ZERUKO IKASTOLA

Ostegun Santuz ikasi gendun,

Jauna, guk zure ikastola:

«Au da —entzunaz— nere Gopurtza,

au, berriz, nere Odola».

Arazkero da jarria gure

aldaretan zure Etxola.

Ta emen ari gera oiuka

gizarte nekatuari:

«Atozte gure elizetara!

Emen dezue Janari».

Elizak, ala ere, utsik daude

eta milloika goseti,

janari gabe iltzen zaizkigu

entzungor egiñaz guri.

Noiz ikasiko degu kristauok

osorik zure bidea,

animak zeruko Ogiz asetzen

asi baiño len, gosea

gorputzetatik kentzen degula,

jarraituz zure legea?

Ala jokatu bai-zendun, Jauna,

Ostegun Santu gau artan;

animak zure Gorputz-Odolez

ase baiño len, ta bertan,

zure ikasleen soiñak aseaz

aurrez Pazku-aparitan.