BALENTXI ZANARI

                Etxaniz-tar Sebastian

                bertsolaria il egunean egiñak.

Il da bertsolaria,

erriko kantari,

basarri ingurua

beltzez da estali.

Beltz ikullu aldea,

beltz etxe ta atadi:

auzo guztia illa

dagola dirudi.

Izarraitz kopeta illun,

zerua auts-zapi,

tontorrean lañoa

lau ankan igari:

txori laguna leio

aurrean da ari,

txistu illunena jotzen

bertsolariari.

Il da bertsolaria,

len kantu ta jolas,

oe gañean datza

sor-gor, ille narras:

oraindik ez da galdu

gelan aren arnas:

eriotza jabetu

zaio ari arras.

Mututu da basoa,

orbelen illobi,

ostrope illunean

aizeak intziri:

atai-txakurrak ulu,

deika nausiari:

egualdiak zerutik

euri-malko dari.

Il da bertsolaria...

baña zeruetan,

argi berria sutu

zaio begietan.

San Pedrori eraso

dio bertsoetan,

santu danak txaloka

zeruko atetan.

Zaude, Balentxi, pozik

zorion orretan

aingeru ta santuen

soñu ederretan.

Kanta ezazu alai

betiko pozetan,

bederatzi puntoko

bertso berrietan.