Maria txito santeari
bere jaiotzako egunean

Eiten bajako mundura jaio

        Oi dan danari,

Bere jaiotzan poztasunezko

        Igarria,

Esker ta doez aberatsago

        Datorrenari,

Berez zor jako dagokan mallan

        Jaialdia;

Jaio ezkero parebaga bat

        Orain lurrean,

Jaio ezkero emakumeetan

        Esleidua,

Jaiotz onegaz danok guztiok

        Poztu gaitean,

Eldu dalako gura zan egun

        Doatsua.

Ze mirari da lurra guztia

        Zoratutea,

Alako egun-senti eder au

        Jaiotean?

Ze mirari da Zerua pozez

        Gañeztutea,

Jese-n Landara argidotar au

        Ikustean?

Errazoiagaz alegeratu

        Zara Zerua,

Egilleari, kantaurik kanta

        Aiñ ederrak,

Lora danakaz agertu zaite

        Lurra apaindua,

Eguzki onek merezi ditu

        Danen txerak.

Jatsi, gaur jatsi zaite egodun

        Goiko taldea,

Baratz usaintsu atsegiñetan

        Bizi arren,

Jatsi, bai jatsi galantago dan

        Kriaturea,

Ikusitera zelan jaio dan

        Nazareten;

Noren begiak diran argiak,

        Baña aiñ argiak,

Noren matrallak larrosak baño

        Larrosauak,

Eguzkiaren ondoan nolan

        Izar txikiak,

Noren aldean diran zurbillak

        Aingeruak.

Ixildu bitez, ixildu, ixildu

        Andra andiak,

Rakel-Rebekak, Debora-Esterrak

        Ta Susanak,

Ixildu bitez, ixildu ixildu

        Danak guztiak,

Sara-Abigaillak, Jael-Juditak

        Baita Anak;

Zerren dienak diran beerago

        Onen aldean,

Zergaitik orreen ondoan au dan

        Nagusia,

Palma ederraz zelan bat egiñ

        Ezin leitean,

Mirtoa deitu egiten jakon

        Landarea.

Ixillik gorde beiz Eguzkiak

        Ule gorriak,

Onek daukazun urrez egiñak

        Ikustian,

Alperrik euki arek aiñ eder

        Miragarriak,

Onek Illargi legez biurtu

        Ez dagian;

Ixi, izarren argitasuna

        Egun onetan,

Izarren izan diran begien

        Aur-aldean,

Ixi, bekoki goix-zale onen

        Aldamenean,

Larrosaturik jagiten dana

        Sortaldean.

Ixi, matralla oneen ondoan

        Lore dan danak,

Lirio zuri, larrosa mardo

        Ta zabalak,

Ixi, zidarra, rubi, jazinto

        Perla ta granak,

Ixi, nakarrak, baita ixilldu

        Gaur koralak;

Ao aiñ polit orren ateak

        Idigitean,

Ta bular orrek bialtzen daben

        Arnasian,

Ixilldu bedi gauz onik ezer

        Bada Pankaian

Bardin ederrik aurkitzen bada

        Arabian.

Esku ta bular orreen ondoan

        Leiar garbiak,

Alabastro zeiñ edurrak dira

        Aiñ motelak,

Bata Jaunaren etxea bada

        Dira bestiak,

Zeruak berak gloria andi bat

        Zor deutsenak;

Bata jaunari bere gogoa

        Da poztuteko,

Besteak dira bere grazien

        Zabaltzallak,

Bata ispillu Jauna berbera

        Begiratzeko,

Amodiozko fletxen besteak

        Tiratzallak.

Bere agiñak dira aiñ zuri

        Baña ain zuriak,

Marfillik ez da bardinduteko

        Gaur eurakaz,

Bere okotza biribildu dau

        Arte guztiak,

Poto txiki bat erdi erdian

        Egiñagaz;

Beso, sama, oin, zankoak daukaz

        Ondo atereak,

Alperrik daukaz Zeruak pillar

        Biribillak,

Baña ume onek lurrean daukaz

        Askoz obeak,

Bardingarritzat ez diralako

        Areek diñak.

Gorputz guztizko zatiak ditu

        Utsik bagiak,

Dana guztia ondo egiña

        Dau agiri,

Ezagun dago beren berariz

        Au Egilleak,

Egiñ dabela, gorputz ta ariman

        Miragarri;

Bere sorrera zan legez garbi

        Eta santua,

Jaiotz au bere alantxe bear

        Zan gertatu,

Bata loi baga eta beste au

        Onen dontsua,

Izan zeitezan Jaunak zituzan

        Aukeratu.

Ongi etorri, umetxo eder

        Ain Zerutarra,

Zeruko leio eta bertako

        Eskallera,

Paradisuko atea eta

        Izar goixtarra,

Zatozalako Egun ederra

        Ekartera;

Ongi etorri Jese-n Landara

        Jaio barria,

Zure jaiotza zabaldu begi

        Gaur Fameak,

Zerren larririk aurkietan zan

        Gizon tristea,

Zerren katibu legez ekarren

        Illunpeak.

                        Euskal Erria, 1886, XV