XXXIV. KAPITULUA

Jakob doha Ejiptorat

Genes. 46.

        Josefen anaiak bihurtu zirenean Ejiptotik, eta eman ziotenean Jakobi berria Josef haren semea bizi zela, eta bothere handi bat zadukala erresuma hartan, gizon saindu hura yarri zen asupimenduan. Hartarik altxatu zenean, eta yakin zuenean xehekiago Jainkoak zer egin zuen haren semearen alderat, hartu zuen xedea heltzeko harenganat, eta eramateko berekin batean bere egokia, edo familia guzia. Ilki gabe bere herritik, ofrendatu ziotzan Jainkoari sakrifizioak. Lotan zatzala, Jainkoak erran zion Jakobi: Ni naiz zure aitaren Jainko botheretsua; ez izan deuseren beldurrik: zohazi deskantsuki Ejiptorat, yarraikiren natzaitzu nahiz haratekoan, nahiz hunatekoan. Orduan Jakob eman zitzaion alegeraki bideari, ikhustekotzat munduan gehien maite zuena. Josefek entzun zueneko bere anaia batenganik, Jakob hurbiltzen zela, athera zitzaion berehala biderat Jesengo bazterretaraino; ikhusi zueneko bere aitaren xarriota, edo karrosa iduria hurbiltzen zela, yautsi izan zen beretik besarkatzekotzat bere burasoa. Bozkarioak mututu zituen bata nola bertzea: egon ziren, aphur handi bat, elkharri lothuak hitzik erran gabe. Bozkariozko seinale hauien ondoan, eta uztekabeko elkhar ikhuste hark isur-arazi ziotzotenean plazerezko nigarrak dela aitari, dela semeari, Josefek eraman zuen Jakob Faraon erregeganat bere salutantzia egin ziozantzat. Haren nahia zen guziak elkharrekin bizitzea Ejiptoko herri zenbaitetan, ejiptoarretarik berex: bere handitasun guziaren erdian, erakharri zituen, ahalkerik gabe, bere aita eta bere anaiak erraterat erregeren aitzinean, ejiptoarrek higin zuten ofizio batetakoak aurkhitzen zirela, erran nahi da, artzainak zirela; ardietsi zuten Faraonganik bere egoitzatzat Jesengo lurra, eta etzuten eskasiarik ikhusi gosetearen partetik. Molde huntan, probidentziari eta Josefen bihotz ontasunari esker, izan zen begiratua Israelgo populu handia, ordu hartan, hirur hogoi eta hamar presunetan zatzana. Horra, dio San Krisostomek, Jainkoak nola erregelatzen dituen gauza guziak bere maiteen fagoretan. Aldizkatzen ditu miragarriki heien onak eta gaitzak: batean, egortzen diotzate atsekabeak beldurrez sobera altxa daiten bethi nahikaretan izanez; bertzean, egortzen diotzate konsolazioneak arintzekotzat nahikabeen karga pisua. Probetxos gerthatu zen Jakobentzat aphur batetako galtzea Josef, bere semea, eta orobat izan zen probetxos Josefentzat bere aitaganik hastantzea. Ala elkhar bathzean izan zuten atseginaren gaindidurak laster borratu baitzituen bataren eta bertzearen penak! Aithor-agun hemen baldin ejiptoarrek ungi ekharri balin bazituzten, arte laburrez, Jakoben umeak, hala-hala gerorat yazarri izan ziotela dorphetasun handirekin. Populu infidel hark agertu zuen heien alderat barbarotasunak asma ahal zezakeien errabia guzia.

        Elizako aiteek diote Ejiptoa, erran nahi da, mundua, beldurtzeko dela egiazko Israeldarrentzat. Zer nahi itxura eder eta lausengu handi duketeien mundutiarretarik, ez dute zeren behin ere hetan fidatu: goiz edo berant, bethi ezaguturen dute kaltiar dela mundupean ibiltzea, ezin bertzez ere. Frogaturen dute bethi beldur izan behar dela Ejiptorat daraman goseteaz.