1

Mi hewti Sigiri bimmbi ñannde mi ɓorii Konaakiri ka alansara. Mi woni haa jemma miɗo miijoo, « e jooninon ko honno mi gerdata fii feƴƴugol ? » Ko Bamakoo mi faalanoo yahude kono no satti, hay si tawii yumma an yeeyii dammi tati. Mi ndaari nano e ñaamo, mi haccii soferjo kamiyon. » « Ko honto yahoton ? », mi lanndii mo. « Bamakoo. E o watti balɗe sappo-e-jowi kala mi waɗay yaha-ara Konaakiri-Bamakoo », o jaabii. « Min kadi ko kamiyon mi doginta, miɗo anndi no yaareetee hara mi sonjaali doginoowo on. » O deƴƴi seeɗa, himo ndaara lan yeeso ngon, ɓanndu ndun, jiiba mban. O inni : « Hiɗa mari jelu ? » « Ɗuuɗaa ko mi jogii kon. » « A adday guluuje cappanɗe tati e tati faran, mi naɓore. » « Awa. »

      O udditi baafal ɓaawowal ngal, o inni yo mi ƴawu. Ko hoore tulde ngawri mi yahi haa mi hewtoyi.

Bamakoo, ko cele mawɗe, ɗate buy no fotti e no seedi ɗon. Ɗate, yimɓe e maakitiiji. Fow feƴƴay. Ka daral mi nani sooso no yewtee, mi miijii : « Guinenaaɓe no ɗoo. » Mi lanndii goɗɗo e maɓɓe : « Fii yahugol Gaa’o, ko telen ɗoo ? » « Alaa ! Otooje Gaa’o ɗen hinaa ɗoo darotoo, ɗoo ko ɗe Gine ɗen. Ɗe Gaa’o ɗen no toonin too. » « Mi anndaa Bamakoo », mi inni mo. « Jokkan mi holle. »

      Men seppi e ɗee ɗate Bamakoo. Men yaari ka ñaamo, men yiltori ka nano, yiltii mi anndaa woo. Jooni wurin mi yeggitii. Ko honno waɗiri haa men hewtoyi.

      Daral Gao ngal no njanɗi, e yimɓe no ɗuuɗi. Woɓɓe ko ka banje waalata, woɓɓe no yara kafe, woɓɓe no bammbi paykoy, woɓɓe no habbii. Mi ɓadii yeeyirde biyee nden, mi lanndii : « Biyee ko jelu ɗoo e Gao ? » « Bamakoo-Gao, guluuje jeenay faran, jaabii lan yeeyoowo biyee on. » Maali kadi ko faran ñaametee, kono kamɓe ko faran CFA hiɗi ɓuri mbuuɗi Gine ɗin giyaa. Guluuje jeenay faran CFA ko telen eroo mbuuɗi sappo-e-tati. Mi wakkilii coggu ngu o inni ngun, mi jonni mo, o jonni lan biyee on.

Jemma on hippike e ɗatal ngal, kaaruwal ngal ɗaanii. Ko mi finoyta hari e hino jeerennde.