorta Jimenez (Kilkerren hotsak, Hemingway eta euskaldunak zerbitzu sekretuetan), Hasier Etxeberria (Eulien Bazka) eta Juan Ramon Madariaga (Izozmendiak). Abenduaren 7an (igandea) Edorta Jimenez eta Juan Ramon Madariaga.
Susak Iñaki Uriaren ipuin bat eramango du opari Azokako bezeroentzat.
Aza
27
03
Juan Duñabeitia eta Ernest Hemingway elkarrekin ageri diren argazki batekin dator Edorta Jimenezen liburu berria: Hemingway eta euskaldunak zerbitzu sekretuetan. Duñabeitia marinela, Untzain abadea, Ibarluzea anaiak eta Areitio pilotariak, Pako Garai eta beste batzuk dira liburuko protagonista nagusiak; baita ere bidenabar: Jose Antonio Agirre, Jesus Galindez, Manu Sota edo Antonio Irala. FBIren barruan Basque Intelligence Service zer zen jakingo duzu, agiri sekretuak, gutunak, gertakari bitxiak… 36ko Gerra, gerraren jarraipena exilioan eta Karibea, horra Edorta Jimenezen ikerketa eta abenturazko liburuaren ardatzak.
Urr
02
03
Edorta Jimenezen bosgarren nobela argitaratu du Susak: Kilkerren hotsak. Espioi nobela da, eta aldi berean nobela historikoa eta inbestigaziozkoa. Uriarte espioia du protagonista, 36ko Gerran izan zituen aginduak eta lanak kontatzen dituena. Hari horietatik tiraka, dokumentu ezezagunak eta benetakoak ere agertuko ditu, adibidez: Alejandro Mallona alkate errepublikarraren fusilamenduari buruzkoak. Aurkezpena urriaren 9an (osteguna) izango da 11:30etan Donostiako Udal Liburutegian, eta arratsaldez 20:00etan Bilboko Likinianon. Bien bitartean, Kilkerren hotsak nobelako lehen zazpi kapituluak irakurgai dituzu.
Eka
05
03
Jon Alonsok Hodei berdeak nobela berria aurkeztuko du datorren astean, ekainaren 13an (ostirala) goizeko 11:00etan Donostiako Bilintx liburudendan. Aurrerapen gisa, hementxe dituzu nobelaren lehen bi kapituluak. Joseba Jaka III. Literatur Bekako sariduna izan zen Jon Alonso, eta argitalpena Euskalgintza Elkarlanean Fundazioaren eta Susa argitaletxearen eskutik dator.
Mar
27
03
Joxerra Garziak aurkeztuko du Hasier Etxeberriaren nobela berria, Eulien bazka, martxoaren 28an (ostirala) 11:00etan Donostiako Udal Liburutegiko Sotoan. Damian Arruti zientzialaria (entomologoa) du protagonista, eztarrian gaitz bat duena eta hilko ote den beldur dagoena; hala ere gertakari harrigarri batek gehiago larrituko du ustekabean: zortzi zatitan moztutako emakume-gorpu bat aurkitu du Ertzaintzak… eta, itxuraz, Damianek ezaguna du. Hona hemen Susa argitaletxearekin plazaratuko duen nobelaren lehen kapitulu biak.
Abe
05
02
Durangoko Azokan Susa argitaletxeak lau stand paratu ditu (Kalebarria 41-44), horietatik bat osorik XX. Mendeko Poesia Kaierak bildumari eskainia, 40 antologiekin. Bestalde, idazle hauek izango dira Susan: abenduaren 4an Pablo Sastre (Leuropa) eta Josu Landa (Odolbildua); abenduaren 6an Lutxo Egia (Paperezko hegazkinak), Jon Benito (Aingurak erreketan), Iñigo Aranbarri, Josu Landa, eta Jose Luis Otamendi; abenduaren 7an Igor Estankona (Tundra), Xabier Mendiguren (16 ipuin amodiozko), Kirmen Uribe (Bitartean heldu eskutik), Josu Landa, Jon Benito eta Iñigo Aranbarri.
Aza
21
02
Mikel Ibargurenek Deserriko karrikak bere bigarren poema liburua aurkeztu zuen azaroaren 20ko arratsaldean Baionako Mattin liburudendan egindako errezitaldian. Egilearekin batera Jon Benito idazleak parte hartu zuen. Ibargurenek 1996an argitaratu zuen lehen poema liburua: Hemen gauak lau ertz ditu, hura ere Susa argitaletxearekin.
Urr
24
02
Tundra du izenburua Igor Estankonaren bigarren poema liburuak (lehenak Anemometroa, 1998an argitaratua). Urriaren 24an (osteguna) aurkeztuko du liburu berria Literatur Jazza jardunaldiko errezitalean: Bilboko Kalderapekon (Perro kalea) arratsaldeko 20:15etan. Gitarraz lagunduko dio Borja Estankonak.
Urr
08
02
Gure literaturaren aurrerapauso guztiak poesiak markatu zituen joan den mendean. Orixe, Lizardi, Lauaxeta, Mirande, Aresti gabe, esaterako, ezin konpreni liteke gure historia. Koldo Izagirrek apailatutako XX. Mendeko Poesia Kaierak bildumak, 40 poetaren antologia labur bana argitaratuta, 1.119 poema ekarri ditu: aldizkarietatik, ahitutako liburuetatik eta gaur egungoetatik.
