10

Mono iwri Maali, Bordji ko saare ɗimmere e ndre leydi Alserii. No woodi innayɓe Bordji-Muktaar, kono miɗo yiɗi raɓɓinɗinngol konngol. Gila Timiya’un haa Bordji ko kiloo cappanɗe jowi e jowi. Si mi innii kiloo, ɓe faljita lan. Be inna : « Kilomeeter. » Ɗo’o ko yo timmine. Kono menen ka amen Afiriki meɗen yiɗi raɓɓinngol. Mo innii kilomeeter haray sagarawol ngol juutii.

Bordji, kiloo teemedere e cappanɗe jowi. Gila Timiya’un haa Bordji wa’aa wa gila Talandaa haa Timiya’un. Njaareendi ndin ko wootiri, henndu ndun men, ko woni tun laawol Bordji ngol no waɗaa ndole (gudoron), ko ɗun waɗi si tawii hino weli fii sabu hino seppoo no newori. Bordji, kiloo teemedere-e-noogay. Hari ko men tato, Isma’iilahun, e maalinaajo gooto. Tuma kala men hacco goɗɗo ka nder tule njaare, furee wonuɗo e gere waylagol. Mo tenƴinii tina ɗonka kan ka yeeso makko, ɗonka mawka. Njeerennde nden ko non wa’i. Bordji, kiloo cappanɗe jeenay. Maalinaajo on tawi accii waawude. O darii ka sera ɗatal. Menen men feƴƴi. Ko honɗun men gasaynoo waɗude ? Feere goo alaa. Bordji, kiloo cappanɗe jeegoo. Isma’iila haccii mboddi moolanaandi no taƴitaa laawol ngol. Men darii, men fadii wa’i wa si me suuɗoto, haa ndi mutoyi. Ka leydi amen, mo waɗii goɗɗun mboddi, ko kataa. Ka hoore laawol, mboddi ko accantee ɗun. Bordji, kiloo cappanɗe nayi. Ko jemma, meɗen ɗaanii. Meɗen waalii fontii ka hoore njaareendi, ko ɗon men ɗaanii. Ɗaanagol no moƴƴani ontigi, o hettitay doole, o yeggita caɗeele goo. Si neɗɗo yegitii, ɓanndu makko ndun foygitoto, seppugol ngol newoto fota. Bordji, kiloo noogay. Men seppii balɗe nayi e hoore ngal ɗatal, ko ñannde jowi on men hewti Bordji.

Bordji, men golluno ɗon lebbi ɗiɗi e gere jiiɓugol siman. Ko e binnde siman men waalata, men fina hara meɗen lakkaa. Golleɗen ko ka leere jeegaɓo fuɗɗotoo, ɗe lannataa few. Si cuuɗi goo toowii haa hewtii ka ñappee, haray goɗɗi goo no ƴuri ka leydi binnde ɗon tawa bee siman jiiɓee.

      Woni haa mi watti miijaade : « Wonnde ɗoo cuuɗi ɗin no mawni e hino menen meɗen fanɗi. » Ko mi faalaa innude ko men alaa heɓude mbuudi buy. Mi ɓadii Isma’iila. Mi lanndii mo: « Ko honɗun haɗi yahen e saare goo ? » « Miɗo tawti », o jaabii.

      Men yahi Regan, ko men suuɗaaɓe, e ɓaawo pikoopuwal. Ɓe yoɓini men dinaar guluuje sappo-e-jeeɗiɗi fii yaadu ndun. Ka dammi ɗiɗi waɗetee, ɓe naadi men sappo e jeegoo. « Kotoo », wi’i lan Isma’iila, « ko arata en ƴettay kaaru. » Ko ɗun men yahiri hakkunde Regan e Adrar e nder kaaruwal.