28. KAPITULUA

Mihi gaixtoer nola iharduk.

        1. JESUSEK. Ez khexa, nere haurra, nork edo nork zutaz gogoeta gaixtoak alhatzen baditu, edo mintzo bada laket ez zaitzunaz. Zeure burua gutiestekoago duzu oraino zuhauk; sinesteko duzu zu baino arimaz markitsagorik ez dela nehor. Egiazki khartsu bazira bihotzez, axola handirik ez dukezu haizeak deramatzan hitzez.

        Egun beltzetan ixilik egoitea eta bihotzez niri buruz itzultzea, zure bihotza jendeen erranek nahasterat ez uztea: hori zuhurtzia, eta ez ttipia.

        2. Zure bakea ez jar sekula jendeen aho-mihietan: ezen, zutaz ontsa mintza ditezen ala gaizki, ez zira bertze gizon bat hargatik. Non dira egiazko bakea eta ospe egiazkoa? Ez othe ni baitan?

        Gizoner atsegin egiterat edo ez egiterat kilika ez dena, bake nasaienaz da gozaturen. Zure bihotzeko griñen eta barreiaduren erroa, zure buruaren amodio makurra eta jendeentzat duzun beldur zoroa.