19

Si mi hootii ñannde goo, e si yumma an e minñiraaɓe an ɓen no ɗon, mi sifanto ɓe wano mi wonu maa e siforanaade nii, fii kamɓe kadi yo ɓe faamu fota. Sabu huunde ɓe anndaa e ko mi feƴƴini kon. Ko ɓay tun mbuuɗi talifon an on ɗuuɗaa e laawol anngol no juuti. Kono ñannde goo mi jooɗoto moggo maɓɓe mi safanooɓe fow.

      Ngurndan welaa sifaade. Ko adii kon Maali, ko hikkiiɗon Libii. Taf-taf. E lette mun. Eyyo ɗun ɗon fow ko goonga ko ɗun mi heɓi e nder ɗaɓɓitugol Alhasana. E hin-le ko e laakun poore o ƴawi, ka hoore maayo. Ɓe teemedere e cappanɗe nayi e tato wonndude e makko. Mi anndaano haa e jumaare miɗo iwtaynoo juulugol, mi nani konngol nofarasi, mi faami wonnde, « mi hayrii mo, o fuutike lan. »

      Mi sifanoyto ɓe ɗun fow.

      E miɗo anndi ɓe lanndoytoo lan, si tawiino hinaa Eroppu mi fokkitunoo honno mi yiltoo, mi arta ka suudu. Min tigi hari miɗo lannditoo ɗun tumawoo, welaa sifaade. Kono mi yewtete. Go’o, si donngal bonnere maa nden ñoƴƴii ma, no metti fii ka yiitaa laawol. Ɗiɗi, si a hewtii Aljerii e Libii, haray yiltagol tulɓii sabu haray a woɗɗitike. Tati, mi sikkaa ko ndimu, daragol yeeso yumma an e gonɗi maɓɓe ɗin. Ɗun ɗon pellet no aaninin-mi.

Ko ɗun waɗi si tawii gila neeɓii, mi accitiino juulugol. Ko mi sakkitii juulugol ko ñannde men yahunoo ka hurɓa, eyyo hurɓa sabu ƴawugol e laakun a ɓornaaka wakkeehun dannditorkun. Mi juuli, mi wi’itii, « si Alla no faalaa yo mi hewtoy Erop, mi hewtoyay. Si ko asko mun mi luttay ka nder ndiyan. »

      Min kadi.