16

Ñanndegoore hari meɗen Serekore, meeter an jonni lan talifon on fii yo mi noddu mi humpitoo ka suudu. Hari ɓooyii mi humpitaaki ko feƴƴata Cankoy. Mi noddi talifon on waɗi hito, neene an ƴetti talifon on ɓe maaki : « Alloo ? » « Neene, ko min Iburaahima. Ko honno wa’ani on ? » « Jam tun alhamdulillaaye, an le ? » « Miɗo e jam neene, yettude allah buy. » Ɓaawo salminaango woowungo ngon, mi lannditii ɓe fahin : « Neene, hiɗo e jam ? » « Eyyo, miɗo e jam, kono waɗii jonte tati mi humpitaaki Alhasana, o yaltiino, gila ɗun mi humpitaaki mo. Iburahiima an hiɗa humpitii mo ? »

      Huunde e ɗun hari mi humpitaaki, hari wonii duuɓi tati maa nayi gila mi yalti ka suudu. E gila ɗun ko yeru laabi tati mi yewtidi e Alhasana, hay nde wootere o innaali lan wonndema himo fokkiti. Mi inni yumma an yo ɓe fado lan seeɗa mi tefa.

      Ɓay men hewtii Konaakiri, mi yahi kisan ka baaba’en mawɗo fii humpitagol si tawii Alhasana no ka maɓɓe, maa si o rewuno ton. Ɓe maakanini lan wonndema ɓe humpitaaki. « Oke », mi jaabii mo. Mi yiltii ka gaaraasi.

Woni saa’i, jonte maa lewru, maa ko ɓuri ɗun, mi humpitaaki Alhasana. Mi aadii hootugol Cankoy ka neene an.

      Adi mi iwude Konaakiri mi soodi saaku ɗiɗi maaro. Mi ƴawi e kaaruwal haa Kankalabe, mi seppi haa Cankoy, hoore miɗo ronndii saakuuji maaro ɗin. Mi tawi yumma an ka ɓaawo suudu, ka nder suntuure. « Iburaahiima » ɓe maaki. « Neene », mi jaabii, « hari mi humpitaaki. »

      Mi woni yontere timmunde ka nder suudu. E nder wulaa mo Alhasana acci. Mi wa’i wa si mi lo’ay. Si mi innii lo’ere, ko tawde miɗo tooñitii. Ko min woni sommbo yaadu miñan an ndun, sabu mi foduno mo wonndema mi wallay-mo no o janngira. Kono huunde mi waɗaali, ɓay hari ko mi aparantiijo, mi alaa e heɓude jawdi. Ko ɗun si o yahi.

Ka damal suudu, no wewla ɗon leemunehi, ko baaba’en aawunoo ki. E ley makki miɗo jooɗii, miɗo miijitoo : « Miñan hara honto e laalagal leydi ndin yaaruɗaa. » Binta e Ruqiyatu ɓadii lan, mi wattanaali hilla e maɓɓe, mi waawaali fes. Hari ko mi faalaa, ko yahugol Labiriyaa, Saralon maa Moritani maa ka woni woo mi ɗaɓɓita miñan an.

      Mi lanndii neene an fii faamugol ko ɓe miijii. Ɓe jaabii lan : « Iburaahiima yilto Konaakiri, hita accitu mecce maa ɗen, si mi humpitike mo, mi humpitete ».

      Mi nunni, mi yiltitii Konaakiri. Mi toppitii e liggeeji an.