25. KAPITULUA

Zeri datxizkon bihotzeko bake osoa
eta arimaren egiazko aitzinamendua.

        1. JESUSEK. Nere haurra, erran dut: Bakea uzten dautzuet, nere bakea emaiten dautzuet, bainan ez munduak emailen duen aran.

        Bakea orok nahi, bainan nondik nola bil nehor guti axolatzen. Nere bakea umilentzat eta bihotz eztientzat. Zure bakea pazientzia handi bati datxiko. Entzuten banuzu eta nik erranari bazarraizkio, bake nasaiaz gozatzen ahalko zira.

        2. ARIMAK. Zer duket egiteko bada?

        JESUSEK. Gauza guzietan gogo emazu zer egiten duzun eta zer erraiten; ez bertze lehiarik ukan nihauri atsegin egitea baizik. Ez gutizia deus, deus ez bilha nitaz bertzerik. Bertzeen solasen edo obren kitzikatzeratez ausarta; zure gain ez diren zeretan ez sar: hola guti edo bakan zaitzu nahasiko bihotza. Bizkitartean nahasdurarik batere ez ukaitea, gorputzean edo bihotzean atsegabe bihirik ez jasaitea, ezin ditake hori lurreko bizian, bainan xoilki bethiereko bakean.

        Ez uste ukan beraz egiazko bakea kausitu duzula, nahigaberik batere ez duzulakotz; ez eta guziak ontsa doatzila, ez duzulakotz etsai bihirik; ez eta bertutearen goienerat heldua zirela, oro punperat jiten zaizkitzulakotz; begira zite urgoitzetik, buruan sartzetik Jainkoak molde berezi batez maite zituela, khartsutasun gozo batean bizi zirelakotz: bertutea nork nola maite duen ez da hoitarik ageri, ez datza hor arimako aitzinamendua eta gizonaren saindutzea.

        3. ARIMAK. Zertan bada, Jauna?

        JESUSEK. Saindu zitazke, nere nahiaren meneko gogotik jartzen bazira; deusetan, ttipi ala handi, orai ala gero, zure ona bilhatzen ez baduzu; eskerrak bihurtzen dauzkitatzula begitarte on berarekin, eta oro gogotik jasaiten ditutzula, on ala tzar.

        Bihotzeko gozoaz gabetua izanikan ere, esperantza aski azkar eta gogor balin badaukazu bihotzaren aphaintzeko nahigabe bortitzagoen jasaiterat; zure burua xuritzen ez baduzu gaitz hoik merezi ez bazinitu bezala; bainan, zer-nahi gertaturik ere, saindua eta zuzena nizala aithortzen baduzu, orduan zira bide zuzenean, egiazko bakerat deraman bidean, eta duda-mudarik gabe igurikatzen ahalko duzu nere begitartea berriz ikusiko duzula bozkariorekin.

        Zure buruaren osoki gutiesterat heltzen bazira, jakin zazu orduan zirela bake nasaienaz gozatuko, lur huntan egin ditaken bezanbatean.