56. KAPITULUA

Gure buruari behar diogula uko egin,
eta kurutzearekin Jesusi jarraiki.

        1. JESUSEK. Nere haurra, zeure buruari zonbat ere baitiozu eginen uko, hanbatez zira ni baitan sarturen. Hala nola bihotzean bakea baitauka kanpotik deus gutiziatzen ez duenak, halaber, bere buruari uko eginez da nor-bedera batzen Jainkoarekin. Nakaizdurarik eta errangurarik gabe nere nahi sainduaren egiterainokoan, zeure buruaren erdeinatzen nahi dautzut erakatsi.

        Jarrai niri: ni niz bidea, egia eta bizia. Biderik gabe ezin aitzina; egiarik gabe ezin ezagut; bizigailurik gabe ezin bizi. Ni niz hartu behar duzun bidea; ni, sinetsi behar duzun egia; ni, iguriki behar duzun bizia. Ni niz bide zuzena; ni, lehen eta azken egia; ni, egiazko bizia, bizi dohatsua, bere baitarikako bizia. Nere bidean balin bazaude, egia ezaguturen duzu; eta egiak zure buruaren jabe ezarriko zitu, eta bethiereko bizia duzu ardietsiko.

        2. Nerekin bizitzerat heldu nahi bazira, jarrai nere manamenduer. Egia nahi baduzu ezagutu, sinets ni baitan. Osoki saindutu nahi bazira, sal oro. Nere ondotik jin gogo bazira, egin uko zure buruari. Bizi dohatsuaz nahi bazira jabetu, erdeina oraiko bizia. Zerurat altxatu nahi bazira, umilia mundu huntan. Erreginatu nahi baduzu nerekin, ereman nere kurutzea. Kurutzearen zerbitzariek dute bakharrik zorionaren eta egiazko argiaren bidea kausitzen.

        3. ARIMAK. O Jesus Jauna, munduak erdeinatzen duen bizi hertsia ereman duzunaz geroz, emadazu, othoi, mundua oinkatuz zuri jarraikitzeko grazia. Sehia, ezen, ez da bere nagusia baino gehiago, ez eta haurra bere erakaslea baino gorago.

        Zu bezala bizitzerat ar bedi zure zerbitzaria, hartarik baitu bere salbamendua eta egiazko saindutasuna. Zure biziaz kanpo irakurtzen edo entzuten ditutan guziak ez dautet atsegin ez zorion osorik emaiten.

        4. JESUSEK. Nere haurra, gauza hoik oro badazkitzunaz geroz, dohatsu zu, egiten baditutzu. Nere manamenduak ezagutzen dituenak eta begiratzen, hak nu maite. Eta nik ere maitatuko dut hura, nere burua hari agertuko diot eta nerekin dut jar-araziko nere Aitaren erresuman.

        5. ARIMAK. Jesus Jauna, zure erranaren, zuk hitzemanaren arabera egina izan bedi: zuri esker, negurririk gabeko zorion hartaz izan nadila gai. Zure eskuetarik hartzen dut, ba hartzen, kurutzea; eremanen dut, ba eremanen zuk nahi ukan duzun bezala, hil artio.

        Zinez, jainkotiarraren bizia kurutze bat da, bainan zeruko osperat deramana. Abiatu niz; gibel egiterat ez niz haizu; gelditzerik ez dut.

        6. Ea, aneia maiteak, goazen elgarrekin: gurekilan izanen da Jesus. Jesusen gatik dugu hartu kurutzea, Jesusen gatik dezagun ereman bururaino. Jesus izanen da gure laguntzalea, gure aitzindari eta biderakusle den bezala. Horra gure Erregea aitzinean doakigula; gure alde joko du haren besoak. Garraizkiola gizonki; nehor ez bedi izi; gauden gogo bethez galtzeari gudu hortan; bainan ohorea ez dezagun beltza, Kurutzeari ihes eginez.