12

Alje, no mari dare (gaaru) tati, aranal ngal ko fii laaɗe leydi, ɗimmal ngal, ko fii oto tassii, tammal ngal ko fii kaaruuje. Daral kaaruujeɗen, ko Karuba innetee. Ko ɗon mi soodi biyee fii yahugol Oran.

      Alje-Oran, ko dinaar Aljerinaaɓe temeɗɗe jeetati. Yaadu emmbere leereji jeegoo.

      Ka mi cippotoo ɗon ka kaaruwal, goɗɗo ɓadii lan, adi hay men hiwrondirde. O inni o waaway lan lummbinnde Marok : « Miɗo anndi ɗate ɗen fow. » Ko o lummbinoowo, kono hinaa o aarabuujo. « Ko mi Gabonaajo, gila duuɓi miɗo Aljerii. » Ka aranun mi hoolii mo, kono no o yewtirta non haa ka o lanndii lan ɗon ero teemedere. Ɓernde an nden liƴiti seeɗa « Ko coggu lummbino ngon non », o inni lan.

      « Innuɗaa hunɗun ? », mi lannditii mo, « mi yoɓataa hay huunde adi mi lummbude. » « Fow ko ni warrata ko gaanin yoɓetee », o seytini. « Oo’o, cuggu lumbino ko gaɗa yoɓetee. Si hiɗa hoolii golle maa ɗen, ko gootun, woni ko ɗo’o henndiɗaa ɗi woni ko ton. » Mi holli mo embere mbuuɗi makko ɗin e ero fii yo o anndu mi alaa e ɗaynude mo. O miijitii seeɗa. « Awa, en ɓoroto kiikiiɗe », o jaabii.

Men ƴetti laanakan, Oran fii yahugol mi anndaawoo honto. Men yahi haa e koɗolun tosokun, men cappanɗe nay e njowo. Fow no wa’i wa min. « Gila ɗoo ko yo en seppu », inni men gabonaajo on. Men wattii e magal ka hoore pelle. Ko ɗon mi faami wonndema, men ƴaaɓoroytaa njanɗe ɗen, ko ka pelle men rewata.

      Lummbol Mohamed Salaa ngol no juuti no luggi. Menen ko luuro men innata ɗun. Mo ngiilol yahataa e ɗun, sabu seppugol e binnde wimmbowii. Ton, alaa ko hulɓinaaki. Neɗɗo timmuɗo woowaa rewude e ɗun, ko hay poliisi on rewataa ɗon.

      E nder jemmaaje ɗiɗi timmuɗe, meɗen jokki oo lummbinoowo. Ñallal ngal men sora ka ley leɗɗe. Si naange ngen mutii, men wattoo e maggal. « Marokunaaɓe ɓen no mari poncirɗe tiiɗuɗe. Hiɓe ayni pelle ɗen fow, waɗen doy », wi’i men ɗun gabonaajo on.

      No men yaarata non, pelle ɗen wattii woɗɗondirde. Men wattii haccaade goɗɗun ka ley wimmbowii, ko ndaygu. Men jokkingu haa men yaltiti e ɗatal waɗaa ngal ndole. Ɗon men tawi kaaruhun no fadii men fii naɓugol men Uusda.

      Ka mi ƴawata ɗon ka kaaruhun, junngo sakkii lan : « Mbuuɗi an ɗin ? »