CXVIII. KAPITULUA

Naaman sendatzen da.
Gieziren lepra

4. Er. 5.

        Siriako erregek zuen armadetako aitzindari bat Naaman zaritzona, eta zen hainitz ekharria haren alderat. Naaman hura zen gizon animotsu bat eta aberatsa; ordean lepra duna. Haren emaztea zerbitzatua zen neskatxa gathibu, Israelgo herritarik erkharria izan zenaz. Egun batez, sehi hark erran zion bere etxeko-andreari: nahi nuke ene nausia ager balakio Samaria hirian den profetari. Senda bide lezake bere lepratik. Naaman hurbildu zen erregeganat, eta mintzatu zitzaion hitz hautaz: Israelgo neskatxa batek hulako solas iduki du. Erregek ihardetsi zion: zohazi, iskribaturen diot Israelgo erregeri.

        Naaman lothu zitzaion bideari dirutze handi batekin. Samariarat heldu zenean, eman zion Israelgo erregeri Siriakoaren guthun, edo letra bat, hitz hauk zaduzkana: iskribatzen darotzut guthun hau, zu yakintsun egiteko nola egortzen darotzudan Naaman ene zerbitzaria, senda dezazuntzat bere lepratik. Israelgo errege, irakhurri orduko guthun hura, damustatua izan zen, eta erran zuen: Jainko bat naiz bada khentzeko eta emateko bizia? Ikhusten duzu, Jauna, Siriako errege, nondik enekin hautsiren duen hari dela. Eliseak yakin zuen gauza hunen berri; eta erran zuen: gizon hura yarraik bekit, eta yakin beza badela profeta bat Israelen.

        Naaman hedatu zen profetaganat. Haren etxeko athean zela, Eliseak gaztiagu zioen sar zadiela, zazpi-aldiz, Jourdaingo urean, eta sendaturen zela. Gaztigu hura gaitzitu zitzaion Naamani, eta erran zuen: usteko nuen agertuko zitzaitala profeta bera, eta ukiturik ene lepra, sendaturen ninduela, Jaunaren izenean: Damaseko urek balio ahal dituzte Israelgo ur guziak; eta ez bide dute indar gutiago erien sendatzekotzat. Naamanek hartu zuen bere herrirako bidea, zelarik guzia mindua profeta haren alderat: berekin zituen zerbitzariek erran zioten: Jauna, profetak manatu balarotzu egiteaz gauza nekhagarri eta borthitz bat, egin beharko zinduen: arren oraino hobeki erori behar zara haren nahitarat, erraten darotzunean: zohazi, sar zaite Jourdaingo urean, eta sendaturen zara. Naamanek sinhetsi zituen bere zerbitzariak. Sarthu zen, zazpi aldiz, ur hartan, eta sendatua izan zen.

        Orduan Naaman bihurtu zen yarraikitzen zitzaizkon yendeekin Jainkoaren gizonagana eta erran zion: orai ezagutzen dut ez dela lurraren gainean bertze Jainkorik Israelen dena baizik. Zure zerbitzariak ez du gehiago ofrendatuko holokaustarik Jainko atzeen ohoretan: haren sakrifizioak egiazko Jainkoarentzat izanen dire. Naamanek erakharri nahi izan zuen profeta hartzerat eskaintzen ziotzon emaitzak, nahiz erakutsi bere bihurkhundea; ordean profetak etzuen nahi izan deusere hartu. Naamanek egin ziotzon bere adiuoak, eta hastandu zen harenganik.

        Naaman ez zitzaion hain laster eman bideari, non Giezi profetaren zerbitzaria hasi baitzen bere buruari erraten: ene nausiak ez du nahi izan deusere hartu Naaman siriadarraganik. Banhoako ondotik: atherako dut zerbait harenganik. Erran bezala, zerbitzari hura abiatu zen Naamanen ondoan. Naamanek ikhusi zuenean zerbitzari hura harengana heldu zela, hurbildu zitzaion bera. Geizi hasi zitzaion erraten: ene nausiak zureganat egortzen nau, ziru adi-arazteko ethorri zaizkola bi mutli gazte etxerat, profeteen umeak direnak. Othoitzten zaitu egortzeaz enekin talent bat diru, erran nahi da, dirutze handi bat, eta bi soineko. Naamanek ihardetsi zion profetaren zerbitzariari: hobe da talent baten orde, har ezatzun bia. Eman ziotzan soinekoak ere, eta hauk guziak egorri zituen bi zebitzariekin. Giezik eman zituen diru eta soineko hek etxe batean; eta egorri zituen bidetik Naamanek zerbitzariak.

        Giezi bihurtu zenean etxerat, Eliseek galdegin zion: Giezi, nondik heldu zara? Jauna, ihardetsi zuen Giezik, zure zerbitzaria ez da nihon ibilhi. Zertako, erran zioen bere nausiak, ukhatzen duzu gauza, ikhusi ez banu bezala Naaman zureganat hurbiltzen? Diru eta soineko hartzen hari izan zare. Beraz erosi gogo duzu batzuen eta bertzeenganik, idi, arthalde, mahatsti eta hulako bertze ontasunak: bada, yakin zazu Naamanen lepra behin bethikotz zure, eta zure umeen baitan izanen dela. Ordu berean, Giezi urrundu behar izan zen Elisearenganik lepraz guzia maldatua.

        Jourdaingo urak izatea Naaman bere gorphutzeko lepratik sendatzeko ahala zerbeit da, hainitz ere da; ordean aithor dezagun arimako lepratik sendatzea, hari leheneko garbitasun guzia izan-araztea, infinituki gehiago dela. Horra bizkitartean penitentziako sakramenduari datxeikon berthute zorionezkoa eta guziz miragarria. Ez dugu zeren ibilhi, Naaman bezala, lekhu urrunetan edireteko senda gaitzaketen erremedioak. Aurkhitzen dire lekhu guzietan Eliseak eta ithurri sakratuak, gure arimak bere gaitz guzietarik sendatzeko indar guzia berekin dakharketenak.

        Gaitz guziak kaltiar dire, eta ez gutienik, diruaren alderako amodio sobraniazkoa: lekhuko Giezi, Elisearen zerbitzaria.