2000ko ekainean abiatutako poesia bilduma 2002ko urrian amaiturik geratu da, lau agerralditan plazaratu ondoren. Agerraldi bakoitzean Koldo Izagirrek egindako aurkezpen hitzaldiak Interneten dauzkazu: Gure poeten piztiak (2002-10-04), Uraren bideak (2001-06-15), Gure poeten malkoa (2000-11-24) eta Errealitatearen arbola (2000-06-30).
Poeten gorazarre izan nahiko luke XX. Mendeko Poesia Kaierak bildumak, baina batez ere irakurleen zerbitzu. Gerraurreko klasikoak bezala, mende amaierako joera eta estilo aniztasuna jaso dituzte 40 kaierek. Idazle bakoitzari sarrera egin dio Koldo Izagirrek, bibliografia poetikoak eta diskografiak eman ditu; xehetasunok, liburuetan ez ezik, Susa argitaletxearen webgunean ere badituzu orain, zenbait poemarekin batera (batzuk errezitaturik entzungai).
Urr
03
02
Jon Mirande, Mikel Lasa, Joan Mari Irigoien, Joseba Sarrionandia, Tere Irastortza, Rafa Egiguren, Juan Kruz Igerabide, Jon Arano, Luigi Anselmi, Karlos Linazasoro eta Juanjo Olasagarre, 11 liburu berri hauekin XX. Mendeko Poesia Kaierak bilduma osatu eta bukatu du Susa literatura argitaletxeak. Urriaren 4an (ostirala) goizeko 11:30etan izango da aurkezpena Donostiako Miramongo Arbelaitzenean.
2000ko ekainean abiatu zen Koldo Izagirrek apailatutako poesia bilduma hau, eta lau agerralditan 40 idazleren antologia labur bana argitaratu: poema hautatuak, bibliografia eta diskografia, Izagirreren sarrera banarekin. Gerraurreko klasikoak bezala, mende amaierako joera eta estilo aniztasuna jaso dute 40 kaierek, harik eta denera 2.500 orrialdeko argitalpena moldatu arte.
Eka
27
02
Jokin Urain eta Iñigo Aranbarri idazleek bi liburu berri argitaratu dituzte Susa argitaletxearen Amukoak bilduman. Jokin Urainek Isilik doaz urak liburua dakar 18 poemez; Uraini lehendik ezagutzen dizkiogu: Gatibu sortu nintzen ,”Adlotse” eta “Izaina”. Beagle itzuli zuan, Martin kronika idatzi du Iñigo Aranbarrik, Cabo Verdetik.
Susako Interneteko dendan liburu bat erosten duenari Amuko bat oparitzen zaio, eta dagoeneko 10 dira agertutako liburuak, beste inon topatu ezin direnak. Amukoak saileko egileak: Juan Luis Zabala, Jose Luis Otamendi, Edorta Jimenez, Koldo Izagirre, Xabier Gantzarain, Harkaitz Cano, Itxaro Borda, Pako Aristi, Jokin Urain eta Iñigo Aranbarri.
Eka
20
02
Xabier Izaga idazlea Gasteizen da 21 urteko erbestealdiaren ondoren. Poema liburu baten egilea da: Bart irakurtzeko gaur izkiriatua (Susa, 1998). Sun Tzu txinatarraren “Gerraren Antzea” euskaratu zuen (Txalaparta, 1995). Izagaren literatur artikuluak Gara egunkariaren Mugalari kultur gehigarrian irakurtzen ditugu.
maiatza
30
02
Pablo Sastrek bere seigarren nobela Leuropa aurkeztu zuen maiatzaren 23an Donostian, Juan Luis Zabalak lagundurik. Andoaingo bi gaztek Marokora egiten duten bidaldia kontatzen du, handik jendea kamioi batean gorderik ekartzeko joanak. “Errealitatea gogorra, gordina, zakarra, dramatikoa eta tragikoa den arren” adierazi zuen Juan Luis Zabalak, “egiari ihes egin gabe baina alferrikako espanturik gabe eta paternalismorik gabe kontatzen du (…) Tximi da narratzailea, inozentea, motz samarra; bere begirada horretan dago nobelaren gakoa“. Pablo Sastrek aitortu zuen: “minik ez balitz bezala saiatu naiz errelitate horri heltzen“. Interneten irakurgai dauzkazu Leuropa nobelaren hasierako pasarte batzuk.
maiatza
09
02
Datorren maiatzaren 16an (osteguna) Lutxo Egiak Paperezko hegazkinak nobela aurkeztuko du Donostian eta Bilbon. 1997an Londresen kokatutako istorioa da Egiarena, baina 1937ko Gernika ere badu oroimenean. Bonbardatutako Gernikara abiatutako kazetari baten iloba ezagutuko du Galder protagonistak. Hiri lainotsu bat baino gehiago, oroimen iturria da Lutxo Egiaren nobelako Londres. Susa argitaletxeak aurkezten duen liburu hau Lutxo Egiaren bigarren liburua da, aurretik Pamiela argitaletxearekin poesiazko “Kalezuloko animalien itzalak” kaleratu zuen. Aurrerapen gisa Interneten dituzu Paperezko hegazkinak liburuko hiru kapitulu.
