10. KAPITULUA

Komunione saindutik ez girela
hala hula baztertu behar.

        1. JESUSEK. Maiz joan behar zira graziaren eta urrikalmenduaren ithurbururat, oneziaren eta garbitasun osoaren ithurbururat, zure jaidura tzarretarik eta bekatuetarik sendatzekotz: azkarrago, erneago iharduk dezazun debruaren oldarrer eta zure burua zaint haren sare-ukaldi ixiletarik. Etsaiak, komunione sainduan zer ondorio onak darraizkon eta komunionea zer sendagailu gaitza den badakielakotz, bere zazpi egin-ahalez bermatzen da giristino khartsuen mahain saindutik baztertzerat eta urruntzerat.

        2. Komunione sainduaren egiterat doatzilarik dituzte, alabainan, batzuek tentazione bortitzenak jasaiten debruaren ganik. Aingeru tzar hau, Job sainduak zion bezala, Jainkoaren haurren arterat dathor, bere ohiko maltzurkeria herratsuaz heien nahasterat, izitzerat, herabetzerat, heien kharraren ttipitzerat edo fedearen kordokatzerat, komunione sainduari uko egin dezoten edo mahain saindurat epheltasunekin ditezen hurbil.

        Bainan haren maltzurkeriaz eta hak egorri gogoeta tzarrez, hok nahi bezain izigarriak eta lizunak izanikan ere, ez duzu zeren axola: kaskoari behera aurtizkiotzu denak. Aingeru ahalgegarri hori erdeinatu behar duzu eta trufatu; haren tarrapatek nahi bezanbat nahasirik ere, ez duzu zeren komunione saindua utz.

        3. Komunione sainduak maiz poxelu du ere khartsu beharrez dukezun griña handiegia eta kobesatu nahiz dukezun keska. Egizu jende zuhurrek errana eta utz behar gabeko keskak eta griñak: Jainkoaren graziari poxelu egiten diote eta bihotzean kharra dute ezeztatzen.

        Ez utz komunione saindua, aphur bat nahasia zirelakotz eta kontzientzian baduzulakotz zerbait errangura; bainan kobesa zite lehen bai lehen eta bertzeek egin dauzkitzuten laidoak barkazkiotzute gogotik. Zuhauk norbaiti hoben egin badiozu, umilki galda zozu barkamendu eta Jainkoak gogotik barkaturen dautzu.

        4. Kobesioaren edo komunionearen luzatzeak zer duke onik? Bihotza garbi zazu lehen bai lehen, aurtik laster pozoina. Sendagailuaren hartzerat ernatuz, bethi luzatuz baino hobeki zoazke. Egun aitzakia baten gatik gerorat uzten baduzu, bihar orobat handiago batek zitu gibel-araziko; hola luzaz egon zitazke komuniatu gabe eta komuniatzeko geroago utiago zinitazke on.

        Zure oraiko epheltasuna eta nagikeria inharroskitzu lehen bai lehen griñaturik eta nahisirik luzaz egoiteak deus, onik ez du, traba batzuek mahain saindutik urrun atxik zitzaten ere ez. Aitzitik, komuniatu gabe luzaz egoitea kaltekor duzu biziki, nagitasun handi bat darraio bethi kasik.

        Oi deitoragarria! giristino ephel eta ezazol batzuer estakuru guziak on zaizkote kobesatu gabe egoiteko luzaz eta ondorioz komuniatu ere gabe, bere buruaren hobeki zaintzeko beharretan ez izaitea gatik.

        5. Nigar-egingarria! Komunione saindutik hoin errexki urruntzen direnek, zoin guti nuten maite, eta zoin guti diren khartsu! Zoin den dohatsu eta Jainkoak zonbat duen maite, bihotza bethi zilhar daukan gizona, hain zilhar non egun oroz komuniatzeko on baita, gogotik komunia bailezake ere, haizu balitz eta bertzeak ohartu gabe egiten ahal balu!

        Norbait artetan komuniatu gabe balin badago umiltasunez edo zerbait aitzakia zuzenez, ohore hari, Sakramendu horrendako duen jauspenarentzat. Bainan epheltasunez badago mahain saindutik urrun, bere burua behar du akulatu eta bere ahal guziaz aitzinerat urrats egin. Jainkoak lagunduko du haren nahikundea, nahikunde onari baitu bereziki behatzen Jainkoak.

        6. Ez komuniatzeko zerbait aitzakia zuzen ukanikan ere, komuniatzeko nahikari eta ona balin badu norbaitek, ez da sakramendu horren ondorio onez gabeturik egonen. Alabainan giristino jarraiki edozoin egun oroz eta tenore guziez komunia ditake gogoz, eta komunione horri ondorio hoberenak datxizko; bizkitartean, egun batzuez eta behar orduetan, amodio eta jauspenekin behar duzu Salbatzalearen Gorputz Saindua egiazki bihotzeratu, zure atsegina baino gehiago Jainkoaren ohorea eta ospea bilhatzen ditutzula.

        Inkarnazioneko misterioa eta Jesusen oinhazeak gogoan derabiltzan aldi oroz, halaber Jesusen amodioak bihotza sustatzen dion aldi guziez, gogoz komuniatzen da giristino bat eta ikus ez dezaken grazia batek azkartzen du.

        7. Besta buruetan edo komuniatzea ohi duen egun batzuetan baizik bere bihotza aphaintzen ez duena, ardura erdi-larre izaiten da komuniatzeko. Dohatsu, bere burua osoki ezeztaturik Jainkoari emaiten diona, meza emaiten duen edo komuniatzen den aldi oroz!

        Meza emaitean ez izan zaluegi ez hurriegi, bainan atxik zure herritarrer doakoten izar¡ ona. Ez zira bertzeentzat akitgarri ez lotsagarri behar, bainan ba buruzagiek manatu malda erditan duzu egon behar; ikusiz, ez nondik duken gozo gehiago zuhauren bihotzeko kharrak, bainan nola ditaken hobe jendearen harat-hunatentzat.