5

Fii yaltugol Talandaa ko piiji ɗiɗi. Ko immaa a yeeyaama a naɓaama ka gooto annde fii waɗugol golle ɗe gooto annda. Immaa mawɓe maa ɓen yoɓii mbuuɗi, ɓe sooditiima yaltaa, ɗon non hinaa jawdi seeɗa.

      Ɓay mi naatii ka nder kaso, ɓe liñanno ɓanndu ndun fow, conci an ɗin kadi. Ko ɓe waɗirta ɗun ko ndaarugol si ontigi no jogii jawdi. Min hari huunde mi jokaaki si wonaa kartal dantitee an ngal. Ɓe ƴetti ngal. Gila ɗon mi alaa kuntun kaydi. E si neɗɗo wonii o alaa kaydi haray ngurndan makko no wa’i wa ɗan dammol. Tuwareegiijo on dooli lan haa men noddi siɓɓe an ɓen fii lanndagol ɓe mbuuɗi. « Si wonaa ɗun mi ware. »

      Mi noddaali hay e gooto, mi woni ɗon sokiiɗo. Si ñallii ɓe addana men dekketee rawaandu. Ɓe wannga gite maɓɓe e amen gila dow haa ley e gila ley haa dow. Ɓe watta ɗon, “oke”.

      Kono hari no woodi laawol goo ngol neɗɗo yaltirta Talandaa: dogugol laawoo. Wurin ko non mi warri. Mi sifanto ma no mi warrunoo. Habbo seeɗa haa mi yara ndiyan.

E hino non no mi dogiri non, mi laawii.

      Ka kaso Talandaa, mi weldidi e sokiiɗo goo. On kadi ko Ginenaajo soosoojo leñol. Sooso miɗo waawi yeru konnguɗi wuluure. Kono tuwareegiiɓe ɓen waawata wowlude sooso. Ɓay wonii balɗe tati, mi ɓadii mo, mi inni mo : « Booree, hannde en suuɗoto yalten. » Booree ko konngol sooso firugol goree. O jaabii : « Awa, min kadi miɗo faalaa dogude, kono ko honno yaltirten ɗoo e hino gimmbe ɗen no toowi ɓuri en. Hiɗe ɓuri en fota non. » Wa’i wa si o aamitay. « Hingal ɓuri en mawnude, kono ngal kelɗaa. Mi catii e ɗun ɗon, hingal mari yolɗe ɗe gaseten ƴawrude. » « Awa, en ndaaray », o jaabii. Men habbii haa jemma.

      Ɓay jemmii, men ñinni ko men haldi kon, no men haldirnoo non.

      Hari fow no ɗaanii. Sokaaɓe. Aynuɓe. Gimmbe ɗen. Men moltii men yalti ka kaso, men ari haa ka gimmbal. E maggal no yuli ɓuri budde noogay. « Jokkan », mi inni mo. Go’o ko yo a huulan buddun, ɗiɗi fawaa junngo, tati ɓanndu ndun jokka junngo ngon. Ko non mi ƴaaɓori wa ñuungii. Mi ƴaaɓii miɗo jokka budde ɗen haa mi hewtoyi hoore dow.

      Dow ton, mi cikkori ngoya senngo.

      Ngoya senngo kadi ko Talandaa. Men ñenntii ka nder tannde njannde, men feƴƴi pakkahoy koy. Kono si men yaltay ko bee men diwa gimmbal goo kadi. Ngal ɗon kadi toowenndi ndin ko yeru meeterji jeegoo maa jeɗɗi.

      Mi takkii ngal ndaarugol si mi yi’ay ka jolɗe woni. Mi jinndi nano e ñaamo. Fus. Mi yi’aali. Nettaali mi haccii peccal, mi huutori ngal ɗon fii pepagol ƴawa hara sowtowoo waɗaali. Juuɗe an ɗen, tetekki an ɗin, koyɗe an ɗen gay waɗugol hito. Mi rappiri kolli an ɗin ka ɗoa gimmbal, mi pooɗiri doole, gurii an ngii pooɗori wa si ɓernde an nden feccoto. Mi gorsii moƴƴa non. Mi cikkori ngoya senngo. Ɗun non ko telen meeterji jeegoo maa jeeɗiɗi.

      Ka ɓaawo, ko njaare e hin njaare waɗataa hito. Goree an kadi warri non. O ƴawi haa ka hoore gimmbal dow. O hoccii, o cikkii. Ka o yani ɗon, o waalii ka hoore njaareendi, o waawaali dillude, himo haaca muuseendi. Mi sikki wurin o helii, kono mi fellitaa. Mi wallaali mo, mi dogi fii kala mi anndaa ko honto mi yahaynoo.

      Ɓaawo an miɗo nanude haacaango makko ngon kono min miɗo doga tun. Ɓay mi muutike, mi waalii, mi ndaari ɓaawo an. Lampu torso, e haalaaji e aarabu, e utte e dampe, hari hiɓe piyude soosoojo on. Ɓe daasi mo ɓe naadi nder ton. Ko hay nder ton miɗo nanude haacaango ngon. Ka jeerennde hawa no yaha ka muutii tentinii jemme. Mi aadii yo mi accu haa deƴƴa si mi dilla.

      Ɓay sowto ngon accii, mi immii, mi jokki laawol ngol, fii kala mi anndaa ka mi woni e yahude kono mi yahi tun. Mi muutii ka jeerennde. Paɗe mi wattaaki.