HAMEKAGARREN KAPITULUA

Bakearen ardietstean, eta aitzinamendu espiritualaren desiraz.

        1. Bake handi batez goza ahal gindeske nahi ezpagendu sartu bertzeren erranetan, eta egitekoetan zeinek ezpaigaituste ukitzen.

        Nolatan luzeki dagoke bake bertzeren egitekoetan balsatzen dena? kanpoan okasione bilha dabillana? Guti edo gutitan bere baitara biltzen dena bere buruaren ezagutzeko?

        Doatsu dira sinpleak zeren bake handia izanen dute.

        2. Nondik saindu batzuk hain bertze perfekzione ardietsi dute, eta hain izan dire argituak zeruko gauzetan? Zeren hekin lan guzia izan baita lurreko guthiziak osoki hiltzea bere bihotzetik, eta hargatik arimako indar guziez itxeki ahal diote Iainkoari, eta egon ahal dira traburik gabe bere barrenaren errekaitatzen.

        Gu sobera gatxeste gure pasionei eta ioaiten diren gauzez sobera ansiatzen gara.

        Gutitan osoki garaitzen bagaisko bizio bati, gutitan pitsten gare egunorozko aitzinamendura espiritualara, halatan gelditzen gara hotz eta epel.

        3. Gure baitan osoki hillak bagine eta barrenean koropillatuak ezpagine, orduan Iainkoare gauzak dasta ahal genetzake, eta zerbait froga giniroke zeruko eztitasunen kontenplazionetik.

        Trabu guzia eta den handiena da, zeren ezgaren pasionetarik eta guthizietarik libratuak eta zeren ezgaren enseiatzen Sainduen bidean sartzera.

        Ondikorik gutiena gertatzen zaikunean lasteregi erorten gare, eta munduko konsolazionetara itzultzen.

        4. Baldin gizon sendoak bezala enseia bagindez gure ahalaz guduan fermu eta finko egoitera segur ikus genezake Iainkoa zerutik heldu dela guri laguntzera.

        Hura prestik baitago guduan hari direnei eta haren baitan esperanza dutenei heltzera, nola berak bilhatzen baiterauzkigu gudukatzeko okasioneak garai gakizten gatik.

        Iainkotiartasunaren aitzinamendua emaiten badugu xoilki kanpoko zerimonietan, sarri fin hartuko du gure debozioneak.

        Bainan aizkora eman dezagun errora arren pasionetarik garbiturik bakezko bihotzaz goza gaitezin.

        5. Urthetik urthera xoilki bizio huts bat athera bageneza errotik, laster gizon perfet egin gindezke.

        Bainan orai kontra da, eta hainitzetan sentitzen dugu hobeago eta garbiago ginela Iainkoaren serbitzura lehenbizi itzuli ginenean, ezenez hainitz urthez geroztiko botuaren ondoan.

        Egun oroz behar genduke berokiago debozionean aitzinatu, bainan orai badirudi gauza handia dela nihork guti bat iduki ahal baleza bere lehenbiziko bero hartarik.

        Aphur bat borxa bageneza gure burua, nahiz den guzia gero bageneidike errazki eta alegeraki.

        6. Gaitz da leheneko ohitzaren utztea, baina gaitzago da bere borondatearen kontra iartzea.

        Ordea garaitzen ezpazaizte gauza aphurrei eta arinei, noiz garaituko zaizte gaitzenei?

        Iar zaite hastetik zure inklinazionearen kontra, eta ahants bekizu zure aztura gaixtoa, beldurrez aphurka zaramatzan gauza gaitzagoetara.

        O ikus bazeneza zein bake handi ardiets zenezaken, eta nola bozkario eman ziniezeken lagunei zure prestuki bizitzeaz, uste dut ansiatsuago zinatekeiela zure probetsu espiritualaz.