14

Allaahu akubar, ɗun no nanoo immorde ka soorooji. Aarabuujo ɓadii lan, o lanndii lan ko honɗun mi woni e waɗude ka damal juulirde. « Ko jooni mi yalti juulugol. E miɗo fokkiti gollugol », mi jaabii mo. Hari non tuuba an mban no tuuni haa feƴƴiti a wi’ay ekkekko. « Awa. » O hoolii ko mi wowli kon. O ɓeydi : « Ɗoo non, golle alaa ɗoo, ko bee yahaa Tiripolii maa Sirte. Ton golle no ton. » « E ko honno mi yaarata ton. » « Sir Yalla », ko ɗun woni mahin e aarabu. Fii yo mi jokku mo.

      Men taƴiti ɗate seeɗa, men yaadi haa e gaaraasi njano. Ka nder gaaraasi, pikoppuuje buy no hen. Tun mi inni mo : « Ko Sabratha mi faalaa yahude. » « Ko ɗoo haanuɗaa yuɓude dinaar libinaaɓe teemedere e cappanɗe jowi. »

      Libii kadi ko dinaar ɓe huutorta wono Aljerii. Mbuuɗi maɓɓe ɗin ko innde wootere kono jaroodi ndin no ɓurdi. Ko hasii kon ganndal faggudu no metti faamude. Wuundu dinaar libinaaɓe e wuundu eroo no fota ko jari. Ko ɗun si tawii teemedere e cappanɗe jowi dinaar libinaaɓe no fota teemedere e cappanɗe jowi eroo. Ko ɗun ɗoo mi yeetaa.

      Mi lannditii mo fahin, « teemedere e cappanɗe jowi ? » « Ko ɗun tigi », o jaabii. « Hino ɗuuɗi, habbo lan seeɗa. » « Awa, yahu jinndaa seeɗa, miɗo ɗoo. »

      Mi jinndoyi e nder saare Gardamees, fus waylaali. Mi yi’aali al-alaama goo no mi yaara Sabrata. Mi yiltitii mi yiidi e aarabuujo arano on ka gaaraasi. Mi tawi himo lootude pikkopuwal makko ngal, Nisanwal. Wurin o yeƴƴitaaki o ndaari lan o inni: « Dinaar teemedere e cappaɗe jowi. » Mi tammbini mo mbuuɗi ɗin, o winndi lan innde nden e kaydi.