6

Konaakiri no mari daral mawngal otooje. Ngal daral ko gaaruwatiir Bambetoo ngal innetee. Otoojee yahayɗe ka hoɗo amen ko e tenen e alkamisa ɗe ɓorotoo hella kiikiiɗe. Ko woni tun ɗe hewtoytaa haa ka amen, ko Kankalabe ɗe darotoo. Si men hewtii ɗon, men seppa men yaha Cankoy. Ɗun ɗon ko yeru kilomeeterji jeenay.

      Ko e alkamisaare mi ɓorii Konaakiri. Mi hewtoyi Cankoy e juma kiikiiɗe. Hari niɓɓitii.

      Ɓay mi hewtii ka suudu, mi waawaali wowlude hay konngol gootol. Kono ɓay neene an yi’ii lan, ɓe miijii kisan no woodi ko waɗi. Ɓe lanndii lan : « Iburaahiima ko honɗun waɗumaa ? » « Mi selaa fota neene », mi jaabii ɓe, yiltii mi fanki. Men ndaarindiri. Ɓe maaki fahin : « Mi tamƴinii tun no woodi ko wonuɗaa lan e suuɗude. »

      Ɓe ƴetti jullere, ɓe toolii binnde an. Men fuɗɗii yewtude. Men yewti ko juuti fii nawnaare sukkar baaba’en nden et fii ko mi woni e janngude ka lekkol. Natti ɓe maaki : « Iburaahiima si tawii baaba’en maa feƴƴinii miɗo faala yo a anndinan. » « Pelet ɓe feƴƴinii », mi anndini ɓe. Ɓe fuɗɗii fesude, yergina linta sifoo ko feƴƴi e ngurndan baaba’en an. Mi ninsi seeɗa ko honɗun waɗi haa mi haalani ɓe e jaka mi wowlataano. On jemma mo ɓe anndi faatunnde nden, miɗo anndi ɓe wullayno fota ɓe finndina fow ka nder galle. Ɗun e ɗun mun mi waawaali ronkude halangol ɓe. Ko non men woniri haa bimmbi, meɗen jooɗii ɓadondiri e julle seesi.

      Bimmbi minñiraaɓe an jiwɓe ben adii finude, Faatumata Binta e Rugiyatu. Hikkii ɗon miñan an Alhasana. Ɓay mi yi’iiɓe mi ngoƴaa. Mi faami wonnde men wonay woni galle ɗe alaa tama’u. E min dikkuru ndun ka nder suudu. Mi sikki tun a faamii ko mi faalaa wowlude kon.

      Neene an hollin-mi fotoo kiɗɗo baaba’en an. « Baaba’en », mi inni. Baaba jaabaaki. « Neene », mi jokkitii, « jooni non mi waawataa yahude ka lekkol. » Neene jaabaaki kadi.