13

Libii, ko aduna goo, ka neɗɗanke lettoo.

      Qada’iya hari ɓe hajike lan, « habibi, hita yahu Libii », kono mi jaabii, « ko bee tun mi yaha, mi yaha Sabrata alaanaa lan feere goo ko bee tun mi yaha. » Ko ontuma ɓe tinndinin-mi laawol ngol. « Ko adii kon a yahay Debdeb ka kaaruwal, si a hewtii ɗon seppaa yahaa. Kono a wattanay hilla fota. »

      Qada’iya- Debdeb, dinaar wuluure e temmeɗɗe tati, yaadu leereeji jeɗɗi.

      Debdeb ko saare wonunde ka keerol nden e nder Aljerii, hakkunde Aljerii e Libii. Tummbere nden ka keerol ko kafu. Ko keerol ko non wa’ata, si a yollike, a alaa Aljerii, a alaa Libii. Ko e juuɗe poliisi wonuɗaa. Ɓen poliisiiɓe le alaa huunde ko ɓe hula, hiɓe waawi lettude neɗɗo. Ɓe wi’immi si tawii ko neɗɗo wa’uɗo wa min, ɓe tappataa mo ka koyɗe, maa ka juuɗe. Ko ka hoore maa ka hakkunde koyɗe, sabu ko ɗon muuseendi ndin ɓurata suuɗaade.

Ka Daral otooje Debdeb, mi yi’i yimɓe njeetato. Ɓe innin-mi wonnde ma kamɓe ɓe etoto fii no ɓe lummbira keerol si tawii men yaaday. Mi jaabii ɓe wonnde yo ɓe yahu, min miɗo ɗon taho. Miɗo anndunoo ko heɓaynooɓe si ɓe lumboyaali.

      Mi waali ka daral ɗon, mi waali jooɗaade, miɗo habbii yo weetu. E hino ngu, ndaygu ngun, ndaygu wuminayngu, ngu seedii e niwre jemma nden. Gite jalbii hay gooto e ɓeya njeetato alaa yeeso an. Hara ɓe lummbuno, hara ɓe naatii Libii ? E jaka mi jokkayno ɓe. Kono mi salii, mi jooɗii jemma on peetu ka daral.

      Bay ñallii seeɗa, ginenaaɓe ɗiɗo tawi lan ɗon. Kamɓe kadi hiɓe faalaa yahude Libii, mi lanndii ɓe si tawii ɓe accay mi ɗowtaɓe. Ɓe jaabii kisan eyyo, si tawii mi yoɓii ɓe wallay lan. « Wallon lan ! Wano honno ? Ko oto ƴetteten kaa ko honɗun ? Si tawii wonii mi seppay woni haray alaa huunde ko mi yoɓa on. » « Ko goonga maa », ɓe jaabii. Men jooɗii ɗon, men tatoo non, me wonndi habbagol jemma on.

      Mi ndaari mi tawi wonndema, ɓee no ɗuuɗi haalaa, ɓe uddii lan noppi. Mi miijii wonndema ɓe ɗoo hinaa yaadeteeɓe. Ko seeɗa seeɗa faamirta wonndema neɗɗo ko e nder yewtere anndataa mo.

      E saa’i noogayaɓo on e fus, ɓe innindiri: « Goree, jooni non niɓɓii, hiɗen waawi yahude. » Kono min mi jaabii : « Mi yahataa, miɗo huli. » « Ee a yahataa ? » « Eyyo, yahee ! » « Eyyo. » Mi acci haa ɓe woɗɗitii seeɗa, mi jokki ɓe.

      Mi seppi leereeji tati maa nayi, ka nder njaareendi hoore, miɗo haccii ginenaaɓe ɓen ɗiɗo.

      Ka leere nayaɓo bimmbi, mi faami wonndema ko e nder Libii mi woni. Men hewti e koɗolun, mi watti yi’ude piiji ɗi mi woowaano yi’ude Aljerii. Allaahu Akubar. Mawɗo nayeejo no naataynoo e nder juulirde, himo lukkii finkaari. Allaahu Akubar.

      Mi miiji ko ɗoun ɗoo woni Libii.