37. KAPITULUA

Nork bere buruari osoki eta zinez uko egiteaz,
bihotzeko lokarri guzien haustekotz.

        1. JESUSEK. Nerf haurra, zure buruari uko egiozu, eta kausituren nuzu. Ez egin sekula hauturik ez berexkuntzarik, ez izan deusen jabe; eta irabazitan izanen zira bethi. Ezen, zuretzat deusik atxiki gabe zure buruari uko egiten diozun ordutik, grazia handiago bat duzu ardietsiren.

        2. ARIMAK. Jauna, nere buruari zonbat aldiz behar diot egin uko? Eta zertan?

        JESUSEK. Bethi eta edozoin tenorez; gauzarik ttipienetan nola handienetan. Deusik ez dut berexten; zu ganik nahi dutana da, zeure ez ziten gehiago izan den gutienik. Nola zitazke nerea, eta ni zurea, zure nahikundeak ez baditutzu kanpoz eta barnez uzten? Zonbat lasterrago baituzu egiten hori, hanbatez ere zitazke hobeki; zonbatez osoki eta zinez uko eginen ere baitiozu zure buruari, hanbat ere zitut nik gehiago maitaturen eta aberasturen.

        3. Badira beren buruari uko egiten dutenak, bainan berentzat zerbait atxikiz: ez direlakotz Jainkoari bermatzen osoki, beren zurruburruetan derabilate gogoa. Bertze batzu, aldiz, osoki niri emaiten dira hastetik; bainan gero, tentazionea jitearekin, beren zeretarat itzultzen, eta hortakotz bertutean arras guti aitzinatzen.

        Holakoek bihotz garbien egiazko libertatea eta nere adiskidetasun gozoaren grazia ez dute ardietsiren: non ez duten beren burua osoki nere gain uzten eta egun oroz nekatzen, hori gabe ez baita eta ez baititake nerekilan gozamenezko batasunik.

        4. Hamar aldiz erran dautzutana errepikatuko dautzut: zure buruari uko egiozu, eman zakizkit osoki, eta bihotzean bake nasaia dukezu. Emazkidatzu oro, ororen ukaiteko; deusen ondotik ez ibil; ez galda deus: niri bakharrik atxikian egon azkarki, eta, nitaz jabetuko zira. Zure bihotza orduan izanen da libro eta ilhuntzen duten hedoietarik garbi.

        Hauxe ukan zazu nahikari, hauxe bilha eta othoitzean galda ditutzun guziez buluzirik Jesus buluziari jarraikitzea, zeure buruari hiltzea eta neretzat bethi eta bethi bizitzea. Orduan suntsituren zaizkitzu gogoeta hutsal guziak, asaldadura tzarrak eta behar gabeko griñak. Orduan ere itzaliren behar gabeko beldurrak eta bihotzeko nahikeria makurrak.