17. KAPITULUA

Jesusen Gorputz Sainduaren
hartzeko gutizia biziaz
eta haren alderako amodio khartsuaz.

        1. ARIMAK. Khartsutasun handien eta amodiorik beroenarekin, nola nere baitarikako oldar bizienarekin nahi zitut bihotzeratu, hain maite zinituen eta hain khartsu ziren sainduek eta arima onek bihotzeratu nahi ukan zituzten bezala. O nere Jainkoa, bethiereko amodioa, nere ontasun guzia, dohatsutasun mugarik gabekoa, bihotzeratu nahi zitut, edozoin sainduk egundaino ukan duen eta duken gutizia beroenarekin eta jauspen handienarekin.

        2. Eta amodiozko sendimendu hoitaz jabetzeko on ez nizan arren, bizkitartean bihotzeko khar guzia eskaintzen dautzut, laket zaizkitzun gutizia bero hoik nihauren baitarik banitu bezala. Arima khartsu batek asma eta gutizia ditzazkeenak oro, jauspen handienarekin eta bihotzaren erditik eskaintzen dauzkitzut. Ez dut neretzat deusik atxiki nahi, bainan nizan guzia eta ditutanak oro nere burutarik eta gogotik dauzkitzut emaiten.

        Nere Jainko Jauna, nere Kreatzalea eta Salbatzalea, bihotzeratu nahi zitut egun, doazkitzun khartsutasun, jauspen, ospe eta ohorearekin, doazkitzun ezagutza, garbitasun eta kharrarekin, doazkitzun fede, esperantza eta amodioarekin: Andre dena Maria zure Ama sainduak gutiziatu eta bihotzeratu zinituen bezala, aingeru mezulariari umilki eta khartsuki hunela ihardetsi ziolarik: Huna Jaunaren neskatoa, gerta bekit zuk erranaren arabera.

        3. Hala nola zure Aitzinlari dohatsu Joanes Batista, sainduetarik handiena, bere amaren sabelean zelarik oraino zure aitzinean bozkarioz jauzi baitzen Izpiritu Sainduaren bertutez; hala nola geroxago hak berak, umiltasun handienarekin eta amodio khartsuenak errea, Jesus gizon batzuekin zoala ikustearekin baitzion: Jaun esposaren adiskidea, haren lagun fina dena eta haren entzuten dagona, bozkarioz da bozten jaun esposaren mintzoa aditzen duelakotz, —halaber nik ere nere barnea holako gutizia bero eta sainduekin sustatu nahi nuke eta nizan guzia zuri eskaini bihotzaren erditik.

        Hortakotz arima khartsu guzien bozkarioak, heien amodio bizia, othoitzean zure begiresteko ukan dituzten grazia bereziak, heien zerutikako argi eta ikusmenak eskaintzen dauzkitzut eta aitzinerat emaiten, izaite guziek beren bertuteen bidez zure goresteko zeru-lurrean eman eta emanen dauzkitzuten ohore guziekin; eskaintzen dauzkitzut bai neretzat, bai nere othoitzak galdatu eta nahi dituzten guzientzat, orok gorets zitzaten zor zaitzun bezala eta ohora menderen mendetan.

        4. Onharzkitzu othoi, Jauna, zu guziek ohoratua eta goretsia ikusi beharrez ditutan nahikariak, zure ezin erranezko handitasunak hartze duen bezala. Ohore hoik bihurtzen dauzkitzut eta bihurtu nahi egun oroz eta ordu guziez; halaber zeruko aingeru eta saindu guziak, bai eta giristino on guziak, bihotzaren erditik ditut esker eta ohore zuri bihurtzerat deitzen eta minki othoizten.

        5. Gizadi, gizaki, mintzai guziek gorets bezitzate; bozkario handienarekin eta khartsutasun bizienarekin ospa bezate halaber zure Izen Saindu gozoa.

        Meza Saindua khartsuki eta jauspenekin emaiten duten guziek eta zure Gorputz Saindua fede oso batekin hartzen dutenek, zure ganik ardiets bezate grazia eta urrikalmendu eta nizan bezalako bekatorearentzat minki othoitz egin. Eta noiz ere, zurekin bat egin ondoan tirria zuten bezala, bihotza gozoz igeri eta azkar mahain saindutik itzuliko baitira, othoi orhoit bedite nitaz, nizan bekatore dohakabeaz.