10

Goreejo an innin-mi : « Iburaahiima, hiɗa foddi e yiɗeede seeɗa, heɓaa neɗɗo ko jogo maa junngo ngun, weldinndine e ngurndan ɗan. » « Miɗo anndi », mi jaabii mo, « min kadi miɗo faalanoo ɗun, yiɗeede, mi sinca ɓeynguure, hari ko faale an mawɗo. Kono jooni, mi waawataa ɗun, ka nder ɓanndu an miijooji ɗin no ɗuuɗi. »

      He’e ko nii gooto hoolaaki lan, gila ñannde mi yalti ka hoɗo amen mi naɓidaali e goɗɗo giggol. Ko hay mi ɗaɓɓaali, e gooto kadi ɗaɓɓiraali lan. Ko woni tun. Ko men wonuno ka fitaare, wonnde sonnaajo arayno inna lan : «Iburaahiima aru yahen ɗowtaa lan ƴoogo yen. » « Min ? Awa. » Mi jaaboo mo. Meɗen yahaynoo ƴoogoygol. Mi etorayno mbawndi an ndin fow, mi wallitoo mo. Kono goɗɗi goo, ɗi mi waawataano mo wallugol, mi jaɓataano wallugol mo ? Mi inna mo : « Ɗun ɗon gasataa. »

      Si hiɗa fiɓi faandaare, haqqille ɗen liggoto fii mayre, e a jokkay nde duumoɗaa. Kono si ɓernde nden lo’ii, haqqille ɗen jokkataa. Ko ɗun si tawi e hoore laawol ngol fow, mi ardinaali ɗin miijooji. Ɗun non hinaa huunde, lorraa lan hay huunde. Ko hitti e an, ko ngurdan an ɗan. Honnde e honto mi yiitidata e yumma an ? Ko hunɗun ɓe miijotoo si men yiitidii ?

      Ko ɗun fow woni ka nder hoore an.