maiatza
05
10
Irribarrea kilikatzen duen istorio petrala da Kontrarioa, Lander Garroren lehendabiziko nobela, makurkeriara bezainbat lerratzen dena umore eta parodiara, beti kontrastez josirik, samurtasunez bezala mingoski. Raul Oliveira du protagonista: xakean eta edaten pasatzen ditu arratsak Oskar adiskidearekin, amodio ezinezkoetatik ihesian, idazle izateko ametsekin zorabiatuta. Errenteriako Pontika auzo bazterrekoan bizi da amarekin, baina aurki lanen bat topatu ezean ostikoz botako du etxetik. Galtzaile baten ibili piperrak kontatzen dituen Kontrarioa nobela maiatzaren 7an aurkeztuko du Susa argitaletxeak.
maiatza
04
10
Patxi Zubizarretaren Eztia eta ozpina liburua izango dute hizpide maiatzaren 4an (asteartea) 19:15ean Leioako Liburutegian.
maiatza
04
10
Zazpiak bat eta Amerikako panpetan olerki ezagunen egilea, Pedro Mari Otaño, 1910eko maiatzaren 6an hil zen Argentinako Rosarion. Alkar liburuan bildu zituen 1904an bertso bi horiek eta beste 20 gehiago, baina baita ere Auntza larrera ipuin alegoriko ederra. Gaur Artzai mutilla operan ere jarriko dugu arreta. Otaño zizurkildarrak idatzi eta Felix Ortiz San Pelaio azpeitiarrak musikatutako obra da, 1900eko otsailaren 18an Buenos Airesko Victoria antzokian estreinatua (kantuan: Francisco Argote, Matilde Isasi, Luis Labadens, Matias Etxeberria, Laurak Bat-eko abesbatza). Artzai mutilla operak Patxikoren eta Maritxuren arteko amodiozko istorioa kontatzen duen arren, aldarrikapen politikoek hartzen dute mami nagusia. Martxoaren 11n kantuz zoriondu zuen Jose Mendiagek. Otañoren lan guztiak jasoak dituzu Klasikoen Gordailuan.
maiatza
03
10
Joxan Ormazabal idazle eta editorea hil zen maiatzaren 2an Zegaman. Joan den ostegunean, apirilaren 29an, aurkeztu zuen bere azken liburua: Ehun ipuin hitz gutxitan, Jon Zabaletaren irudiekin. Oso ezagunak egin ziren Ormazabalen liburuak 90eko hamarraldian: Pernando Amezketarra, Kittano edo Zipriztin. Hala ere bere lan guztien artean Ilunorduak eta argilaurdenak (2007) poema bilduma dugu guk gogoan, Elena Odriozolaren ilustrazioez edertua. Sautrela telebistako literatura saioak duela aste batzuk egindako bideozko erreportajearekin egingo diogu agur.
maiatza
02
10
Ilunpetik argira Gurutz Sarasola Lotsati poetari buruzko liburua aurkeztuko du Alvaro Rabellik maiatzaren 2an (igandea) 12:30ean Itsasondoko Sarasola Enean.
Api
29
10
Oier Guillanek Eskuen sustraiak errezitala egingo du apirilaren 29an (osteguna) 21:30ean Zarauzko Euskalduna tabernan.
Api
29
10
Hedoi Etxarte eta Alain M. Urrutiaren Ihes ederra eleberri grafikoaz jardungo dute apirilaren 29an (osteguna) 19:00etan Bilboko Foru Liburutegian, irakurleen txokoan.
Api
29
10
Edu Zelaietak Aldaira urdinak poema liburua aurkeztuko du apirilaren 29an (osteguna) 12:00etan Donostiako Udal Liburutegiko sotoan. Argitaldaria: Alberdania.
Api
28
10
Jurgi Kintanaren Urre urdinaren lurrina saiakeraz jardungo dute apirilaren 28an (asteazkena) 20:00etan Bilboko Txurdinagako AEKn.
Api
28
10
Bernardo Atxagaren Zeru horiek nobela aztertuko dute apirilaren 28an (asteazkena) 18:30ean Zarauzko Sanz Enea liburutegian. Gidaria: Ane Mayoz.
Api
28
10
Aingeru Epaltzaren Tigre ehizan nobelaz arituko dira apirilaren 28an (asteazkena) 18:30ean Arrasateko literatur solasaldietan (Kultur Ate). Gidaria: Mikel Ayerbe.
Api
28
10
Raul Zeliken Lagun armatua nobelari buruzko solasaldia egingo da apirilaren 28an (asteazkena) 19:00etan Basauriko Euskarabila elkartearen lokalean. Antolatzailea: Literaturia.
Api
28
10
Karlos Linazasorok Hamazazpikotan poema liburua aurkeztuko du apirilaren 28an (asteazkena) 11:00etan Donostiako Elkar aretoan.
Api
28
10
Aurten ehun urte dira Jean Etxepare medikuak Buruxkak liburua argitaratu zuela, 1910ean Toursko Mame inprimategian egina, aldizkarietan agertutako 23 artikulu bildu eta 2 berri idatzirik. Zabalkunde oso murritza izan zuen, zenbait irakurleri bi artikulu idatzi berriak gustatu ez-eta. Nor eskola-emaile / Zer irakats zen horietako bat, honela amaitzen zena: “Gobernamenduak ororen sakelatik atxik bitza mota guzietako eskoletxe andana bat (…) Apezak ken bitza eskolemailegotik, dela multzoan, dela bakarka”. Eta bestea Amodioa, Miarritzeko jatetxe bateko elkarrizketa honela abiatzen zuena: “Zer da, bazkari on batetarik lekora, emaztearekin gozatzeaz hoberik?”. Idazlea hil ostean, Buruxkak liburuaren bigarren argitalpena egin zen Piarres Lafitteren hitzaurrearekin 1936an Baionan, baina bi artikulu horiek gabe.
Api
27
10
Komuneko paperean errezitaldia egingo dute Imanol Epeldek eta Mattin Epeldek apirilaren 27an (asteartea) 19:30ean Arrasaten Kulturaten.
