44. KAPITULUA

Kanpoko zerek ez gituztela beretu behar.

        1. JESUSEK. Nere haurra, asko gauza jakin gabe behar zira egon eta munduarentzat hila bazina bezala bizi, mundua zuretzat ez balitz bezala. Beharriak hetsirik ditutzu entzun behar asko solas, eta bakea dakarketen gauzak gogoan erabili.

        Hobe duzu laket ez zaizkitzun gauzetarik begien baztertzea, eta nor bere gogoan dituenekin uztea, harekin kalapitan artzea baino. Jainkoarekin ontsa bat egiten baduzu eta haren jujamenduez orhoitzen bazira, errexki jasanen duzu bertzeen azpiko egoitea.

        2. ARIMAK. O Jauna, zertaratuak gira? Galtze iragankor batentzat nigarretan gaude, irabazi xume batentzat lehertzen gira eta lasterka gabiltza, arimako kalteak aldiz ahantzirik dauzkagu, edo gure baitan ez gira berant eta doi-doia baizik sartzen. Gutirentzat edo deusetako baizik ez dugun zerbaiti begiak xurituak eta baitezpadako ginukeena dugu bazterrerat uzten, gizona kanpoko zeretarat ixuria dagolakotz dena; bai eta, bere baitan ez delakotz berehala sartzen, han delakotz atseginekin gelditzen ithorik.