17

Muusu reedu ngu mu wonndi gun hinaa Nador fuɗɗii. Ko gila Aljerii mi iwdi e mun. Hari mi meeɗaa ka muusireede non. Si fuɗɗinoke mi anndayno wonnde fii neɗɗo on lannii. Si mi innii neɗɗo, ko fii an mi woni e wowlude, museendi ndin kadi ko mi fow an, gila dow haa ley, tentinii, reedu ndun, gila ka ɓernde haa ka laɓorɗi. No w’a’i tun wa mo ɓuccirii teteki ɗin pensiije.

      Kono woni ko Tanje maa ko Nador, mi waawaano waɗude hay e huunde. Marokku wa’aa wa ɗoo. Ɗoo mi naɓaama ka labutaani doftoorujo on inni : « Ko yo seeke kisan kisan. » Mi ɗanninaa, ko mi finata, hari miɗo wonndi e peŋe noogay ka nder reedu. Ko ɓuuri mi wonndunoo.

      Aljerii, maa Marokku kañun mi waawataano waɗude hay huunde, mi waawataano yahude ka labutaani. A yawtay damal ngal tun ɓe inne hootu ka maa, werde maa alaa ɗoo. Ko ɗun si mi wonndi e muusu reedu haa mi sikki fii an lannii.

Ñannde goo, sehiljo (njaatigiijo) an ɓadii lan, o inni lan : « Iburaahiima mi nodday karamokoojo… » Afiriki, karamokooɓe ɓen no anndi gunndooji buy, kono hinaa ñawndooɓe, ɓe yahaali lekkol. Mi salii ko o holli kon, « feƴƴay », mi inni mo. « Alaa, Iburaahiima feƴƴataa miɗo sutii muuseendi ndin ka nder collaari gite maa, ko bee mi noddane karamokoojojooni-jooni. »

      E nder minittaaji hari meɗen jooɗii, meɗen sutondiri. Min ginenaajo, kanko nijernaajo. Mi e muusu reedu an, kanko e karamokoojo makko. O lanndii lan lannde ɗiɗi maa tati si o fuɗɗii karamokoyaagal makko ngal.

      Ko adii kon, o meemi lan ka reedu. Dimmunɗun o yeƴi lan juuɗe ɗen. Tammunɗun o ommbi gite makko ɗen. Mo gite mun ommbii no luggina miijo. « Iburaahiima ko honno muuseendi maa ndin wa’i ? », o lanndii lan. « Gila yumma an jibinin-mi, mi meeɗaali heɓude sifa ndii muuseendi. » « Awa, fii ittugol ndii muuseendi, ko bee ñaamaa ceɓe leɗɗe seeɗa. Leggal no innee… »

      Jooni non mi yeggitii innde leggal ngal o wowluno fii maggal. Ndaaraa le hari miɗo annditunoo innde maggal... habbii doo.

      Alaa, alaa e arude. Hinaa huunde. Wurin hari mi hoolaaki mo, mi haalanno mo non, wonnde ɓanndu an ndun woowaa ñaamude ceɓe. « Iburaahiima, ko lekki maa kin non. » « Awa, a jaaraama », mi jaabii mo.

      Kono mi ñaamaano ɗun. Si ɓanndu muusii ma, ko ɗun hillnotoɗaa, wurin a yeggitay koya barmehoy. E kadi miɗo anndunoo ko muusaynoo lan si ndin ɗon accii : Alhasana, miñan an. E hin-le ndin ɗon muuseendi, ceɓal woo ñawndataa ndi, miɗo anndi ɗun hay si tawii hinaa mi Karamokoojo.

      Ko ɗun si muusu renndu ko mi wonndi kon, ɗowtanno gila Aljerii haa Marokku. Uusda men wonnduno balɗe tati maa ko ɓuri, Tanje kadi, ko wano non Nador. Kono ton wa’aa wa ɗoo, si a yahii ka labutaani, goɗɗo ɓadoto ma inna : « Ɗoo hinaa werde maa, yaltu. »

      Pensiije ɗen fuɗɗoo ɓuccude tetekki maa ɗin.