KRISTO BERRI

Gaur igo zera lenengo aldiz

aldarera, apaiz berri;

zuri begira zoratzen zeuden

agintari eta erri.

Begi-biotzak malko-lausotan;

mingaiñak, berriz, aterri.

Lege berriaz lotua zendun

zure biotz eta gerri.

Gotzai Jaunaren itzak sorgindu

zitun zure ezpaiñak,

nai dezunean zure esanera

urratzeko eliz-gaiñak;

zeruetatik zai zenituan

Aingeru-talde bikaiñak,

zure eskuetan noiz eskeiñiko

guztion oben-ordaiñak.

Makurtu zera, itzegin dezu,

Kristotu zera mirariz.

Au da benetan nere Gorputza

esanaz Jesusen oroiz;

Aingeru danak inguru zeuden

zure almenen inbiriz;

zure eskuetan Jainkoa Bera

sortu dezu sorginkeriz.

Aldare ederra urre-argitan

udaberritu da lorez;

intzentsuaren lurrun gozoak

usaitu gaituzte gaiñez;

Meza erdian txilin-soiñura

biotza bete da amesez.

Eskoriatzan eliz barrua

zerutu da goi-arnasez.

Zeru ta lurren egille Jauna

jaso dezu eskuetan;

Ogi ta Ardoa Jesusen Gorputz

ta Odol biurtuz bertan.

Oben gaitz danen sendabidea

datorkigu zure itzetan.

Kristo Berbera berritu zaigu

gaurko Meza Berri ontan.