12

Mi wonuno lebbi tati Qada’iya. Min lebbi tati gollaaɗi, Isma’iila ɗiɗi, si fow hawtindiraama wonii jowi. Lebbi jowi e jiiɓugol siman. Patoron on hari no faalaa fahin jonnude men golle, kono hari Isma’iila no wonndi e miijo goo. O wi’immi : « Kotoo, en heɓii ɗoo mbuuɗi seeɗa, ndaaren no yahiren ka saare mawnde. » « Oo’o Isma’iila, min ko Libii mi woni e yahude. » « Libii ! O ŋalɗi, waɗoygol honɗun ? » Hari men yewtidanaali hay nde wootere.

      Mi sifanii mo dartol miñan an ngol. Ko honno o iwri ka suudu e ko honno mi jokkitiriri mo. « Miɗo anndi wonnde himo Sabratha. Sabu mi nodduno mo ko mi wonunoo Konaakiri. Kono gila ɗun men yewtidaali kesun. Mi etino Timiya’un noddugol mo. Newaaki. Bardji kadi mi etino ɗon kadi newaaki. » Saa’i buy feƴƴi, lebbi jowi, maa jeegoo, mi anndaa ka miñan an hikkori.

      « Ko fii ɗun yo, Isma’iila, si tawii miɗo faalaa jokkitude miñan an Alhasana. Sabu ko o paykun e gila baaba’en amen feƴƴini ko min o lannditortee. Si men yiidii mi yewtirii mo gite o salataako yiltagol ka amen, ka suudu. » Isma’iila nunniri dimmbugol hoore nden, o watti ɗon : « Si tawii non a nattii miñan maa, ko hunɗun non waɗataa ? » « Mi wonay ton Isma’iila, mi falaaka yahude Eroppu, fodoore an nden ko Gine woni. » Isma’iila deƴƴi ko neeɓi himo ugginii, hippi gite fewti ka leydi.

      Isma’iila. Ka yeeso makko, ko miñan makko tun yi’aynoo. Kono hari mi haalanaali mo.

      O ɓanti gite, o waawii lan ko juuti, o inni: « Yo Alla firtu arsike, kotoo, yo Alla reene. » « En ñannde goo miñan, an kadi yo Alla firtane arsike. E a jaaraama buy, fii ndiyan wuluɗan ɗan e ko ɗabbanɗaa lan koyɗe an ɗen kon. A jaaraama buy Isma’iila. »

      Ko nii men waynondiriri, mi ndaari mo haa o mutoyi ka daral otooje. Gila ɗun huunde mi humpitaaki e makko.