9

Labiriyaa, konnguɗi buy no waylii tentinii mbaaloodi hawa konngol ngol. Yimɓe ɓen ko haala goo wowlata wano maakiti on ɓe inna market. Maakiti Morowiaya on no njanɗi, ko Watasaa’i o innetee. Ko yo ontigi pooɗu seeɗa faransiire nden. E engele ko Waterside, saare ka binnde baharu.

      Maakiti Watasaa’i on no njanɗi panndi, hari mi meeɗaa yiirude gite an ɗen maakiti no foti non. Luuri nooneeji ɗin fow no jillondiri. Ƴimɓe ɓen, mo fottuɗaa woo no ronndii donngii moolanaangii. Wonnde wurin hara ɓe townataa ngii. Mi watti wallude ɓe, si mi yi’ii ko ɓe ronndii kon no teddi mi ƴettana ɓe seeɗa, mi jokka ɓe. Si men hewtoyii, ɓe okkora lan mbuukoy gokkoy. Libatii tati, jeɗɗi maa sappo-e-jowi. E ko non seeɗa-seeɗa tawi mi wattii heɓude mbuukoy gokkoy.

      Wonannde mo duuɓi sappo-e-tati, ronndagol dolle hinaa golle newiiɗe. Hari miɗo fanɗi e hin dolle ronndeteeɗe ɗen no tiiɗi. Ko dolle dimɗe : wonnde fuuñe, wonnde piya. Si wonaa ɗun conci e goɗɗe ɗe mi anndaa ko woni ton, kono tawa ko jukkinayɗe. Wurin wonnde mi innayno : « Mi townataa oo karton ɗoo, himo ɓuri lan. » Ɓe jaaboolan : « Oke, men ndaaray goɗɗo goo. » Si warrii non ɓe jonnataa lan hay huunde.

      Yimɓe Watasaa’i ɓen watii lan hoolaade, ɓe wattii lan noddirde innde an nden : « Iburaahiima aru wallaa men naɓude ngal donngal ɗoo », maa « Iburaahiima, e hino ɗoo mbuuɗi maa ɗin. » E hakkille an, no hitti sabu no holli wonnde hiɓe fawi jikke e an. Ko woni tun si hiirii, ɓe mi anndindiri ɓen fow mutiray gooto-gooto haa lutta min tun. Mi rutoo ka daral, mi fonta karton ka leydi mi waɗa dankun. Ko Labiriyaa mi ekkitii waalaade e laawi.

Ko non mi wuuriri e nder lebbi tati : mi golla ka maakiti, mi waala ka daral otooje. Hari wurin mi majjaama saa’i on. Ko ɗun waɗi ko mi woni e sifaade ɗoo kon niinii, mi anndaa ka tigi-tigi ko ñalaande honnde waɗi. Ko mi anndi tun ko e lannoode yontere, aseweere maa alaare.

      E nder garaasi otooje, mi yi’i neɗɗo no golla e moter, juuɗe makko ɗen fow no tuuni. Mi darii e ndaarugol mo, kanko kadi o ndaarin-mi : « Ko a guinenaajo ? » « Eyyo ko mi Ginenaajo. » « Ko en gooto. » O hucci, o jokki ko o gollata. Ɓay minittaaji ɗiɗi ma tati no gasa feƴƴii, o hayli hoore, o lanndii lan : « Ko hinnɗun addumaa Labiriyaa ? » « Ko ɗaɓɓere », mi jaabii. « Hiɗa mari ɗoo siɓɓe ? » « Mi maraa. » « Hiɗa gollude ? » « Miɗo ronndaade dolle ka maakiti. » « A miiji ko ɗun woni ɗaɓɓere ? » « Alaa no mi suɓora. » O wowlaali hay e huunde men woniri non haa ɓooyi juuti. Miɗo jokki haani miɗo ndaara mo, himo jokki himo golla.

      Mi inni-mo : « Min kadi miɗo faalaa heɓude golle. » O jaabaaki lan. Himo jokki tun himo watta moter kamiyon. Ɓay o gaynii, o ɓanti hoore o lanndii lan : « Ko honɗun faalaɗa waɗude ? » « Ko soferyaagal mi faalaa, gila komi woni paykun miɗo yiɗi kamiyon. Si mi yi’i suka no dogina kamiyon mi ndaarayno mo ko juuti. » Mi yewti-mo fow hay mi daraaki. « Ko mi sofer kamiyon, kono hiɗa fanɗani wonugol karallo (amparenti). Ko duuɓi jelu maruɗaa ? » « Sappo-e-tati. » « Hiɗa fanɗi taho. » « Miɗo anndi kono mi etoto, kala ko wi’uɗon lan mi waɗay. » Mi fillanii mo ɗun laabi ɗiɗi maa laabi tati. O inni yo mi fado mo haa o miijitoo. Mi jaabii mo : « Awa. » Mi ruttii ka maakiti.