MPK bildumak 10 urte
(Biziei ere omen)
Munduko Poesia Kaierak bilduma 2014an jarri zen martxan, mundu zabaleko poesia gurera ekartzeko helburuarekin. Hamar urteko ibilbide honetan, 50 poetaren lana ezagutzera eman du. Efemeridea ospatzeko, bilduman ohi ez dugun bezala jokatzea pentsatu dugu: biziei omen eginez.
Izan ere, MPKko kaierak antologiak dira; poeta baten lan osoaren argazki orokor bat eskaintzea dute xede. Poeta batek MPKn kaier bat izateko, hilda egon behar du. Hala, bada, orain arteko 50 kaieretan bidaide izan ditugun itzultzaileei bizien poesia itzultzeko aukera eskaini nahi izan diegu oraingoan, haiek aukeratutako poema bana. Esku artean duzun kaier hau da emaitza: 39 poeta, 39 poema, 39 itzultzaile. Italian hasi eta Nigerian bukatu, geografia urrun zein hurbiletan aritu dira bila gure 39 mandatariak: Iranetik Eskoziara, Asturiasetik Libanora, Haititik Vietnamera…
