51. KAPITULUA

Obra handientzat on ez dena,
ttipietan egon behar dela.

        1. JESUSEK. Nere haurra, bertuteari buruz ez dezakezu bethi berotasun bera atxik; ez zagozke ere bethi khartsutasunaren ozka berean: noizean behin, sortzez eta izaitez makurra zirelakotz, nahit'ez zira jautsiren beherago, eta zure bizi galkorraren hazta ezinbertzez eta hasperenka duzu jasan beharko. Gorputz hilkor hori deramazuno, unhadura eta bihozmin asko badukezu. Gorputz hori baduzuno, gorputz horren haztak maiz auhenkaraziko zitu, bihotza hertsatzen dautzula, ez baitzitu arimako zeretan geldi-geldia utziko, ez eta Jainkoaren behin bethikotz begiresterat.

        2. Orduan dukezu on, orduan, kanpo lanpide xumeetarat ihes egitea; obra on zonbaitetan zure gogoaren jostatzea; fidantza handienarekin nere ikustaldiaren aiduru egoitea; jabaltzerat itzuli ez nitzaitzuno, zure bihotzeko agorraren eta arrotzaren pazientziarekin jasaitea. Itzuliko nitzaitzu bada segur. Nekeak ahantz-araziko dauzkitzut. Gozaraziren zitut bihotzeko bakeaz. Zabalduren dauzkitzut Liburu Sainduetako alhor bihitsuak: bihotza zorionak hanturik nere manamenduen bideari abia ziten lasterka. Eta erranen duzu: Bizi huntako minak ez dira, egun batez agertuko zaitan ospearen bethe.