47. KAPITULUA

Nahigaberik handienak behar direla jasan
bethiereko biziaren irabazteko.

        1. JESUSEK. Ez lotsa, nere haurra, neretzat hasiak ditutzun lanetan; ez etsi den gutienik, heldu zaizkitzun atsegabeetan; bainan, zer-nahi gertaturik ere, nere agintzak azkar bezitza eta altxa. Nehoren beharrik ez dut, negurririk gabe zure saristatzeko.

        Mundu huntan ez zira luzaz nekaturen, bihozminek ez zituzte leherturen bethi. Aphur bat igurika zazu, eta zure gaitzak bururatzen ikusiko ditutzu laster. Tenore bat jinen da, zure lanak eta nahasdurak bururatuko baitira. Egunekin batean itzaltzen direnak oro, gauza guti dira eta guti dute irauten.

        2. Egin, egiteko duzuna; nere mahastian ar lanean leialki: nihau izanen niz zure saria. Idaz, irakur, kanta, ar oihu-minka, egon ixilik, egin othoitz, nahigabeak jasan gizonki: bethiereko biziak gudu hoik oro eta handiagoak balio ditu. Bakea jinen zaitzu, Jainkoak dakien egun batez: orduan ez da orai bezala egunik ez gauik izanen, bainan bethi argia, bethi iguzkia, bethi bakea eta pausu geldi bat.

        Ez duzu erranen orduan: gorputz hilkor huntaz nork gabetuko nu; ez eta oihu eginen: oi zer nere zorigaitza, oi nere desterruaren luzea! Ezen herioa leizerat aurtikiren du Jainkoak, eta zoriona ezin galduzkoa izanen da; orduan auhen bihirik ez, bainan bozkario dohatsu bat; orduan gozotasuna eta ospea, biak elgarrekin.

        3. O! sainduen koronak ikusten bazinitu zeruan! Munduak lehenago, bizitzeko gai izan ez balira bezala, zangopean zauzkanak, zer ospearen eta bozkarioaren jabe diren orai bazinaki, segur abian lurreraino aphal zintazke, eta nahiago zinuke guzien azpiko jarri, bati berari manatzea baino. Mundu huntako atseginak ez zinitzazke gutizia ere: Jainkoaren gatik zerbaiten jasaiteaz ba, bazinuke atsegin; eta jendeen artean ezdeustzat hartua izaitea irabazietan handiena litzaitzuke.

        4. O! egia hoik goxo balitzaizkitzu eta bihotzaren zolaraino sar bazinitza, nondik zinuke behin erranguratzeko kopeta? Neke guziak ez othe dira jasaitekoak, bethiereko biziaren irabazteko? Jainkoaren erresumaren galtzea edo irabaztea ez ahal da?

        Altxa beraz begitartea zeruari buruz: han nago ni; nerekin han daude mundu huntan azkarki gudukatu diren saindu guziak. Orai bozkarioetan hek, orai atseginetan, orai beldur guzietarik atherbean, orai pausuan; eta menderen mendetan nerekin egoitekoak nere Aitaren erresuman.