AIETEKO ELIZAN

Aieteko elizan,

eta Azaroan,

biotz bi urtu dira

elkarte gozoan.

Uztarria badute

bizitza osoan.

Aieteko elizan

eta Azaroan.

Gurasoen ondotik

eten da kimua;

alabak utzi bear

amaren altzua.

Gaurko pozak berekin

du min izkutua.

Gurasoen ondotik

eten da kimua.

Zeruak goza beza

guzion biotza,

emarik-ezak utzi

digun min zorrotza;

ezin aztu baitegu

aren eriotza.

Zeruak goza beza

guzion biotza.

Seme-alaben poza,

bai dala aundia!

Biotz biren arnasak

mammitzen bizia,

zeruak sortutako

mirari argia.

Seme-alaben poza,

bai dala aundia.

Izarrak zeruetan

gabaz dute jaia;

maiteen loa zaitzen

dute bere eztaia.

Jaunak bedeinka beza

maite auen naia!

Izarrak zeruetan

gabaz dute jaia.