IRRATIRAKO IPUI ANTOLATUAK

1961'garren urteko leiaketan
lenengo saria jasoak.

IPUI GUZIENTZAKO ASIERA

(Musika: «Erregiña ta saratsa»... gora ta azpipe...)

GIZAKUMEA: Euskalerriko jakintza zaarra!

EMAKUMEA: Gure aurretikoen jakituri etsigarria!

GIZAKUMEAK: Atera ditzagun kutxa zarretik, zapi zuri usaitsuak bezela, antziñatik gure erriak gorde dituan kontu zaarrak.

EMAKUMEAK: Aiton-amonen gogoak piztu ta aurren belarriak ernetzen dituzten ipui gazi-gozoak!

GIZAKUMEAK: Atarian negua da.

EMAKUMEAK: Aizeak txistu. (Entzun bedi aize-txistua...)

GIZAKUMEAK: Kazkabarrak soiñu. (Kazkabar otsa gogor...)

EMAKUMEAK: Eta sukaldean egurrak su. (Egur igarrak erretzen txir-txir...)

GIZAKUMEAK: Eta gaztaiñen danboliña itzul-iraulka garretan.

        (Aditu bedi gaztaiñen dunba-otsa ta danboliñaren eragiña...)

EMAKUMEAK: Gabon inguru?... San Anton, bixigua on?... Kandelario?...

GIZAKUMEAK: Ipui-giro!... Kontu zaarrak aidean!

(Doiñua gora ta bera...
Gero, aida bedi musika ipui bakoitzerako...)

IPUI GUZIEN BUKAERA

(Buka ipui bakoitzaren azken-doiñua
ta berriro «Erregiña ta saratsa».)

EMAKUMEAK: Itxi dezagun gaurkoz gure kutxa zaarra.

GIZAKUMEAK: Aurrak logale dira.

EMAKUMEAK: Aiton-amonak, oeratzeko ordua dute...

GIZAKUMEAK: Su-txingarrak estali, ta urez busti ditu amak.

EMAKUMEAK: Katua, bizkarra arrotu ta nagiak ateratzen gelditu da.

GIZAKUMEAK: Egunak eman du berea.

EMAKUMEAK: Euskal sukaldean, argia itzali zaigu.

GIZAKUMEAK: Aidean dabiltz joandako gizaldien itzalak.

EMAKUMEAK: Gaba nagusitu zaigu.

GIZAKUMEAK: Illuna da jabe.

EMAKUMEAK: Jaungoikoak gabon dizuela, euskal irratentzuleoi! (Musika iltzen-iltzen...)