23

Leere sappo e nayaɓo e fus, nettaali elikopiteeriwal. Fuɗɗori hawa kan taho. Tun yi’aa ngal, hooloɗaa wonndema ko elikopiteeriwal.

      Mi fuɗɗii kisan liwlude wakkeehoy jiwɓe ɗiɗo no jooɗinooɓe binnde an no ɓortii. Nano e ñaamo, nano e ñaamo, hay mi alaa e fowtaade. Hedditiiɓe ɓen ñemmbin-mi. Ko anndinirɗun ɗun non. Wakkeehoy koy fow watti wiiwaade ka dow. Men fow men hu’i faabo : « Faabee ! Faabee ! »

      Elikopiteeriwal ngal jippitii, wewli e hoore amen. Henndu gabatti ɗin fuɗɗii waɗude molloonde ka nder ndiyan, sa’a laakun kun. Fow sooƴidi : « Faabee ! Faabee ! »

Ɓe yi’ii men, ɓe townani men juuɗe, ɓe ruttii. Mi piitii, tama’u hari lannii. Mi annditi fii yumma an : « Hiɓe too, ka hoɗo, taw ko ɓe jokki nii-nii ? » Ɓay elikopiteeriwal ngal yahii, tama’u ƴawugol ɗon no wuuri fow dogin-mi.

E nder minittaaji cappanɗe nay, ngal arti. Watti ɗon laana ndiyan. Salvamento maritimo. Mi ndaari norɗi ɗin, sabu ka ley leɗɗe, hari mi sifanaama : « Laana ndiyan dandayka kan ko norɗi leemune mari. » Ko kanngal tigi. Fow watti sooƴude : « Bosa ! Bosa ! Bosa ! »

      On « Bosa ! Bosa ! Bosa ! », ko gallol afirikinaaɓe ɓen hakkunde maɓɓe, si ɓe fellitii ɓe daɗii ka lummbugol. Ka ley leɗɗe Tanje e Nador si men naniino fii eɓɓoore lummbugol laatiike, kumpitol ngol layay heña ɓe innay tun : « Hanki goreeɓe men teemedere yimii Bosa. »