11

      … Yaafo lan hoore morewol ngol majjitorii lan, ko honto dee wonunoɗen ?

                                                                               …. Aa, eyyo ko Alje

Alje, mi wonuno hitaande e lebbi tati, ka kartiye Birkadeem. Telen balɗe teemeɗɗe jowi maa ko ɓuri. Ñallal kala miɗo wonndi e sehilɓe tato : ndiyan, njaare, e siman. Wutte (conci) kadi tati : peeluwal, e ganji ɗiɗi. Ganji ɗin ko mi soodirnooɗi ko fii hita juuɗe anɗen fusu. Kono Birkadeem, juuɗe fusata. Sabu, ɗon, ñanndewoo ñannde seteeɓe aray, ɓe ara, hiɓe iwri Maali, Niseriyaa, Kamerun, cenɗe fow. Ñanndewoo seteeɓe heyɓe naatay, si wonaa afirikinaajo lummbuɗo jeerennde, ko sirinaajo doguɗo hare. No dagii, e ko non yaarata, golle sattuɗe ɗen fow ko seteeɓe ɓen maranaa, ko kamɓe waɗata ɗe.

      Birkadeem, golle ɗen ko suuɗagol seeɗa, fii hita ontigi fottu e poliisi. Ko hay jemma men yaltataano ko gollirde. Ko ka ley benteeji beton men suuɗotonoo men waaloo, men suddoo kartonji. Men dawa immaade, men juula, men ñobba kartonji ɗin, men naggana golle.

Si wonaa ko gollirde ɗon (santiyee) mi anndaa hay e nokku e ndder Alje.

      E leyɗe capaaɓe ɓen (makribi), men teddinaaka. Si mi naatiino e nder magasan fii soodugol goɗɗun, e soggayno lan yo mi yaltu ka yaasi. Ɓe inna : « Ɗo’o kulle alaa ɗoo ! » Ka hoore laawol mi nanayno kadi hoyreeji, maa si ɓe wowlaali hay huunde, si on fottii ɓe udda kine maɓɓe ɗen.

      Leyɗe capaaɓe ɓen hoynde lannataa. E hinaa poliisi on tun, ko hay yimɓe ɓen. Yimɓe wano min, wano maa. E ko hasii kon paykoy. Tawaa ko yo a jaɓu, ɓay haray a alaa feere.