BERRIKETARIAK

 

Berriketariek dute Plaxateian junta

Gure herriko kaseta hor moldatzen baita,

Damurik ez baitute egiten telebixta

Ederra laike orduan gu denen potreta!

 

         Dindirin din din din

         Baietz atsoekin

         Mundu guzian da berdin!

 

Auzoek ez entzuteko ariz hitz erdika

Euskaraz eta... anglesez ezpain ausikika

Urinean ari dira gatuak milikaka

Aise eginen baitu batek umez hameka!

 

Denek aspaldi dakite Iturburukoa...

Maitexek haur baduela bataiatzekoa

Haur horren sudurra xuta ala den mokoa

Hortan aita nor duken dute trenkatzekoa!

 

Ez da nor nahi ibiltzen Plaxateikoekin

Barne azkarra behar da holako jendekin!

Jaun merak ere badaki batzutan nora jin:

Kartak hor nahasten ditu bozkak izan aintzin.

 

 

      1964 ekoa. Landibarreko gazte batzuekin muntatu pesta batzuen gatik, gibeletik, ukan nituen zirika batzu. «Enbata tzar» bat nintzala eta buru muntatzen ari. Baina dena agerian zen! Eta autobus baten bete izan ginen Arrasateko koperatiben ikusten euskaldun pesta horretan bildu diruarekin. Eta Arrasaten jaunak bezala errezebitu gintuen horgo apez buruzagi jakintsunak, Arizmendiarietak!