20

« Mi alaano jawdi buy si wonaano yeru ɗun ɗon. »

      Ko ɗun mi yeetotonoo lummbinooɓe araynooɓe yewta men fii yaadu ka ley leɗɗe. Ɓe sikka mi fenay woni, maa mi saloto woni yoɓugol coggu ngun fow. Kono pelet hari mi alaano ero guluuje tati. Men ronka fottude ɓe hoota. Lummbinooɓe e eɓɓooje mun, ɗun ko tuma woo. E kadi ɓe artata.

      Lummbinooɓe ɓen fow hinaa aarabuuɓe. Woɓɓe wurin ko men leñol gootol ko fokkitunooɓe Erop arti jooɗii ɗon fii ngeegu. Eyyo fii ngeengu. No hitti ka tawata bernde neɗɗo yaajaa panndi. E jaka ɗun hinaa ella. Ko farilla, kono hinaa mo kala waawi ɗun. No gasa ko ko ekkitetee. Mi anndaa, sabu mi ndarndaaki.

      Ñannde goo, Bari ari ka ley leɗɗe. Bari ko ginenaajo wowloowo pular. Kanko kadi hari ko ero guluuje tati o lanndii, wano hedditiiɓe ɓen. Mi sifanii mo no mi fewndori. O jentii lan haa mi gayni. O inni fewndo ɗoo o waawataa lan wallude. Ko yo mi fado mo e nder balɗe sappo maa sappo e jowi o jaaboyto lan. « Awa, haray miɗo fadi maa ɗoo, mi dillataa haa araa. »

      E nder ko ɓuri lebbi ɗiɗi miɗo fadii, mi yi’aali Bari. O acciranno rewro makko talifon on, o winndi e kaydihun o jonnin-mi. Mi huutori talifon goreejo an, mi noddi. Kono o jaabaaki. Mi sakkitori accugol noddo. Mi taƴike. Miɗo miiji wonndema ley ɗee leɗɗe wonii tun non ka an, mi yaltataa ɗoo muk.

Mi sikki ko e alarbaare, maa alkamisaare, mi fellitaa. Mi yi’i Bari. O ardi e marokunaaɓe ɗiɗo. Hiɓe mari eɓɓooore lummbinngol, hiɓe ɗaɓɓude lummbooɓe. Hiɓe lanndii ero guluuje tati e teemeɗɗe jowi. Woɓɓe no jeejude yo accane ero guluuje tati e teemeɗɗe ɗiɗi maa teemeɗɗe tati e misal.

      Si no heewaa ka ley leɗɗe, welaa fii. Si an a salike, goɗɗo jaɓay jooni. Ko ɗun woni ngeengu.

      Ɓay ɓe gaynii ko ɓe arani kon, Bari ɓadii lan, lanndii : « Hiɗa e jam ? » « Jam tun », mi jaabii. « Mi alanama e ngal eɓɓoore yaadu, kono miɗo maran maa goɗɗun. » « Eyoo nee ! Honɗun nii ? » « Si hiɗa faalaa, en yaaday wonaa ka an haa heɓen laawol no lummbiraa. »

      Men yalti ka ley leɗɗe o ƴettin-mi e oto haa ka o hoɗi ɗon. Bari ko e kartiyee goo Nador ɗon hoɗi. Suudu waalordu e ñallirde (salon) e kuri nderndehi. Nden ñannde jemma, mi waali ka salon e julle ɗaatuɗe wonani ɓaawo an ngon ŋalaw. Sabu hari ɓurii duuɓi ɗiɗi ko e pecce beton maa ley leɗɗe ngo waalata.

      Ɓay men finii, mi moƴƴinani men fow ittirɗun kooƴe. Men fow, ɗun ko Bari e sonna mun. Bari inni lan : « Si en gaynii ittude kooƴe, a fuɗɗoray woncitugol kuri kin. » O ɓeyditi, « ɗoo, golle suudu ɗen fow ko an waɗata. » « Awa », mi jaabii.

      E nder lebbi tati, mi yaltaali e nder kel cuhel.