3

Men cappanɗe jeenay e nayo men ƴawi ka kamiyonwal. Ko yimɓe njeegoo haɗi men timma teemedere. Ɓay men hewtii Kidal, men fow men jippii, men limitaa gooto-gooto haa men timmi : « Cappanɗe-nay, cappanɗe-njego’o, cappanɗe-jetati, tawti sappo-e-nay, cappanɗe-jeenay-e-nay, ɗoo moƴƴii. » Men nanngani jeerennde mawnde nden.

Ɗoo, ka mon ɗoo hiɗon jogii baharu, kono ton hari ko ka jeerennde. Si tawii haa hannde a yiiraali gite maaɗe jeerennde, a waawataa faamude ko woni ɗun, jeerennde ko aduna goo. Si a naatii ko miijotoɗaa ko a yaltataa.

      Ton, fow no nanndi. Ko aarabu ɓe wowlata maa tuwareegiire. Maa ɓe inna ko ɓe tuareegiiɓe kono ɓe wowla aarabu. Mi senndindiraaɓe. Miɗo anndi tun, si wonaa Boko Haram haray ko Etaa Islamik. Mi faltaaki moƴƴa.

Men dogi e nder balɗe jowi ka nder kamiyon wal, huunde men ñaama. Ndiyan ko men yara ko yeru bidon hun gootun. Woɓɓe e amen tuuti, woɓɓe e ammen moddini conci mun ɗin. Mo faalanooma bawlude ko bee o waɗa ka conci makko hari feere goo alaa, sabu kamiyonwal ngal alaa daraade.

      Mi sikkuno ko Alserii men woni yahude, ko ɗun ɓe wi’unoo men Gao. Woɓɓe e amen innuno kañun ko Italii sutii, ɓe ƴawni ɓe e kamiyonwal. Ɓuruɓe ɓen ko Espaañ suɓii, ɓe ƴawni ɓe e kamiyonwal. Kono miɗo anndi ɗun ɗon fow ko fenaande, ko fii tun no ɓe jaɓira men mbuuɗi ɗin.